ທ່ານຫວາງຢີ້ ລັດຖະມົນຕີການຕ່າງປະເທດຈີນໄດ້ພົບປະກັບທ່ານສະເຫຼີມໄຊ ກົມມະສິດ ລັດຖະມົນຕີການຕ່າງປະເທດລາວໂອກາດເດີນທາງເຂົ້າຮ່ວມກອງປະຊຸມລັດຖະມົນຕີການຕ່າງປະເທດຄັ້ງທີ 3 ຂອງການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ.
ວັນທີ 15 ທັນວານີ້, ທ່ານຫວາງຢີ້ກ່າວວ່າ, ການຢ້ຽມຢາມປະເທດລາວໃນເດືອນຂອງທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນ, ປະທານປະເທດຈີນໄດ້ຮັບຜົນສຳເລັດອັນຈົບງາມ ເຊິ່ງເປັນການຂຽນປະຫວັດສາດໜ້າໃໝ່ໃຫ້ແກ່ສາຍສຳພັນມິດຕະພາບຈີນລາວ. ໜ້າທີ່ສຳຄັນອັນດັບໜຶ່ງຂອງສອງຝ່າຍໃນຕໍ່ໜ້າຄື ຖືຜົນສຳເລັດການຢ້ຽມຢາມຄັ້ງນີ້ເປັນສາຍຫຼັກ, ວາງແຜນການຮ່ວມມືທີ່ແທ້ຈິງໃນຂົງເຂດຕ່າງໆ ຕັ້ງໜ້າພະຍາຍາມອັນເພື່ອສ້າງປະຊາຄົມຮ່ວມຊາຕາກຳທີ່ມີຄວາມໝາຍຍຸດທະສາດຈີນ-ລາວ. ສອງຝ່າຍຕ້ອງປິ່ນອ້ອມການຮ່ວມກັນສ້າງ ໜຶ່ງແລວທາງໜຶ່ງເສັ້ນທາງ ແລະ ແລວທາງເສດຖະກິດຈີນລາວ, ກຳນົດໂຄງການຮ່ວມມືທີ່ສຳຄັນໂດຍໄວ, ເລັ່ງລັດສ້າງກົນໄກການຮ່ວມມືແລວທາງເສດຖະກິດຈີນ-ລາວຮ່ວມກັນ, ເລີ່ມວາງແຜນການສ້າງແລວທາງເສດຖະກິດ, ຮັບປະກັນໃຫ້ການສ້າງທາງລົດໄຟຈີນລາວດຳເນີນໄປດ້ວຍຄວາມສະດວກ.
ທ່ານສະເຫຼີມໄຊກ່າວວ່າ, ການຢ້ຽມຢາມລາວຂອງທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນ, ປະທານປະເທດຈີນເປັນນິມິດໝາຍທີ່ດີໃນປະຫວັດສາດການພົວພັນສອງປະເທດ. ລາວຈະຜັນຂະຫຍາຍຜົນສຳເລັດການຢ້ຽມຢາມໃຫ້ມີປະສິດທິຜົນ ຢູ່ບົນນ້ຳໃຈຂອງຄວາມເປັນສະຫາຍ, ເປັນເພື່ອນມິດ ແລະ ອ້າຍນ້ອງກັນ. ລາວຂອບໃຈນຳຈີນທີ່ໄດ້ໃຫ້ການສະໜັບສະໜູນແກ່ລາວໃນຂົງເຂດຕ່າງໆ, ຍິນດີເພີ່ມທະວີການເຊື່ອມຈອດຍຸດທະສາດ ໜຶ່ງແລວທາງໜຶ່ງເສັ້ນທາງ ຕື່ມອີກ, ຍິນດີຊຸກຍູ້ການສ້າງທາງລົດໄຟລາວ-ຈີນ ແລະ ແລວທາງເສດຖະກິດ.
ທ່ານສະເຫຼີມໄຊຍັງກ່າວຕື່ມວ່າ, ການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງໄດ້ກາຍເປັນແບບຢ່າງທີ່ດີຂອງການຮ່ວມມືຢູ່ພາກພື້ນ, ໃນເວລາບໍ່ຮອດສອງປີຜ່ານມານີ້ ໄດ້ຮັບຜົນສຳເລັດສຳຄັນທີ່ແທ້ຈິງຢ່າງຫຼວງຫຼາຍ ແລະ ໄດ້ສ້າງຜົນປະໂຫຍດນັບມື້ນັບຫຼາຍຂຶ້ນໃຫ້ແກ່ປະເທດຕ່າງໆຢູ່ເຂດລ້ອງແມ່ນ້ຳ. ລາວດີໃຈຫຼາຍທີ່ຈະໄດ້ເປັນປະທານໝູນວຽນຂອງກອງປະຊຸມນີ້ຮ່ວມໃນປີໜ້າ, ຍິນດີຮ່ວມມືກັບຝ່າຍຕ່າງໆຢ່າງໃກ້ຊິດເພື່ອຍາດໄດ້ຜົນສຳເລັດໃຫ້ຫຼາຍກວ່າເກົ່າ.
