ຕາມຂ່າວ CRI: ງານຮ້ອງເພງມິດຕະພາບຈີນ-ອາຊຽນ 2017 ຈະຈັດຂຶ້ນດຢູ່ນະຄອນເຈິ້ງໂຈ່ວເທດສະບານແຂວງເຫີນານ ສປ ຈີນໃນວັນທີ 8 ທັນວານີ້ໂດຍການເປັນເຈົ້າພາບຮ່ວມຂອງວິທະຍຸສາກົນແຫ່ງປະເທດຈີນຫຼື CRI ແລະສະຖານີວິທະຍຸໂທລະພາບເຈິ້ງໂຈ່ວ, ແລະມີນັກຮ້ອງ 13 ຄົນຈາກຈີນແລະ 10 ປະເທດອາຊຽນຈະຮ້ອງເພງຮ່ວມກັນ.
ນັກຮ້ອງອາຊຽນທີ່ຈະເຂົ້າຮ່ວມງານຮ້ອງເພງຄັ້ງນີ້ປະກອບມີ: ທ້າວ Alilah ນັກຮ້ອງບຣູໄນ, ທ້າວ Chhorn Sovannareach ນັກຮ້ອງກຳປູເຈຍ, ທ້າວ Petra Sihombing ນັກຮ້ອງອິນໂດເນເຊຍ, ທ້າວອະທິສັກ ຣັດຕະນະວົງ ນັກຮ້ອງລາວ, ນາງ Shila Mmzah ນັກຮ້ອງມາເລເຊຍ, ນາງ PoPo ນັກຮ້ອງມຽນມາ, ທ້າວ Christian Bautista ນັກຮ້ອງຟີລິບປິນ, ນາງ TAN TZE KIA ນັກຮ້ອງສິງກະໂປ, ນາງ ກອນພະສອນ ດວຍຊຽນກລາວ ນັກຮ້ອງໄທ, ນາງ ໂດທິແທ໋ງຮວາ ນັກຮ້ອງຫວຽດນາມ. ໂດຍນັກຮ້ອງເຫຼົ່ານີ້ລ້ວນແຕ່ມີແຟນເພງຢ່າງຫຼວງຫຼາຍໃນປະເທດຕົນ. ສ່ວນນັກຮ້ອງຂອງຈີນກໍປະກອບມີທ້າວຫຼຽນຊູ້, ນາງເສີງຊີແລະທ້າວຈ່າງຈ້ຽນຊຸນ.
ນັກຮ້ອງຈີນແລະອາຊຽນຈະຮ້ອງເພງດັງທີ່ສະແດງໃຫ້ເຫັນຄວາມເປັນເອກະລັກຂອງປະເທດຕົນໃນງານຮ້ອງເພງມິດຕະພາບຈີນ-ອາຊຽນ. ສຳລັບທ້າວອະທິສັກ ຣັດຕະນະວົງ ນັກຮ້ອງລາວເຈົ້າຂອງຜົນງານເພງ "ໜຶ່ງແລວທາງໜຶ່ງເສັ້ນທາງ" ເຊິ່ງເປັນເພງຣ໊ອກລາວທີ່ມີຊື່ສຽງແລະໄດ້ຮັບຄວາມການຍ້ອງຍໍຊົມເຊີຍຈາກທ່ານສີຈິ້ນຜິງ ປະທານປະເທດຈີນ.
 |
