ວັນທີ 8 ທັນວານີ້, ໃນກອງປະຊຸມຂ່າວທີ່ຈັດຂຶ້ນຢູ່ນະຄອນຫຼວງປັກກິ່ງ, ທ່ານເກິງສວງ ໂຄສົກກະຊວງການຕ່າງປະເທດຈີນກ່າວວ່າ, ພວກເຮົາຍິນດີຕ້ອນຮັບຝ່າຍຕ່າງໆ ເຊິ່ງລວມທັງຣັດເຊຍທຳຄວາມພະຍາຍາມເພື່ອຊຸກຍູ້ໃຫ້ບັນຫານິວເຄຼຍແຫຼມເກົາຫຼີກັບຄືນສູ່ການແກ້ໄຂບັນຫາດ້ວຍການເຈລະຈາໂດຍສັນຕິໂດຍໄວ.
ມີນັກຂ່າວຖາມວ່າ, ຕາມຂ່າວແຈ້ງວ່າ, ວັນທີ 7 ທັນວານີ້, ທ່ານເຊີເກ ລັຟລົຟ ລັດຖະມົນຕີກະຊວງການຕ່າງປະເທດຣັດເຊຍໄດ້ສະແດງປາຖະໜາຂອງສ.ປ.ປເກົາຫຼີທີ່ຢາກເຈລະຈາກັບອາເມລິກາໂດຍກົງຕໍ່ທ່ານເຣກສ໌ ທິເລິຊັນ ລັດຖະມົນຕີກະຊວງການຕ່າງປະເທດອາເມລິກາ, ສ.ປ.ປເກົາຫຼີຫວັງຢາກດຳເນີນການເຈລະຈາກ່ຽວກັບການຮັບປະກັນຄວາມປອດໄພຂອງຕົນ, ຣັດເຊຍຍິນດີຊຸກຍູ້ການເຈລະຈາທີ່ກ່ຽວຂ້ອງ. ຝ່າຍຈີນມີຄວາມເຫັນແນວໃດຕໍ່ເລື່ອງນີ້?
ທ່ານເກິງສວງຕອບວ່າ, ພວກເຮົາຍິນດີຕ້ອນຮັບຝ່າຍຕ່າງໆ ເຊິ່ງລວມທັງຣັດເຊຍທຳຄວາມພະຍາຍາມເພື່ອຊຸກຍູ້ໃຫ້ບັນຫານິວເຄຼຍແຫຼມເກົາຫຼີກັບຄືນສູ່ການແກ້ໄຂບັນຫາດ້ວຍການເຈລະຈາໂດຍສັນຕິໂດຍໄວ. ພວກຂ້າພະເຈົ້າກ່າວຢ້ຳມາໂດຍຕະຫຼອດວ່າ, ທາດແທ້ແຫ່ງບັນຫານິວເຄຼຍແຫຼມເກົາຫຼີແມ່ນບັນຫາຄວາມປອດໄພ, ໃຈກາງແມ່ນຄວາມຂັດແຍ່ງກັນລະຫວ່າງສ.ປ.ປເກົາຫຼີກັບອາເມລິກາ. ໃນຖານະເປັນຝ່າຍກ່ຽວຂ້ອງໂດຍກົງຂອງບັນຫານິວເຄຼຍແຫຼມເກົາຫຼີ, ສ.ປ.ປເກົາຫຼີກັບອາເມລິກາຄວນຕິດຕໍ່ພົວພັນກັນ, ແກ້ໄຂບັນຫາທີ່ກ່ຽວຂ້ອງໂດຍຜ່ານການເຈລະຈາ. ຈີນກໍ່ໄດ້ທຳຄວາມພະຍາຍາມເພື່ອເລື່ອງນີ້ມາໂດຍຕະຫຼອດ.
 |
