ກອງປະຊຸມລັດຖະມົນຕີການຕ່າງປະເທດຂອບການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງຄັ້ງທີ 3 ຈະຈັດຂຶ້ນຢູ່ເມືອງຕ້າຫຼີ ແຂວງຢຸນນານ ສປ ຈີນແຕ່ວັນທີ 14-16 ທັນວານີ້ໂດຍການເປັນປະທານຮ່ວມຂອງທ່ານວາງຢີ້ ລັດຖະມົນຕີກະຊວງການຕ່າງປະເທດຈີນແລະທ່ານປຣັກ ໂຊຄອນ ລັດຖະມົນຕີວຽກງານແຫ່ງລັດທັງເປັນລັດຖະມົນຕີການຕ່າງປະເທດແລະການຮ່ວມມືສາກົນກຳປູເຈຍ, ຜູ້ຕາງໜ້າຈາກແຕ່ລະປະເທດທີ່ຈະເຂົ້າມາຮ່ວມມີ ທ່ານປຣັກ ໂຊຄອນ ລັດຖະມົນຕີກະຊວງການຕ່າງປະເທດແລະການຮ່ວມມືສາກົນກຳປູເຈຍ, ທ່ານສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດລາວ, ທ່ານຢໍຕິນ ລັດຖະມົນຕີກະຊວງການຮ່ວມມືສາກົນມຽນມາ, ທ່ານດອນ ປຣະມັດວິໄນ ລັດຖະມົນຕີກະຊວງການຕ່າງປະເທດໄທ, ທ່ານຟາມບິງມິງ ຮອງນາຍົກລັດຖະມົນຕີທັງເປັນລັດຖະມົນຕີກະຊວງການຕ່າງປະເທດຫວຽດນາມ.
ຄາດວ່າ ກອງປະຊຸມຄັ້ງນີ້ຈະຫາລື 3 ຫົວຂໍ້ສຳຄັນຄື: ໜຶ່ງ ທົບທວນຄືນຄວາມຄືບໜ້າຂອງການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ, ເພີ່ມທະວີໝາກຜົນແຫ່ງການຮ່ວມມື. ສອງແມ່ນສະຫຼຸບບົດຮຽນການຮ່ວມມືເພື່ອສ້າງພື້ນຖານອັນໜັກແໜ້ນໃຫ້ແກ່ການລົງເລິກການຮ່ວມມືໃນຕໍ່ໜ້າ. ສາມແມ່ນລົງເລິກແລກປ່ຽນຄວາມເຫັນກ່ຽວກັບທິດທາງການພັດທະນາໃນອະນາຄົດຂອງການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ ເພື່ອເປັນການກະກຽມໃຫ້ແກ່ກອງປະຊຸມສຸດຍອດຂອບການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງຄັ້ງທີ 2.
ກອງປະຊຸມລັດຖະມົນຕີການຕ່າງປະເທດຂອບການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງເປັນກອງປະຊຸມສຳຄັນໜຶ່ງທີ່ຈັດຂຶ້ນໃນໄລຍະສຳຄັນແຫ່ງການພັດທະນາການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງທີ່ພວມຂະຫຍາຍຈາກໄລຍະບຳລຸງກໍ່ສ້າງກ້າວໄປສູ່ໄລຍະເຕີບໃຫຍ່ຂະຫຍາຍຕົວ. ປະເທດຕ່າງໆລ້ວນ ຫວັງໃຫ້ລະດັບການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງຖືກຍົກໃຫ້ສູງຂຶ້ນຕື່ມອີກ ເພື່ອປະກອບສ່ວນເຂົ້າໃນການສ້າງປະຊາຄົມອາຊຽນແລະຂະບວນການເຊື່ອມໂຍງ ຂອງພາກພື້ນ, ສ້າງປະຊາຄົມຮ່ວມຊາຕາກຳປະເທດແມ່ນ້ຳລ້ານຊ້າງ-ແມ່ນ້ຳຂອງທີ່ມີສັນຕິພາບແລະຈະເລີນຮຸ່ງເຮືອງ.
 |
