ວັນທີ 13 ທັນວານີ້, 6 ປະເທດກ່ຽວກັບບັນຫານິວເຄຼຍອີຣານ ຄື: ອາເມລິກາ, ອັງກິດ, ຝະຣັ່ງ, ຣັດເຊຍ, ຈີນ ແລະ ເຢຍລະມັນ ກັບອີຣານໄດ້ຈັດກອງປະຊຸມຄະນະກຳມະການປະສົມວ່າດ້ວຍສັນຍາຮອບດ້ານກ່ຽວກັບບັນຫານິວເຄຼຍອີຣານຄັ້ງທີ 10 ຢູ່ນະຄອນຫຼວງວຽນນາຂອງໂອຕຣິດ ໂດຍທ່ານວາງສຸນ ຫົວໜ້າກົມຄວບຄຸມກຳລັງທະຫານກະຊວງການຕ່າງປະເທດຈີນໄດ້ນຳພາຄະນະເຂົ້າຮ່ວມ.
ທ່ານວາງສຸນກ່າວເນັ້ນວ່າ, ຈີນເດັດດ່ຽວສະໜັບສະໜູນສັນຍາຮອບດ້ານ ແລະ ຮັບປະກັນໃຫ້ສັນຍາໄດ້ຮັບການປະຕິບັດຢ່າງສະເໝີຕົ້ນສະເໝີປາຍ ເຊິ່ງຈະມີບົດບາດສຳຄັນທີ່ສຸດຕໍ່ການປົກປັກຮັກສາລະບຽບບໍ່ແຜ່ຜາຍອາວຸດນິວເຄຼຍສາກົນ ແລະ ຊຸກຍູ້ສັນຕິພາບ ແລະ ສະຖຽນລະພາບຂອງຕາເວັນອອກກາງ ທັງສອດຄ່ອງກັບຜົນປະໂຫຍດຮ່ວມຂອງປະຊາຄົມໂລກ. ປັດຈຸບັນ, ສັນຍາສະບັບນີ້ພວມຢູ່ໃນໄລຍະຫົວລ້ຽວຫົວຕໍ່, 6 ປະເທດ ແລະ ອີຣານຄວນພະຍາຍາມຮ່ວມກັນ, ປະຕິບັດຕາມຄຳໝັ້ນສັນຍາຂອງຕົນ ແລະ ສືບຕໍ່ປົກປ້ອງຄວາມຄົບຖ້ວນ ແລະ ຄວາມສັກສິດຂອງສັນຍາ.
ທ່ານວາງສຸນຍັງເປີດເຜີຍຕື່ມວ່າ, ຈີນຈະບໍລິຈາກເງິນ 1,5 ລ້ານຢວນໃຫ້ແກ່ໂຄງການຕິດຕາມກວດກາອີຣານຂອງອົງການພະລັງງານປະລະມານູສາກົນ ໂດຍເນັ້ນວ່າ, ນີ້ໄດ້ສ່ອງແສງເຖິງວ່າຈີນສະໜັບສະໜູນສັນຍາສະບັບນີ້ຈາກທາງການເມືອງ.
 |
