ທ່ານອາຄົມ ເຕີມພິດທະຍາໄພສິດ ລັດຖະມົນຕີກະຊວງຄົມມະນາຄົມໄທ ຢືນຢັນໃນວັນທີ 19 ທັນວານີ້ວ່າ: ໃນວັນດັ່ງກ່າວ, ຄະນະລັດຖະບານໄດ້ເຫັນດີຈະເລີ່ມກໍ່ສ້າງທາງລົດໄຟຈີນ-ໄທໄລຍະທີໜຶ່ງ ເລີ່ມແຕ່ວັນທີ 21 ທັນວານີ້ເປັນຕົ້ນໄປ.
ທັງນີ້, ທ່ານອາຄົມ ໄດ້ເປີດເຜີຍໃນພິທີຖະແຫຼງຂ່າວຢູ່ກະຊວງຄົມມະນາຄົມວ່າ: ຄະນະລັດຖະບານ ໄດ້ຮັບຊາບຄວາມຄືບໜ້າຂອງທາງລົດໄຟຈີນ-ໄທໄລຍະທີໜຶ່ງ ກໍຄື ທາງລົດໄຟຄວາມໄວສູງແຕ່ນະຄອນຫຼວງບາງກອກຫາແຂວງນະຄອນ ຣາຊະສີມາ ແລະໄດ້ຮັບຮອງມະຕິທີ່ກ່ຽວຂ້ອງທີ່ຄະນະກຳມະການປະສົມການຮ່ວມມືທາງລົດໄຟໄທ-ຈີນຕົກລົງກັນກ່ອນໜ້ານີ້ ເຊິ່ງເນື້ອໃນຕົ້ນຕໍຂອງມະຕິດັ່ງກ່າວ ກໍຄືທາງລົດໄຟຄວາມໄວສູງແຕ່ບາງກອກຫາແຂວງນະຄອນ ຣາຊະສີມາ ຈະດຳເນີນການກໍ່ສ້າງໂດຍແບ່ງອອກເປັນ 4 ຕອນ ແລະໄດ້ກຳນົດຈະເລີ່ມກໍ່ສ້າງໃນວັນທີ 21 ທັນວານີ້.
ໂຄງການຮ່ວມມືທາງລົດໄຟຈີນ-ໄທໄລຍະທີໜຶ່ງຕອນທຳອິດທີ່ຈະເລີ່ມກໍ່ສ້າງ ຕັ້ງຢູ່ລະຫວ່າງສະຖານີກາງດົງ-ປາງອະໂສກ ທາງລົດໄຟທີ່ມີຢູ່ໃນປັດຈຸບັນຢູ່ແຂວງນະຄອນ ຣາຊະສີມາ, ສ່ວນອີກ 3 ຕອນທີ່ມີຄວາມຍາວ 11 ກິໂລແມັດ, 119,5 ກິໂລແມັດ ແລະ 119 ກິໂລແມັດ, ອົງການຄຸ້ມຄອງທາງລົດໄຟໄທມີແຜນຈະຮຽກປະມູນ ແລະຈະກໍ່ສ້າງໄປຕາມລຳດັບ.
