ໜັງສືພິມເຢິນມິນຢື້ປ້າວຂອງຈີນລາຍງານວ່າ: ໃນໂອກາດທ່ານສີຈິ້ນຜິງ ປະທານປະເທດຈີນໄດ້ຢ້ຽມຢາມລາວທາງລັດຖະກິດແຕ່ວັນທີ 13-14 ພະຈິກຜ່ານມາ, ທ່ານວິຈິດ ສິນດາວົງ ຜູ້ຊ່ວຍລັດຖະມົນຕີແຜນການແລະການລົງທຶນແຫ່ງ ສປປ ລາວທັງເປັນຮອງປະທານຄະນະກຳມະການຮ່ວມມືລາວ-ຈີນໄດ້ໃຫ້ສຳພາດຕໍ່ນັກຂ່າວໂດຍຢືນຢັນວ່າ: ການຢ້ຽມຢາມຄັ້ງນີ້ໄດ້ປະກອບສ່ວນເພີ່ມມິດຕະພາບແລະລົງເລິກການຮ່ວມມືລະຫວ່າງສອງປະເທດຈາກການຊີ້ນຳຂອງ ຈິດໃຈ "ເພື່ອນບ້ານທີ່ດີ, ໝູ່ເພື່ອນທີ່ດີ, ສະຫາຍທີ່ດີແລະຄູ່ຮ່ວມມືທີ່ດີ" ແລະເຮັດໃຫ້ສາຍພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດກ້າວຂຶ້ນສູ່ລະດັບໃໝ່.
ທ່ານວິຈິດຢືນຢັນວ່າ ລາວຈີນລ້ວນແຕ່ເປັນປະເທດສັງຄົມນິຍົມ, ມີທັດສະນະຄະຕິການພັດທະນາທີ່ຄ້າຍຄືກັນແລະເປັນຄູ່ຮ່ວມຊາຕາກຳທີ່ມີຄວາມໝາຍທາງຍຸດທະສາດ. ການຢ້ຽມຢາມຂອງທ່ານສີຈິ້ນຜິງໄດ້ສ່ອງແສງໃຫ້ເຫັນວ່າພັກແລະລັດຖະບານຈີນໃຫ້ຄວາມສຳຄັນສູງຕໍ່ການຂະຫຍາຍສາຍພົວພັນຄູ່ຮ່ວມມືຍຸດທະສາດຮອບດ້ານລາວ-ຈີນ ເຊິ່ງຈະເພີ່ມຄວາມໄວ້ເນື້ອເຊື່ອໃຈກັນລະຫວ່າງສອງປະເທດ ທັງຊຸກຍູ້ສາຍພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດກ້າວຂຶ້ນສູ່ລະດັບໃໝ່.
ທ່ານວິຈິດກ່າວຕື່ມວ່າ: ຈີນໃນຖານະເປັນປະເທດໃຫຍ່ທີ່ມີຄວາມຜິດຊອບ, ຍຶດໝັ້ນກ້າວເດີນຕາມເສັ້ນທາງພັດທະນາໂດຍສັນຕິ, ຄັດຄ້ານລັດທິເຈົ້າອຳນາດແລະການເມືອງມະຫາອຳນາດ ທັງໄດ້ປະກອບສ່ວນສຳຄັນເຂົ້າໃນການຮັກສາສັນຕິພາບຂອງພາກພື້ນກໍຄືຂອງໂລກ. ການທີ່ທ່ານປະທານສີຈິ້ນຜິງຢ້ຽມຢາມລາວຄັ້ງນີ້ເປັນການເຄື່ອນໄຫວທີ່ສຳຄັນເພື່ອພັດທະນາການຕ່າງປະເທດຕໍ່ປະເທດອ້ອມຂ້າງ ແລະເປັນການສ່ອງແສງໃຫ້ເຫັນທັດສະນະຄະຕິ ທີ່ວ່າ "ເປັນມິດຕໍ່ກັນ, ມີຄວາມຈິງໃຈຕໍ່ກັນ, ອະນຸເຄາະຕໍ່ກັນ ແລະ ໂອບອ້ອມອາລີ" ເປັນຢ່າງດີ.
ທ່ານວິຈິດຍັງໄດ້ຕີລາຄາສູງຕໍ່ຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ"ໂດຍຢືນຢັນວ່າ: ການກໍ່ສ້າງ "ໜຶ່ງແລວທາງໜຶ່ງເສັ້ນທາງ"ຈະນຳເອົາພະລັງຊຸກດັນແລະໂອກາດໄປໃຫ້ບັນດາປະເທດລຽບຕາມ "ໜຶ່ງແລວທາງໜຶ່ງເສັ້ນທາງ" ທັງການກໍ່ສ້າງພື້ນຖານໂຄງລ່າງ,ການພັດທະນາເສດຖະກິດແລະຄວາມກ້າວໜ້າດ້ານວັດທະນະທຳ ທັງສ່ອງແສງໃຫ້ເຫັນເຖິງຄວາມຈິງໃຈຂອງຈີນຕໍ່ປະເທດອື່ນ ແລະການພັດທະນາຂອງຈີນໄດ້ສ້າງຜົນປະໂຫຍດໃຫ້ແກ່ປະເທດເພື່ອນບ້ານໃກ້ຄຽງ. ລາວ-ຈີນໄດ້ສ້າງແຜນຍຸດທະສາດໂດຍອີງຕາມຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ແລະກຳລັງພະຍາຍາມໃນດ້ານນີ້, ສອງຝ່າຍໄດ້ຮັບຜົນສຳເລັດຫຼາຍດ້ານໃນການຮ່ວມມືກ່ຽວກັບ "ໜຶ່ງແລວທາງໜຶ່ງເສັ້ນທາງ", ໃນນີ້ ຜົນງານສຳຄັນທີ່ສຸດກໍຄືໂຄງການທາງລົດໄຟຈີນລາວແລະໂຄງການດາວທຽມ.
ຊຸມປີມໍ່ໆມານີ້, ເສດຖະກິດລາວໄດ້ພັດທະນາຢ່າງວ່ອງໄວ, ແຕ່ພື້ນຖານໂຄງລ່າງຄົມມະນາຄົມທີ່ຫຼ້າຫຼັງໄດ້ຂັດຂວາງການພັດທະນາເສດຖະກິດຂອງລາວຢ່າງໜັກໜ່ວງ. ທ່ານວິຈິດກ່າວວ່າ: ລາວມີຊັບພະຍາກອນອຸດົມສົມບູນ, ແຕ່ສິ່ງທ້າທາຍໃຫຍ່ທີ່ສຸດບໍ່ແມ່ນການຂາດເຂີນຜະລິດຕະພັນ, ຫາກແມ່ນຄວາມຫຍຸ້ງຍາກໃນການຂົນສົ່ງສິນຄ້າທີ່ຜະລິດອອກມານັ້ນໄປຕ່າງປະເທດ. ສະນັ້ນ, ການເຊື່ອມຕໍ່ພື້ນຖານໂຄງລ່າງກັບຈີນຈະເປັນຜົນດີຕໍ່ການແກ້ໄຂບັນຫາດ້ານຄົມມະນາຄົມທີ່ເປັນສິ່ງຂັດຂວາງການພັດທະນາເສດຖະກິດລາວ ແລະການພົວພັນສອງປະເທດກໍຈະຂະຫຍາຍຕົວກ້າວຂຶ້ນສູ່ລະດັບໃໝ່.
