ວັນທີ 18 ທັນວານີ້, ທ່ານຈ່າງເຕີຈ່ຽງ ປະທານຄະນະປະຈຳສະພາປະຊາຊົນແຫ່ງຊາດຈີນພົບປະທ່ານດີມິຕຣິອົສ ປາປາດິເມົາລິສ ຮອງປະທານສະພາເອີລົບ ທີ່ຫໍສະພາປະຊາຊົນນະຄອນຫຼວງປັກກິ່ງ.
ທ່ານຈ່າງເຕີຈ່ຽງກ່າວວ່າ, ຈີນເອົາໃຈໃສ່ສູງຕໍ່ການພົວພັນຈີນ-ເອີລົບ ແລະ ສະໜັບສະໜູນຂະບວນການເຊື່ອມໂຍງເຂົ້າກັນຂອງເອີລົບ. ປີໜ້າແມ່ນປີຄົບຮອບ 15 ປີຂອງການສ້າງການພົວພັນຄູ່ຍຸດທະສາດຮອບດ້ານລະຫວ່າງຈີນ-ເອີລົບ ແລະ ຄົບຮອບ 20 ປີຂອງການສ້າງກົນໄກພົບປະລະຫວ່າງຜູ້ນຳຈີນ-ເອີລົບ, ສອງຝ່າຍຄວນເພີ່ມທະວີການເຊື່ອມຕໍ່ຍຸດທະສາດດ້ານການພັດທະນາ, ລົງເລິກການແລກປ່ຽນຮ່ວມມືກັນ ເພື່ອຊຸກຍູ້ໃຫ້ການພົວພັນແບບເພື່ອນມິດຈີນ-ເອີລົບຂະຫຍາຍຕົວຢ່າງບໍ່ຢຸດຢັ້ງ. ສະພາປະຊາຊົນແຫ່ງຊາດຈີນຍິນດີເພີ່ມທະວີການໄປມາຫາສູ່ກັບສະພາເອີລົບ ໂດຍອີງໃສ່ກົນໄກແລກປ່ຽນປະຈຳລະຫວ່າງສະພາຈີນ ແລະ ເອີລົບ, ເພີ່ມຄວາມໄວ້ເນື້ອເຊື່ອໃຈກັນທາງການເມືອງ, ປັບປຸງລະບົບກົດໝາຍດ້ານການຮ່ວມມືທາງເສດຖະກິດການຄ້າໃຫ້ສົມບູນຂຶ້ນ ແລະ ປັບປຸງພື້ນຖານປະຊາມະຕິປະຊາຊົນທີ່ມີມິດຕະພາບຕໍ່ກັນ ເພື່ອເປັນການປະກອບສ່ວນໃໝ່ຕໍ່ການເພີ່ມທະວີການພົວພັນຈີນ-ເອີລົບ.
ທ່ານດີມິຕຣິອົສ ປາປາດິເມົາລິສກ່າວວ່າ, ສະພາເອີລົບຍິນດີເພີ່ມທະວີການແລກປ່ຽນ ແລະ ສົນທະນາກັບສະພາປະຊາຊົນແຫ່ງຊາດຈີນ, ຫຼຸດຜ່ອນຄວາມເຫັນຂັດແຍ້ງກັນ ແລະ ຊຸກຍູ້ການພັດທະນາຮ່ວມກັນ ແບບຕ່າງຝ່າຍຕ່າງມີຜົນປະໂຫຍດ.
 |
