ຕາມຂ່າວ CRI: ໜັງສືພິມ bangkokbiznews ລາຍງານໃນວັນທີ 12 ທັນວານີ້ວ່າ: ໃນຊຸມປີຜ່ານມາ, ຄຽງຄູ່ກັບການເພີ່ມຂຶ້ນຢ່າງຫຼວງຫຼາຍຂອງຈຳນວນນັກທ່ອງທ່ຽວຈີນທີ່ໄປທ່ຽວໄທ, ທຶນຮອນຂອງຈີນຈຳນວນຫຼາຍກໍ່ໄດ້ເຂົ້າສູ່ຂະແໜງການອະສັງຫາລິມະຊັບຂອງໄທພ້ອມໆກັນ, ໂດຍສະເພາະການລົງທຶນດ້ານທີ່ພັກແລະໂຮງແຮມຂອງເຂດການຄ້າທີ່ຈະເລີນຂອງໄທ ເພື່ອສະໜອງບໍລິການແກ່ນັກທ່ອງທ່ຽວຈີນ.
ຕົວເລກຂໍ້ມູນທີ່ກ່ຽວຂ້ອງສະແດງໃຫ້ເຫັນວ່າ: ແຕ່ປີ 2015 ຫາປີ 2017, ທຶນຮອນຂອງຈີນເຂົ້າສູ່ຂະແໜງການອະສັງຫາລິມະຊັບຂອງໄທໄດ້ປາກົດມີທ່າອ່ຽງເພີ່ມຂຶ້ນໃນແຕ່ລະປີ, ມູນຄ່າການລົງທຶນສະເລ່ຍຕໍ່ປີຢູ່ລະຫວ່າງ 40-50 ຕື້ບາດ (ປະມານ 8-10 ຕື້ຢວນ), ຕົ້ນຕໍຈະລົງທຶນຢູ່ຕົວເມືອງທີ່ຂະແໜງການທ່ອງທ່ຽວມີຄວາມຈະເລີນຂອງໄທເຊັ່ນ: ບາງກອກ, ແຂວງພະນະຄອນ ສີ ອາຍຸດທະຍາ, ພັດທະຍາ, ຊຽງໃໝ່ ແລະພູເກັດເປັນຕົ້ນ. ໂຄງການລົງທຶນກວມເຖິງທີ່ພັກ ແລະໂຮງແຮມທີ່ສາມາດເຊົ່າ ແລະຂາຍໄດ້, ໃນນັ້ນທີ່ພັກກວມ 70%, ໂຮງແຮມ 25% ແລະ ສຳນັກງານຫ້ອງການ 5%.