ທ່ານເຊິ່ນຈິ້ນເຄີ່ ໂຄສົກກອງທັບອາກາດຈີນ ຢືນຢັນໃນວັນທີ 18 ທັນວານີ້ວ່າ: ໃນວັນດັ່ງກ່າວ, ຍົນຮົບຈີນຫຼາຍປະເພດຫຼາຍລຳ ເຊັ່ນ ຍົນຖິ້ມລະເບີດ, ຍົນຂັບໄລ່ ແລະ ຍົນສືບຂ່າວຂອງກອງທັບອາກາດຈີນ ໄດ້ບິນຜ່ານຊ່ອງແຄບທະເລຊູຊີມະ ຢ່າງເປັນແຖວ ເພື່ອໄປຝຶກແອບຢູ່ເຂດນ່ານຟ້າສາກົນເທິງທະເລຍີ່ປຸ່ນ ແລະກວດກາຄວາມສາມາດການສູ້ຮົບຕົວຈິງທາງທະເລໄກ.
ທ່ານເຊິ່ນຈິ້ນເຄີ່ ກ່າວຕື່ມວ່າ: ການຝຶກແອບທາງທະເລໄກເທື່ອນີ້ ກອງທັບອາກາດຈີນໄດ້ບິນຜ່ານຊ່ອງແຄບທະເລຊູຊີມະ ເປັນຄັ້ງທຳອິດ ໂດຍຍົນຖິ້ມລະເບີດ ຮົງ-6K ແລະ ຊູ-30 ເປັນຕົ້ນໄດ້ກຽມຄວາມພ້ອມຢູ່ສະໜາມບິນທີ່ໄດ້ຈັດໄວ້ຍົນດັ່ງກ່າວ ແລະ ບິນຜ່ານຊ່ອງແຄບທະເລຊູຊີມະ ເພື່ອໄປຝຶກແອບຢູ່ເຂດນ່ານຟ້າສາກົນເທິງທະເລຍີ່ປຸ່ນ ທັງສາມາດຮັບມືກັບການລົບກວນຈາກຍົນທະຫານຂອງຕ່າງປະເທດ ແລະບັນລຸຈຸດປະສົງການຝຶກແອບທີ່ກຳນົດໄວ້ ພ້ອມທັງສາມາດຍົກສູງຄວາມສາມາດການເຄື່ອນທັບທາງທະເລໄກຂອງຕົນ. ການຝຶກແອບດັ່ງກ່າວແມ່ນການປະຕິບັດຕາມປົກກະຕິທີ່ນອນຢູ່ໃນແຜນການຝຶກແອບປະຈຳປີຂອງກອງທັບອາກາດຈີນ ແລະສອດຄ່ອງກັບກົດໝາຍສາກົນແລະພຶດຕິກຳຕົວຈິງໃນສາກົນ ແລະບໍ່ໄດ້ແນໃສ່ປະເທດໃດ, ເຂດແຄວ້ນໃດ ແລະເປົ້າໝາຍໃດໆ.
ຂະນະທີ່ຊ່ອງແຄບທະເລຊູຊີມະ ບໍ່ແມ່ນເຂດທະເລຂອງປະເທດໃດ ແລະອີງຕາມ "ສົນທິສັນຍາສະຫະປະຊາຊາດວ່າດ້ວຍກົດໝາຍທະເລ", ປະເທດໃດກໍສາມາດເດີນເຮືອແລະບິນຜ່ານຊ່ອງແຄບດັ່ງກ່າວໄດ້.
