ປັດຈຸບັນ, ມົນສະເໜ່ຂອງພາສາຈີນກຳລັງດຶງດູດຄວາມສົນໃຈຂອງຄົນຕ່າງປະເທດຫຼາຍໆຄົນລວມເຖິງນາງຫຼີຊ້ານນັບມື້ຫຼາຍຂຶ້ນ. ຕາມສະຖິຕິຂອງສຳນັກງານໃຫຍ່ສະຖາບັນຂົງຈື້. ປັດຈຸບັນ, ທົ່ວໂລກ ມີສະຖາບັນຂົງຈື້ທັງໝົດ 525 ແຫ່ງ,ຊຫ້ອງຮຽນຂົງຈື້ຊັ້ນ 1113 ແຫ່ງຢັ່ງຢາຍຢູ່ໃນ 146 ປະເທດແລະເຂດແຄວ້ນ, ມີນັກຮຽນນັກສຶກສາທີ່ກຳລັງຮຽນແລະຈົບໄປແລ້ວທັງໝົດ 9.160.000 ຄົນ. ໃນໄລຍະ 10 ປີຜ່ານມາ, ສະຖາບັນຂົງຈື້ແລະຫ້ອງຮຽນຂົງຈື້ໃນທົ່ວໂລກໄດ້ຈັດກິດຈະກຳວັດທະນະທຳເຖິງ 220.000 ຄັ້ງ, ແລະຜູ້ທີ່ມີສ່ວນຮ່ວມເຖິງ 100ລ້ານຄົນ. ຈາກຄວາມພະຍາຍາມຮ່ວມຂອງຈີນແລະປະເທດຕ່າງໆ ໄດ້ປະກອບສ່ວນຢ່າງຕັ້ງໜ້າເຂົ້າໃນການເສີມສ້າງມິດຕະພາບລະຫວ່າງປະຊາຊົນຈີນກັບບັນດາປະເທດທັງໄດ້ຊ່ວຍສົ່ງເສີມການແລກປ່ຽນແລະຖອດຖອນບົດຮຽນລະຫວ່າງອະລິຍະທຳຈີນແລະຕ່າງປະເທດ.
ທ່ານແດນມູດ ຫົວໜ້າສະຖາບັນວິສະວະກຳແຫ່ງຊາດອາເມລິກາ, ສະມາຊິກຄະນະມົນຕີສຳນັກງານໃຫຍ່ສະຖາບັນຂົງຈື້ໄດ້ແຈ້ງໃຫ້ຊາບໃນກອງປະຊຸມວ່າ: ປີ 2004, ມະຫາວິທະຍາໄລແມຣີແລນ ສະຫະລັດອາເມລິກາໄດ້ສ້າງຕັ້ງສະຖາບັນຂົງຈື້ແຫ່ງທຳອິດຢູ່ທະວີບອາເມລິກາເໜືອ. ໃນໄລຍະ 10 ກວ່າປີຜ່ານມາ, ນັກສຶກສາສະຖາບັນຂົງຈື້ໄດ້ຂະຫຍາຍຕົວຢ່າງວ່ອງໄວແບບເໜືອການຄາດໝາຍບໍ່ວ່າຢູ່ທະວີບອາເມລິກາເໜືອກໍຄືທົ່ວໂລກ, ທ່ານເຫັນວ່າ: ນີ້ແມ່ນຍ້ອນວ່າ ສະຕະວັດທີ 21 ເປັນຍຸກທີ່ຜູ້ມີຄວາມຮູ້ຄວາມສາມາດແລະການປະດິດສ້າງຊຸກຍູ້ການພັດທະນາ, ສ່ວນສະຖາບັນຂົງຈື້ເປັນເວທີສຳຄັນໃນການຊຸກຍູ້ການໂຮມສູນຜູ້ມີຄວາມຮູ້ຄວາມສາມາດແລະການປະດິດສ້າງກໍຄືການແລກປ່ຽນກັນ. ທ່ານຢືນຢັນວ່າ: ນີ້ຄືທິດທາງຂະຫຍາຍຕົວຂອງສະຖາບັນຂົງຈື້ໃນທົ່ວໂລກ.
