ເນື່ອງໃນໂອກາດວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວຄົບຮອບ 42 ປີ, ສະຫາຍ ສີ ຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ ປະທານປະເທດ ແຫ່ງ ສາທາລະນະລັດ ປະຊາຊົນຈີນໄດ້ສົ່ງໂທລະເລກຊົມເຊີຍໄປສູ່ສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະຊາຊົນປະຕິວັດລາວ, ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ.
ເນື້ອໃນສານລະບຸວ່າ:ເນື່ອງໃນໂອກາດວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວຄົບຮອບ 42 ປີ, ຂ້າພະເຈົ້າຂໍຕາງໜ້າພັກກອມມູນິດຈີນ, ປະຊາຊົນຈີນ ແລະ ໃນນາມສ່ວນຕົວ ຂໍສະແດງຄວາມຊົມເຊີຍຢ່າງສຸດອົກສຸດໃຈມາຍັງສະຫາຍ ແລະ ໂດຍຜ່ານສະຫາຍໄປຍັງ ພັກປະຊາຊົນປະຕິວັດລາວ ແລະປະຊາຊົນລາວອ້າຍນ້ອງ.
ໃນ 1 ປີຜ່ານມາ, ປະເທດລາວມີຄວາມໝັ້ນຄົງດ້ານການເມືອງແລະສັງຄົມມີຄວາມສະຫງົບ, ເສດຖະກິດພັດທະນາຢ່າງຕໍ່ເນື່ອງ, ຊີວິດການເປັນຢູ່ຂອງປະຊາຊົນສືບຕໍ່ໄດ້ຮັບການປັບປຸງດີຂຶ້ນ ແລະ ບົດບາດໃນສາກົນຂອງປະເທດລາວນັບມື້ສູງຂຶ້ນ. ໃນຖານະເປັນສະຫາຍແລະເພື່ອນມິດ, ຂ້າພະເຈົ້າຮູ້ສຶກປິຕິຍິນດີເປັນຢ່າງຍິ່ງຕໍ່ຜົນງານດັ່ງກ່າວ ແລະ ເຊື່ອໝັ້ນວ່າ, ພາຍໃຕ້ການນຳພາຂອງສູນກາງພັກປະຊາຊົນປະຕິວັດລາວ ທີ່ມີສະຫາຍເລຂາທິການໃຫຍ່ບຸນຍັງ ວໍລິຈິດເປັນຜູ້ນຳພານັ້ນ, ປະຊາຊົນລາວຈະປະສົບຜົນສຳເລັດຕາມເປົ້າໝາຍທີ່ກອງປະຊຸມໃຫຍ່ຄັ້ງທີ 10 ຂອງພັກວາງອອກ ແລະ ຍາດໄດ້ຜົນສຳເລັດໃໝ່ໃຫຍ່ຫຼວງກວ່າເກົ່າ ໃນພາລະກິດແຫ່ງການສ້າງສາປະເທດຊາດ.
ສາຍພົວພັນຈີນ-ລາວສືບຕໍ່ຮັກສາທ່າອ່ຽງພັດທະນາດີງາມໃນປີຜ່ານມາ. ການນຳຂັ້ນສູງທັງສອງປະເທດໄດ້ຜັດປ່ຽນກັນຢ້ຽມຢາມເປັນປະຈຳ, ຍຸດທະສາດການພັດທະນາໄດ້ເຊື່ອມໂຍງກັນຕາມປົກກະຕິ, ການຮ່ວມມືໃນໂຄງການໃຫຍ່ດຳເນີນໄປເປັນຢ່າງດີ, ການແລກປ່ຽນລະຫວ່າງປະຊາຊົນແລະວັດທະນະທຳສອງຊາດໄດ້ເຂົ້າສູ່ລວງເລິກ ເຊິ່ງໄດ້ນຳເອົາຜົນປະໂຫຍດຕົວຈິງມາສູ່ທັງສອງປະເທດ ແລະ ປະຊາຊົນສອງຊາດຈີນ-ລາວ. ຂ້າພະເຈົ້າຍິນດີຮ່ວມກັບສະຫາຍສຸມທຸກຄວາມພະຍາຍາມພ້ອມກັນ ເພື່ອສົ່ງເສີມການສ້າງຄູ່ຮ່ວມຊາຕະກຳທີ່ມີຄວາມໝາຍຍຸດທະສາດຂອງສອງປະເທດຈີນ-ລາວ.
ຂໍອວຍພອນໃຫ້ສາທາລະນະລັດປະຊາທິປະໄຕປະຊາຊົນລາວ ຈົ່ງຈະເລີນຮຸ່ງເຮືອງ, ປະຊາຊົນລາວຈົ່ງມີຄວາມຜາສຸກ.
ຂໍອວຍພອນສາຍພົວພັນຄູ່ຮ່ວມຍຸດທະສາດຮອບດ້ານລະຫວ່າງສອງປະເທດຈີນ-ລາວ ຈົ່ງຮັດແໜ້ນແລະພັດທະນາຢ່າງບໍ່ຢຸດຢັ້ງ.
ນອກນີ້, ທ່ານຫຼີເຄີ້ສຽງ ນາຍົກລັດຖະມົນຕີແຫ່ງສາທາລະນະລັດປະຊາຊົນຈີນ, ທ່ານຈ່າງເຕີຈ່ຽງ ປະທານຄະນະປະຈຳສະພາຜູ້ແທນປະຊາຊົນທົ່ວປະເທດ ສາທາລະນະລັດປະຊາຊົນຈີນ ແລະ ທ່ານ ວັງຢິ້ ລັດຖະມົນຕີກະຊວງການຕ່າງປະເທດ ແຫ່ງສາທາລະນະລັດປະຊາຊົນຈີນຕ່າງໄດ້ສົ່ງໂທລະເລກຊົມເຊີຍໄປສູ່ທ່ານທອງລຸນ ສີສຸລິດ ນາຍົກລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ທ່ານນາງ ປານີ ຢາທໍ່ຕູ້ ປະທານສະພາແຫ່ງຊາດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ທ່ານ ສະເຫລີມໄຊ ກົມມະສິດ ລັດຖະມົນຕີ ກະຊວງການຕ່າງປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ
