ວັນທີ 4 ທັນວານີ້, ອົງການສະຫະປະຊາຊາດໄດ້ຈັດກອງປະຊຸມດ້ານສິ່ງແວດລ້ອມຄັ້ງທີ 3 ຢູ່ນະຄອນຫຼວງແນໂລປີປະເທດເກນຢາ ໂດຍມີຜູ້ນຳຈາກວົງການການເມືອງ, ການຄ້າ ແລະອົງການຈັດຕັ້ງສັງຄົມກວ່າ 4000 ຄົນເຂົ້າຮ່ວມ ແລະກອງປະຊຸມທີ່ຈະດຳເນີນເປັນເວລາ 3 ມື້ນັ້ນຈະປຶກສາຫາລືເຖິງມາດຕະການຕ້ານມົນລະພິດ.
ກອງປະຊຸມຈະສຸມໃສ່ຫາລືໃນຫົວຂໍ້ການ "ສ້າງໂລກບໍ່ມີມົນລະພິດ" ເຊິ່ງຈະຮ່ວມກັບລັດຖະບານ, ວິສາຫະກິດ, ອົງການຈັດຕັ້ງສັງຄົມ ແລະປະຊາຊົນ ເພື່ອຕ້ານບັນຫາມົນລະພິດ. ນອກຈາກນີ້, ກອງປະຊຸມຈະອອກມະຕິເພື່ອຮັບມືກັບສິ່ງທ້າທາຍດ້ານສິ່ງແວດລ້ອມຢ່າງຮີບດ່ວນ.
ທ່ານເອດກາ ກຸຍເຕຍເຣດ ລັດຖະມົນຕີກະຊວງສິ່ງແວດລ້ອມ ແລະພະລັງງານກອສຕາລີກາ, ປະທານກອງປະຊຸມດັ່ງກ່າວຊີ້ໃຫ້ເຫັນວ່າ: ເປົ້າໝາຍຂອງຄວາມເປັນເອກະພາບກັນຄືນຳໃຊ້ມາດຕະການທີ່ມີປະສິດທິຜົນເພື່ອຫຼຸດຜ່ອນມົນລະພິດ. ທັງນີ້ຖ້າພະຍາຍາມຮ່ວມກັນ ຈຶ່ງຈະສາມາດເຮັດໃຫ້ໂລກປອດມົນລະພິດ ແລະສາມາດຊ່ວຍຊີວິດຂອງມວນມະນຸດໄດ້.
 |
