ທ່ານເຮັງ ຣາຕານາ ຫົວໜ້າສູນເກັບກູ້ລະເບີດບໍ່ທັນແຕກກຳປູເຈຍ ຫຼື CMAC ໄດ້ເປີດເຜີຍຕໍ່ສື່ມວນຊົນໃນວັນທີ 19 ທັນວານີ້ວ່າ: ປີນີ້, CMAC ສາມາດສຳເລັດການເກັບກູ້ລະເບີດບໍ່ທັນແຕກໃນເນື້ອທີ່ 8.636 ເຮັກຕາ ແລະສາມາດເກັບກູ້ລະເບີດບໍ່ທັນແຕກໄດ້ເຖິງ 37.448 ລູກ.
ທ່ານເຮັງ ຣາຕານາກ່າວວ່າ: ປີໜ້າແມ່ນປີທຳອິດຂອງກຳປູເຈຍໃນການປະຕິບັດ "ແຜນຍຸດທະສາດໂຄງການເກັບກູ້ລະເບີດບໍ່ທັນແຕກແຫ່ງຊາດແຕ່ປີ 2018-2025" ໂດຍຄະນະກຳມະການເກັບກູ້ລະເບີດບໍ່ທັນແຕກກຳປູເຈຍມີແຜນຈະເກັບກູ້ລະເບີດບໍ່ທັນແຕກໃນເນື້ອທີ່ 116 ກິໂລຕາແມັດ ແລະ ແກ້ໄຂເຂດທີ່ມີລະເບີດບໍ່ທັນແຕກ 9.000 ແຫ່ງຢ່າງຮີບດ່ວນ ເພື່ອເກັບກູ້ລະເບີດບໍ່ທັນແຕກ 50.000 ລູກ ແລະ ຄາດວ່າເມື່ອຮອດປີ 2025, ຈະເກັບກູ້ລະເບີດບໍ່ທັນແຕກໃນທົ່ວປະເທດໃຫ້ໄດ້ທັງໝົດ.
ຂ່າວແຈ້ງຕື່ມວ່າ: ປັດຈຸບັນ, ຢູ່ກຳປູເຈຍຍັງມີບໍລິເວນທີ່ສົງໄສວ່າຍັງມີລະເບີດບໍ່ທັນແຕກ ລວມທັງມິນ ແລະ ລູກປືນໃຫຍ່ ທີ່ມີເນື້ອທີ່ກວມເຖິງ1.700 ກິໂລຕາແມັດ, ຄາດວ່າຈະສາມາດເກັບກູ້ລະເບີດບໍ່ທັນແຕກໄດ້ທັງໝົດເມື່ອຮອດປີ 2025. ຂະນະທີ່ແຕ່ລະປີ ກຳປູເຈຍກໍໄດ້ຮັບການຊ່ວຍເຫຼືອຈາກອົງການຈັດຕັ້ງຕ່າງໆຂອງສາກົນ ລວມທັງຈີນ ໃນມູນຄ່າ 25 ລ້ານຫາ 30 ລ້ານໂດລາສະຫະລັດເພື່ອໃຊ້ເຂົ້າໃນໂຄງການນີ້.
