ຕາມຂ່າວCRI: ກອງປະຊຸມລັດຖະມົນຕີການຕ່າງປະເທດຄັ້ງທີ 3 ຂອບການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງຈະຈັດຂຶ້ນຢູ່ແຂວງຢຸນນານໃນວັນທີ 15 ທັນວານີ້. ແລະໃນໂອກາດດັ່ງກ່າວ, ທ່ານ ເກີງສວງ ໂຄສົກກະຊວງການຕ່າງປະເທດຈີນໄດ້ກ່າວຢູ່ປັກກິ່ງໃນວັນທີ 7 ທັນວານີ້ວ່າ: ໃນຖານະເປັນປະເທດໃກ້ຄຽງທີ່ມີໄມຕີຈິດມິດຕະພາບແລະເພື່ອນມິດທີ່ຈິງໃຈຂອງ 5 ປະເທດລຸ່ມແມ່ນ້ຳຂອງ, ຈີນຈະຍຶດໝັ້ນທັດສະນະການເປັນມິດຕໍ່ກັນ, ມີຄວາມຈິງໃຈຕໍ່ກັນ, ອະນຸເຄາະຕໍ່ກັນ ແລະ ໂອບອ້ອມອາລີແລະທິດທາງການຕ່າງປະເທດກັບປະເທດອ້ອມຂ້າງທີ່ເປັນມິດກັບປະເທດໃກ້ຄຽງ ແລະ ຖືປະເທດໃກ້ຄຽງເປັນເພື່ອນມິດເປັນ, ຮ່ວມກັບປະເທດລຸ່ມແມ່ນ້ຳຂອງ ພະຍາຍາມຊຸກຍູ້ການສ້າງປະຊາຄົມຮ່ວມຊາຕາກຳປະເທດແມ່ນ້ຳລ້ານຊ້າງ-ແມ່ນ້ຳຂອງ ພ້ອມທັງສ້າງໃຫ້ເປັນໂຕແບບທົດລອງຂອງການສ້າງປະຊາຄົມຮ່ວມຊາຕາກຳມວນມະນຸດ.
ຂ່າວແຈ້ງວ່າ: ທ່ານ ວາງຢີ້ ລັດຖະມົນຕີກະຊວງການຕ່າງປະເທດຈີນ ແລະ ທ່ານ ປຣັກ ໂຊຄອນ ລັດຖະມົນຕີກະຊວງການຕ່າງປະເທດແລະການຮ່ວມມືສາກົນກຳປູເຈຍຈະເປັນປະທານຮ່ວມ ໂດຍເຈົ້າໜ້າທີ່ອາວຸໂສຈາກລາວ,ມຽນມາ,ໄທ,ຫວຽດນາມແລະປະເທດອື່ນໆເຂົ້າຮ່ວມ. ໃນການຖະແຫຼງຂ່າວທີ່ຈັດຂຶ້ນໃນມື້ດັ່ງກ່າວ, ທ່ານ ເກີງສວງ ກ່າວວ່າ: ຈີນຫວັງເຫັນຜົນສຳເລັດຂອງກອງປະຊຸມຄັ້ງນີ້ເປັນຕົ້ນ:"ໜຶ່ງແມ່ນທົບທວນຄືນຄວາມຄືບໜ້າຂອງການຮ່ວມມື,ເພີ່ມທະວີຜົນງານການຮ່ວມມືໃຫ້ດີຂຶ້ນ; ສອງແມ່ນສະຫຼຸບບົດຮຽນການຮ່ວມມື; ສາມແມ່ນລົງເລິກແລກປ່ຽນຄວາມຄິດຄວາມເຫັນກ່ຽວກັບທິດທາງແຫ່ງການພັດທະນາໃນອະນາຄົດຂອງການຮ່ວມມືແມ່ນ້ຳລ້ານຊ້າງແມ່ນ້ຳຂອງ,ພະຍາຍາມຮັກສາທ່າອ່ຽງແຫ່ງການຮ່ວມມື,ເປີດກວ້າງຂົງເຂດການຮ່ວມມືຢ່າງບໍ່ຢຸດຢັ້ງ,ສຸມໃສ່ສ້າງຈຸດພົ້ນເດັ່ນຂອງການຮ່ວມມື ເພື່ອກະກຽມໃຫ້ແກ່ກອງປະຊຸມຜູ້ນຳຄັ້ງທີ 2 ໃນປີໜ້າ."
 |
