ຣັດເຊຍເລີ່ມການເລືອກຕັ້ງປະທານາທິບໍດີຊຸດໃໝ່ຢ່າງເປັນທາງການ

ໜັງສືພິມຣັດເຊຍສະບັບວັນທີ 18 ທັນວານີ້ໄດ້ພິມເຜີຍແຜ່ມະຕິສະພາສູງຣັດເຊຍວ່າ, ການເລືອກຕັ້ງປະທານາທິບໍດີປີ 2018 ຂອງຣັດເຊຍໄດ້ເລີ່ມຂຶ້ນຢ່າງເປັນທາງການແລ້ວຕັ້ງແຕ່ວັນທີ 18 ທັນວາເປັນຕົ້ນໄປ.

ມະຕິລະບຸວ່າ, ຂະບວນການການເລືອກຕັ້ງປະທານາທິບໍດີຣັດເຊຍຈະດຳເນີນໄປຈົນສຳເລັດໃນວັນທີ 18 ມີນາປີ 2018 ໂດຍພາຍໃນ 3 ເດືອນຕໍ່ຈາກນີ້ໄປ, ຜູ້ສະໝັກຮັບເລືອກຕັ້ງຈະຕ້ອງຍື່ນເອກະສານທີ່ກ່ຽວຂ້ອງ ໃຫ້ຄະນະກຳມະການການເລືອກຕັ້ງຣັດເຊຍ, ເກັບໂຮມລາຍເຊັນຂອງປະຊາຊົນຜູ້ມີສິດປ່ອນບັດເລືອກຕັ້ງ, ປະກາດໂຄງການເລືອກຕັ້ງ, ຈັດການໂຕ້ວາທີລະຫວ່າງຝ່າຍຄັດຄ້ານຂອງຜູ້ລົງເລືອກຕັ້ງຕ່າງໆຜ່ານທາງສື່ມວນຊົນ ຕາມລະບຽບການທີ່ລະບຸໄວ້ໃນກົດໝາຍ.

ຫວ່າງບໍ່ດົນມານີ້, ທ່ານວະຣາດິເມຍ ປູຕິນ ປະທານາທິບໍດີຣັດເຊຍຄົນປັດຈຸບັນໄດ້ປະກາດຈະເຂົ້າຮ່ວມການເລືອກຕັ້ງປະທານາທິບໍດີປີ 2018 ໃນຖານະຜູ້ສະໝັກຮັບເລືອກຕັ້ງອິດສະຫຼະ.