ທ່ານເຜິງລົງ ອະທິການບໍດີມະຫາວິທະຍາໄລພາສາຕ່າງປະເທດປັກກິ່ງ, ສະມາຊິກຄະນະມົນຕີສຳນັກງານໃຫຍ່ສະຖາບັນຂົງຈື້ຢືນຢັນວ່າ: ສະຖາບັນການສຶກສາຊັ້ນສູງຂອງຈີນເຂົ້າຮ່ວມການສ້າງສະຖາບັນຂົງຈື້ເປັນການວິວັດໃໝ່ທີ່ຍິ່ງໃຫຍ່ທີ່ບໍ່ເຄີຍມີມາກ່ອນໃນປະຫວັດສາດແຫ່ງການຖ່າຍທອດພາສາຂອງໂລກ ເຊິ່ງໄດ້ປະກອບສ່ວນອັນສຳຄັນເຂົ້າໃນການຊຸກຍູ້ພາສາຈີນໃຫ້ກ້າວໄປສູ່ທົ່ວໂລກ,ສົ່ງເສີມການແລກປ່ຽນດ້ານວັດລະທະທຳລະຫວ່າງຈີນກັບຕ່າງປະເທດ,ເພີ່ມຄວາມເຂົ້າໃຈກັນແລະສົ່ງເສີມມິດຕະພາບລະຫວ່າງປະຊາຊົນບັນດາປະເທດ, ໃນຂະນະທີ່ມີສ່ວນຮ່ວມໃນການສຶກສາສາກົນດ້ານພາສາຈີນນັ້ນ,ກໍໄດ້ດຳເນີນການຮ່ວມມືແລະແລກປ່ຽນກັບສະຖາບັນການສຶກສາຊັ້ນສູງຕ່າງປະເທດໃນຫຼາຍຂົງເຂດແລະຫຼາຍລະດັບ ເຊິ່ງໄດ້ຊຸກຍູ້ຂະບວນການຫັນເປັນແບບສາກົນຂອງການສຶກສາຈີນ.
ທ່ານນາງລິວຢຽນຕຸ່ງກ່າວວ່າ: ທ່ານປະທານສີຈິ້ນຜິງ ຊີ້ໃຫ້ເຫັນວ່າ ສະຖາບັນຂົງຈື້ເປັນປ່ອງຢ້ຽມແລະຂົວຕໍ່ການແລກປ່ຽນວັດທະນະທຳພາສາລະຫວ່າງຈີນກັບຕ່າງປະເທດ. ນັບແຕ່ສະຖາບັນຂົງຈື້ສ້າງຕັ້ງຂຶ້ນຕະຫຼອດ 13 ປີໂດຍສະເພາະໃນໄລຍະ 5 ປີຜ່ານມາ, ພາຍໃຕ້ຄວາມພະຍາຍາມຮ່ວມຂອງຈີນແລະປະເທດຕ່າງໆ, ສະຖາບັນໄດ້ປະກອບສ່ວນຢ່າງຕັ້ງໜ້າເຂົ້າໃນການເສີມສ້າງມິດຕະພາບລະຫວ່າງປະຊາຊົນຈີນກັບບັນດາປະເທດ,ສົ່ງເສີມການແລກປ່ຽນແລະຖອດຖອນບົດຮຽນລະຫວ່າງອະລິຍະທຳຈີນແລະຕ່າງປະເທດ. ທ່ານນາງລິວຢຽນຕຸ່ງເນັ້ນວ່າ: ສະຖາບັນຂົງຈື້ຄວນຖືການແລກປ່ຽນທາງດ້ານພາສາເປັນຂົວຕໍ່,ປັບປຸງແຜນຍຸດທະສາດໃຫ້ດີ, ສ້າງຄວາມເຂັ້ມແຂງໃຫ້ແກ່ສະຖາບັນຂົງຈື້, ລົງເລິກການປະຕິຮູບດ້ານຄູອາຈານ,ປຶ້ມແບບຮຽນແລະວິທີການຮຽນການສອນ, ເພີ່ມທະວີການອົບຮົມກໍ່ສ້າງຄູສອນພາສາຈີນຂອງຕ່າງປະເທດເພື່ອຮັບໃຊ້ຄວາມຕ້ອງການດ້ານການສອນພາສາຈີນຂອງບັນດາປະເທດແລະເປັນການປະກອບສ່ວນອັນໃໝ່ໃນການສ້າງປະຊາຄົມຮ່ວມຊາຕາກຳມວນມະນຸດ.
