ວັນທີ 17 ທັນວານີ້, ຢູ່ເຂດພັດທະນາເສດຖະກິດວານທິງເມືອງຣຸ້ຍລີ້ກິ່ງແຂວງປົກຄອງຕົນເອງເຜົ່າລື້ເຜົ່າຈິງໂພ່ເຕີຫົງແຂວງຢຸນນານໄດ້ຈັດພິທີລົງມືກໍ່ສ້າງວິທະຍາໄລອາຊີວະສຶກສາສາກົນແມ່ນ້ຳລ້ານຊ້າງແມ່ນ້ຳຂອງມະຫາວິທະຍາໄລຊົນເຜົ່າຢຸນນານ ເຊິ່ງຈະສຸມໃສ່ບຳລຸງກໍ່ສ້າງວິຊາການທີ່ມີຄຸນສົມບັດສູງ ແລະສອດຄ່ອງກັບຄວາມຮຽກຮ້ອງຕ້ອງການດ້ານການພັດທະນາເສດຖະກິດສັງຄົມຢູ່ພາກພື້ນແມ່ນ້ຳລ້ານຊ້າງແມ່ນ້ຳຂອງ.
ວິທະຍາໄລອາຊີວະສຶກສາສາກົນແມ່ນ້ຳລ້ານຊ້າງແມ່ນ້ຳຂອງຈະໃຊ້ຮູບການ6 ປະເທດຮັບສະໝັກນັກສຶກສາຮ່ວມກັນ ເພື່ອບຳລຸງກໍ່ສ້າງນັກສຶກສາລະດັບປະລິນຍາຕີລະດັບສູງ ໂດຍແນໃສ່ການນຳໃຊ້ຕົວຈິງ. ທາງວິທະຍາໄລຈະໃຫ້ລັດຖະບານ 6 ປະເທດຊີ້ນຳນຳພາຮ່ວມກັນ, ມີສ່ວນຮ່ວມຂອງໂຮງຮຽນຊັ້ນສູງລະດັບສຸດຍອດຈາກ 6 ປະເທດ, ແລະໃຫ້ 6 ປະເທດສ້າງຄະນະບໍລິຫານງານຮ່ວມ; ມີວິສາຫະກິດ, ໂຮງຮຽນ, ສະຖາບັນຄົ້ນຄວ້າຮ່ວມກັນປະກອບສ່ວນໃນວຽກງານສຶກສາ.
ວິທະຍາໄລອາຊີວະສຶກສາສາກົນແມ່ນ້ຳລ້ານຊ້າງແມ່ນ້ຳຂອງມີເນື້ອທີ່ທັງໝົດປະມານ 20 ເຮັກຕາ, ເຊິ່ງໃນນັ້ນເນື້ອທີ່ສິ່ງກໍ່ສ້າງມີເນື້ອທີ່ປະມານ 1ແສນ 3ໝື່ນຕາແມັດ, ໃຊ້ງົບປະມານທັງໝົດປະມານ 600 ລ້ານຢວນ, ຄາດວ່າຈະສ້າງສຳເລັດໃນທ້າຍປີ 2019, ພາຍຫຼັງສ້າງສຳເລັດແລ້ວຈະສາມາດຮັບເອົານັກສຶກສາສົມບູນ ຈາກ 6ປະເທດລຸ່ມແມ່ນ້ຳລ້ານຊ້າງ-ແມ່ນ້ຳຂອງ 3000 ຄົນ. ເຊິ່ງວິທະຍາໄລດັ່ງກ່າວຈະຖືການຮັບໃຊ້ການພັດທະນາເສດຖະກິດ ແລະອຸດສາຫະກຳຂອງປະເທດລຸ່ມແມ່ນ້ຳລ້ານຊ້າງ-ແມ່ນ້ຳຂອງເປັນໜ້າທີ່ອັນດັບໜຶ່ງ, ສຸມໃສ່ອົບຮົມນັກວິຊາການແບບນຳໃຊ້ຕົວຈິງທີ່ມີຄຸນນະພາບສູງ ເພື່ອຊຸກຍູ້ການເຊື່ອມໂຍງເຂົ້າກັນດ້ານການສຶກສາ, ວັດທະນະທຳ ແລະອຸດສາຫະກຳລະຫວ່າງ 6 ປະເທດ.
 |
