ການເຈລະຈາສັນຕິພາບກ່ຽວກັບບັນຫາຊີຣີຮອບທີ 8 ໂດຍການເປັນປະທານຂອງອົງການສະຫະປະຊາຊາດນັ້ນໄດ້ສືບຕໍ່ ຢູ່ເຊີແນວແຫ່ງສວິສແລະໃນວັນທີ 7 ພະຈິກຜ່ານມາ, ທ່ານສະຕາຟານ ເດ ມີສທູຣາ ທູດພິເສດບັນຫາຊີຣີຂອງເລຂາທິການໃຫຍ່ອົງການສະຫະປະຊາຊາດໄດ້ຖະແຫຼງຕໍ່ສື່ມວນຊົນຢູ່ເຊີແນວ ເພື່ອແຈ້ງສະພາບຄວາມຄືບໜ້າຫຼ້າສຸດຂອງການເຈລະຈາສັນຕິພາບ.
ທ່ານສະຕາຟານ ເດ ມີສທູຣາກ່າວວ່າ: ຫຼັງການເຈລະຈາສັນຕິພາບກ່ຽວກັບບັນຫາຊີຣີຮອບທີ 8 ທີ່ຈັດຂຶ້ນມາແຕ່ວັນທີ 28 ພະຈິກຜ່ານມາໄດ້ໂຈະປະຊຸມເປັນໄລຍະສັ້ນແລ້ວ ກໍໄດ້ຈັດຂຶ້ນຄືນໃໝ່ໃນວັນທີ 5 ທັນວານີ້ ເຊິ່ງສອງມື້ຜ່ານມາ, ຕົນໄດ້ເຈລະຈາກັບຄະນະຜູ້ແທນຝ່າຍຄ້ານຊີຣີເປັນຕົ້ນຕໍ ແລະປັດຈຸບັນ, ຄະນະຜູ້ແທນເຈລະຈາຂອງລັດຖະບານຊີຣີໄດ້ຢືນຢັນແລ້ວວ່າຈະກັບຄືນມາເຊີແນວເພື່ອຮ່ວມເຈລະຈາໃນວັນທີ 10 ທັນວານີ້. ຂະນະດຽວກັນ,ພວກຂ້າພະເຈົ້າໄດ້ກ່າວເນັ້ນອີກເທື່ອໃໝ່ວ່າ ຫວັງໃຫ້ສອງຝ່າຍຕັ້ງໃຈເຈລະຈາ ກ່ຽວກັບວາລະ "4 ບັນຫາ" ບົນພື້ນຖານ 12 ຫຼັກການ ໂດຍສະເພາະ ເຈລະຈາກ່ຽວກັບ ວາລະ "2 ບັນຫາ"ທີ່ພວກຂ້າພະເຈົ້າໄດ້ປະກາດຢູ່ສະພາຄວາມໝັ້ນຄົງຄື ການດັດແກ້ລັດຖະທຳມະນູນແລະການຈັດການເລືອກຕັ້ງພາຍໃຕ້ການຕິດຕາມກວດກາຂອງອົງການສະຫະປະຊາຊາດ.
ທ່ານເດ ມີສທູຣາຢືນຢັນວ່າ ຕົນຫວັງໃຫ້ຄະນະຜູ້ແທນລັດຖະບານຊີຣີກັບຄືນເຊີແນວເພື່ອຮ່ວມເຈລະຈາ ທັງຫວັງໃຫ້ສອງຝ່າຍຢູ່ຊີຣີເຈລະຈາກັນແບບບໍ່ມີເງື່ອນໄຂ.
 |
