ສະພາຄວາມໝັ້ນຄົງອົງການສະຫະປະຊາຊາດໄດ້ຈັດກອງປະຊຸມວິສາມັນໃນວັນທີ 8 ທັນວານີ້, ເພື່ອປຶກສາຫາລືບັນຫາທີ່ທ່ານໂດນັນ ທຣຳ ປະທານາທິບໍດີອາເມລິກາປະກາດຮັບຮອງເຢລູຊາແລມເປັນນະຄອນຫຼວງຂອງອິດສະຣາແອນໃນຫວ່າງມໍ່ໆມານີ້. ກອງປະຊຸມໄດ້ຮັບຟັງການແຈ້ງສະພາບການຈາກທ່ານນິໂຄຣາ ມະລາເດນົຟ ຜູ້ໄກ່ເກ່ຍພິເສດຂະບວນການສັນຕິພາບຕາເວັນອອກກາງຂອງອົງການສະຫະປະຊາຊາດວ່າ, ການຕົກລົງແຕ່ຝ່າຍດຽວເຊິ່ງບໍ່ວ່າຜ່າຍໃດໆກໍຕາມທີ່ເຈຕະນາປ່ຽນແປງຖານະແລະລັກສະນະຂອງເຢລູຊາແລມລ້ວນແຕ່ອາດຈະເປັນການທຳລາຍຄວາມພະຍາຍາມເພື່ອສັນຕິພາບໃນປັດຈຸບັນຢ່າງໜັກໜ່ວງ, ສະຖານະການພາກພື້ນມີ "ຄວາມສ່ຽງແຝງຊ້ອນທີ່ໃຊ້ກຳລັງຮຸນແຮງຫຼາຍຂຶ້ນ".
ນອກຈາກອາເມລິກາແລ້ວ, ອີກ 4 ປະເທດສະມາຊິກຖາວອນແລະ 10 ປະເທດສະມາຊິກບໍ່ຖາວອນຂອງສະພາຄວາມໝັ້ນຄົງອົງການສະຫະປະຊາຊາດລ້ວນແຕ່ສະແດງຄວາມບໍ່ພໍໃຈຫຼືຄວາມເສຍໃຈຕໍ່ການກະທຳຂອງອາເມລິກາ, ແລະສະແດງຄວາມເປັນຫ່ວງຕໍ່ສະຖານະການເຂດຕາເວັນອອກກາງເຄັ່ງຕຶງຂຶ້ນຕື່ມ. ນອກນີ້, ຜູ້ຕາງໜ້າຂອງ ຊູແອັດ, ເອຢິບ, ໂບລີວີ, ເອທິໂອບີ, ອີຕາລີ, ຍີ່ປຸ່ນ, ກາຊັກສະຖານ, ເຊເນການ, ອູແກຣນ, ອູຣູໄກວກໍສະແດງຄວາມບໍ່ພໍໃຈຫຼືຄວາມເສຍໃຈຂະນະປະກອບຄຳເຫັນ.
ພາຍຫຼັງອິສຣາແອນຍຶດເອົາເຢລູຊາແລມຕາເວັນອອກເມື່ອປີ 1967 ແລ້ວກໍປະກາດແຕ່ຝ່າຍດຽວວ່າເຢລູຊາແລມແມ່ນ "ນະຄອນຫຼວງຖາວອນຂອງປະເທດຕົນທີ່ແຍກອອກບໍ່ໄດ້", ແຕ່ວ່າປະຊາຄົມໂລກໂດຍທົ່ວໄປແລ້ວບໍ່ຮັບຮອງອິສຣາແອນມີສິດອະທິປະໄຕເໜືອເຢລູຊາແລມ.
 |
