ຕາມຂ່າວສານຊິ່ນຮວາ: ວັນທີ 8 ທັນວານີ້, ສ.ປ.ປ ເກົາຫຼີເປີດເຜີຍວ່າ, ອາເມລິກາເຈຕະນາຢາກດຳເນີນການປິດລ້ອມທາງທະເລຕໍ່ສ.ປ.ປເກົາຫຼີ, ນີ້ແມ່ນການເຄື່ອນໄຫວສົງຄາມ, ຖ້າສ.ປ.ປ ເກົາຫຼີປະກົດເຫັນວ່າ, ອາເມລິກາມີການກະທຳທີ່ຈະປິດລ້ອມສ.ປ.ປເກົາຫຼີທາງທະເລແທ້, ຈະປະຕິບັດມາດຕະການລັກສະນະປ້ອງກັນຕົວເອງໃນທັນທີເພື່ອເປັນການຕອບໂຕ້ຄືນ.
ມື້ດຽວກັນ, ຂ່າວສານສູນກາງສ.ປ.ປເກົາຫຼີພິມບົດຄວາມລົງນາມ ໂດຍກ່າວວ່າ, ໄລຍະມໍ່ໆມານີ້, ກະຊວງການຕ່າງປະເທດແລະເຈົ້າໜ້າທີ່ຂັ້ນສູງຂອງທຳນຽບຂາວອາເມລິກາພາກັນກ່າວວ່າ, ຈະດຳເນີນການປິດລ້ອມທາງທະເລຕໍ່ສ.ປ.ປເກົາຫຼີ, ເລື່ອງນີ້ແມ່ນການລ່ວງລ້ຳຢ່າງປ່າເຖື່ອນຕໍ່ປະເທດທີ່ມີອະທິປະໄຕ, ແມ່ນຮັບເອົາບໍ່ໄດ້ຢ່າງເດັດຂາດ.
ບົດຄວາມຂຽນວ່າ, ມະຕິເລກທີ 3314 ຂອງສະມັດຊາໃຫຍ່ສະຫະປະຊາຊາດກຳນົດວ່າ, ການດຳເນີນການຂວ້ຳບາດລັກສະນະປິດລ້ອມປະເທດທີ່ມີອະທິປະໄຕໃນໄລຍະສັນຕິພາບ ແມ່ນຜິດກົດໝາຍ.
ບົດຄວາມຊີ້ອອກວ່າ, ອາເມລິກາມີເຈຕະນາຢາກປິດລ້ອມສ.ປ.ປເກົາຫຼີທາງທະເລ, ຈະເຮັດໃຫ້ສະຖານະການແຫຼມເກົາຫຼີຕົກຢູ່ໃນວິກິດການທີ່ "ຄວບຄຸມບໍ່ໄດ້" ແລະ ອາດຈະເກີດສົງຄາມໃນທຸກເວລາໄດ້. ອາເມລິກາຄວນພິຈາລະນາຜົນຮ້າຍຢ້ອນຫຼັງທີ່ອາດຈະກາຍເປັນໄພພິບັດໄດ້ຂອງເລື່ອງນີ້, ຢຸດເຊົາການເຄື່ອນໄຫວທີ່ໄຮ້ຄວາມໝາຍຕ່າງໆ.
 |
