ກອງປະຊຸມສະຖາບັນຂົງຈື້ທົ່ວໂລກຄັ້ງທີ 12 ໃນຫົວຂໍ້ "ການຮ່ວມມືກັບການປະດິດສ້າງເພື່ອສ້າງປະຊາຄົມຮ່ວມຊາຕາກຳມວນມະນຸດ"ໄດ້ຈັດຂຶ້ນຢູ່ເມືອງຊີ່ອ່ານ ແຂວງສ້ານຊີ່ ສປ ຈີນໃນວັນທີ 12 ທັນວານີ້, ທ່ານນາງລິວຢຽນຕຸ່ງ ຮອງນາຍົກລັດຖະມົນຕີຈີນ, ປະທານຄະນະມົນຕີສຳນັກງານໃຫຍ່ສະຖາບັນຂົງຈື້ໄດ້ກ່າວປາໄສໃນພິທີເປີດກອງປະຊຸມທ່າມກາງແຂກສຳຄັນທີ່ເຂົ້າຮ່ວມຄືອະທິການບໍດີມະຫາວິທະຍາໄລ,ຜູ້ຕາງໜ້າສະຖາບັນຂົງຈື້ຈາກ 140 ກວ່າປະເທດແລະເຂດແຄວ້ນເກືອບ 2500 ຄົນ.
ທ່ານນາງລິວຢຽນຕຸ່ງກ່າວວ່າ: ທ່ານປະທານສີຈິ້ນຜິງ ຊີ້ໃຫ້ເຫັນວ່າ ສະຖາບັນຂົງຈື້ເປັນປ່ອງຢ້ຽມແລະຂົວຕໍ່ການແລກປ່ຽນວັດທະນະທຳພາສາລະຫວ່າງຈີນກັບຕ່າງປະເທດ. ນັບແຕ່ສະຖາບັນຂົງຈື້ສ້າງຕັ້ງຂຶ້ນຕະຫຼອດ 13 ປີໂດຍສະເພາະໃນໄລຍະ 5 ປີຜ່ານມາ, ພາຍໃຕ້ຄວາມພະຍາຍາມຮ່ວມຂອງຈີນແລະປະເທດຕ່າງໆ, ສະຖາບັນໄດ້ປະກອບສ່ວນຢ່າງຕັ້ງໜ້າເຂົ້າໃນການເສີມສ້າງມິດຕະພາບລະຫວ່າງປະຊາຊົນຈີນກັບບັນດາປະເທດ,ສົ່ງເສີມການແລກປ່ຽນແລະຖອດຖອນບົດຮຽນລະຫວ່າງອະລິຍະທຳຈີນແລະຕ່າງປະເທດ. ທ່ານນາງລິວຢຽນຕຸ່ງເນັ້ນວ່າ: ສະຖາບັນຂົງຈື້ຄວນຖືການແລກປ່ຽນທາງດ້ານພາສາເປັນຂົວຕໍ່,ປັບປຸງແຜນຍຸດທະສາດໃຫ້ດີ, ສ້າງຄວາມເຂັ້ມແຂງໃຫ້ແກ່ສະຖາບັນຂົງຈື້, ລົງເລິກການປະຕິຮູບດ້ານຄູອາຈານ,ປຶ້ມແບບຮຽນແລະວິທີການຮຽນການສອນ, ເພີ່ມທະວີການອົບຮົມກໍ່ສ້າງຄູສອນພາສາຈີນຂອງຕ່າງປະເທດເພື່ອຮັບໃຊ້ຄວາມຕ້ອງການດ້ານການສອນພາສາຈີນຂອງບັນດາປະເທດແລະເປັນການປະກອບສ່ວນອັນໃໝ່ໃນການສ້າງປະຊາຄົມຮ່ວມຊາຕາກຳມວນມະນຸດ.