ກອງປະຊຸມສົນທະນາຂັ້ນສູງລະຫວ່າງພັກກອມມູນິດຈີນກັບພັກການເມືອງໂລກທີ່ຈັດຂຶ້ນຢູ່ນະຄອນຫຼວງປັກກິ່ງໄດ້ອັດລົງໃນວັນທີ 3 ທັນວານີ້ ດ້ວຍການຮັບຮອງ "ຂໍ້ລິເລີ່ມປັກກິ່ງ" ໂດຍເນັ້ນວ່າ: ລະຫວ່າງພັກການເມືອງຄວນເພີ່ມທະວີຄວາມໄວ້ເນື້ອເຊື່ອໃຈກັນ, ເພີ່ມທະວີການຕິດຕໍ່ພົວພັນກັນ, ເຮັດໃຫ້ການປະສານງານສະໜິດແໜ້ນກວ່າເກົ່າ, ຊອກຄົ້ນການສ້າງການພົວພັນລະຫວ່າງພັກການເມືອງແບບໃໝ່ທີ່ສະແຫວງຫາອັນທີ່ຄືກັນ, ສະຫງວນສິ່ງທີ່ຕ່າງກັນ, ເຄົາລົບນັບຖືເຊິ່ງກັນແລະກັນ ແລະຖອດຖອນບົດຮຽນເຊິ່ງກັນແລະກັນ ບົນພື້ນຖານການພົວພັນສາກົນແບບໃໝ່, ເຕົ້າໂຮມກຳລັງອັນແຂງແຮງໃນການສ້າງປະຊາຄົມຮ່ວມຊາຕາກຳຂອງມະນຸດ.
ກອງປະຊຸມສົນທະນາຂັ້ນສູງລະຫວ່າງພັກກອມມູນິດຈີນກັບພັກການເມືອງໂລກແມ່ນກິດຈະກຳການຕ່າງປະເທດຫຼາຍຝ່າຍຄັ້ງທຳອິດທີ່ຈີນຈັດຂຶ້ນຫຼັງກອງປະຊຸມໃຫຍ່ພັກກອມມູນິດຈີນຄັ້ງທີ 19 ໂດຍມີຜູ້ນຳຂອງເກືອບ 300 ພັກການເມືອງແລະອົງການຈັດຕັ້ງການເມືອງຈາກ 120 ກວ່າປະເທດເຂົ້າຮ່ວມ ແລະກໍແມ່ນກອງປະຊຸມສົນທະນາຂັ້ນສູງທີ່ພັກກອມມູນິດຈີນຈັດຂຶ້ນກັບພັກການເມືອງປະເພດຕ່າງໆໃນໂລກເປັນຄັ້ງທຳອິດ.
 |
