ຫວ່າງກ່ອນນີ້ບໍ່ດົນ, ທ່ານຫວງກົກຢົງ, ກຳມະການຄະນະບໍລິຫານງານສະມາຄົມອະນຸລັກທຳມະຊາດແລະສິ່ງແວດລ້ອມຫວຽດນາມກ່າວຢູ່ນະຄອນຫຼວງຮ່າໂນ້ຍວ່າ, ການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງໄດ້ຮັບຜົນງານທີ່ສຳຄັນ ແຕ່ການສ້າງຕັ້ງຂຶ້ນເປັນເວລາກວ່າ 1 ປີສັ້ນໆ, ໃນນັ້ນຈີນໄດ້ເສີມຂະຫຍາຍບົດບາດຢ່າງຕັ້ງໜ້າ.
ທ່ານຫວງກົກຢົງກ່າວວ່າ, ໂຄງການທີ່ໄດ້ຜົນເກັບກ່ຽວເບື້ອງຕົ້ນ 45 ໂຄງການທີ່ກຳນົດໄວ້ໃນກອງປະຊຸມສຸດຍອດຄັ້ງທຳອິດກ່ຽວກັບການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງທີ່ຈັດຂຶ້ນໃນເດືອນມີນາປີຜ່ານມາ, ຮອດປັດຈຸບັນສ່ວນຫຼາຍໄດ້ສຳເລັດລົງ ຫຼື ໄດ້ຮັບຄວາມຄືບໜ້າຢ່າງແທ້ຈິງ, ເຊິ່ງເປັນຜົນສຳເລັດອັນສຳຄັນແຕ່ການສ້າງຕັ້ງກົນໄກການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງເປັນຕົ້ນມາ.
ທ່ານກ່າວຕື່ມວ່າ, ກົນໄກກອງປະຊຸມພົບປະຫຼາຍລະດັບ ເຊິ່ງລວມທັງກອງປະຊຸມສຸດຍອດ, ກອງປະຊຸມລັດຖະມົນຕີການຕ່າງປະເທດການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງແລະອື່ນໆໄດ້ສ້າງເວທີອັນສຳຄັນໃຫ້ແກ່ປະເທດທີ່ກ່ຽວຂ້ອງໃນການເສີມສ້າງຄວາມຮັບຮູ້ກັນ ຜ່ອນຜັນກັນ ແລະຊ່ວຍເຫຼືອເຊິ່ງກັນ ແລະກັນຢ່າງສະເໝີພາບກັນ, ບັນດາປະເທດສາມາດແລກປ່ຽນຄວາມເຫັນຢ່າງກົງໄປກົງມາກ່ຽວກັບບັນຫາຕ່າງໆທີ່ສົນໃຈຮ່ວມກັນ, ເຊິ່ງລວມທັງບັນຫາຊັບພະຍາກອນນ້ຳ ແລະອື່ນໆ, ເຊິ່ງໄດ້ເພີ່ມຄວາມເຂົ້າໃຈກັນ ແລະການຮ່ວມມືກັນ. ທ່ານໄດ້ຊີ້ອອກເປັນພິເສດວ່າ, ບໍ່ວ່າໃນການລິເລີ່ມສ້າງຕັ້ງກົນໄກຮ່ວມມື, ຫຼື ຊຸກຍູ້ກົນໄກຮ່ວມມືແມ່ນ້ຳລ້ານຊ້າງ-ແມ່ນ້ຳຂອງໃຫ້ພັດທະນາແບບຍືນຍົງ, ຮັກສາຄວາມໝັ້ນຄົງຍາວນານຂອງພາກພື້ນ ແລະອື່ນໆ, ຈີນລ້ວນແຕ່ໄດ້ເສີມຂະຫຍາຍບົດບາດຢ່າງຕັ້ງໜ້າ.