ໃນການຖະແຫຼງຂ່າວທີ່ຈັດຂຶ້ນຢູ່ປັກກິ່ງໃນວັນທີ 6 ທັນວານີ້, ທ່ານ ເກີງສວງ ໂຄສົກກະຊວງການຕ່າງປະເທດຈີນໄດ້ຊີ້ແຈງກ່ຽວກັບກໍລະນີເຮືອປະມົງຈີນຖືກອິນໂດເນເຊຍກັກໄວ້ໃນຫວ່າງມໍ່ໆນີ້.
ມີນັກຂ່າວຖາມໂດຍອ້າງຕາມແຫຼ່ງຂ່າວແຈ້ງວ່າ: ຫວ່າງມໍ່ໆມານີ້, ກະຊວງການປະມົງແລະວຽກງານທາງທະເລອິນໂດເນເຊຍໄດ້ກັກເຮືອປະມົງ ຈີນລຳໜຶ່ງໄວ້ພ້ອມທັງໄດ້ຈັບຊາວປະມົງຢູ່ເຮືອ 21 ຄົນ. ຫຼັງພົບເຮືອປະມົງ ຈີນໄດ້ເຄື່ອນໄຫວຢ່າງຜິດກົດໝາຍຢູ່ເຂດທະເລທີ່ກ່ຽວຂ້ອງຂອງອິນໂດເນເຊຍ. ເລື່ອງນີ້ ຈີນມີຂໍ້ມູນທີ່ກ່ຽວຂ້ອງຫຼືບໍ່?
ທ່ານ ເກີງສວງ ກ່າວໃນເລື່ອງນີ້ວ່າ: ກ່ຽວກັບເຫດການທີ່ທ່ານຖາມນັ້ນ, ພາກສ່ວນທີ່ກ່ຽວຂ້ອງຂອງຈີນພວມດຳເນີນການແກ້ໄຂ. ຕາມຂ້າພະເຈົ້າໄດ້ຊາບ, ເຮືອປະມົງລຳດັ່ງກ່າວໄດ້ເຄື່ອນໄຫວຢູ່ເຂດທະເລທີ່ກ່ຽວຂ້ອງໂດຍໄດ້ຮັບອະນຸມັດຈາກລັດຖະບານຕີມໍ ເລສເຕແລ້ວ. ພວກຂ້າພະເຈົ້າໄດ້ຕິດຕໍ່ພົວພັນກັບອິນໂດເນເຊຍແລະຕີມໍ ເລສເຕໂດຍຜ່ານຊ່ອງທາງການຕ່າງປະເທດ ແລະຊຸກຍູ້ໃຫ້ແກ້ໄຂເຫດການດັ່ງກ່າວຢ່າງເໝາະສົມ ເພື່ອໃຫ້ຊາວປະມົງຈີນໄດ້ຮັບການປ່ອຍຕົວໂດຍໄວເທົ່າທີ່ຈະໄວໄດ້.