ທ່ານຮາຣີ ໂຣເກີ ໂຄສົກທຳນຽບປະທານາທິບໍດີຟີລິບປິນເປີດເຜີຍໃນວັນທີ 20 ທັນວານີ້ວ່າ: ຕອນຄ່ຳວັນທີ 19 ທັນວານີ້, ທ່ານໂຣດຣີໂກ ດູເຕີເຕ ປະທານາທິບໍດີຟີລິບປິນໄດ້ຖະແຫຼງວ່າ ກອງທັບຟີລິບປິນຈະຢຸດປະຕິບັດການທາງການທະຫານຊົ່ວຄາວແຕ່ວັນທີ 24 ທັນວານີ້ຫາວັນທີ 2 ມັງກອນປີ 2018.
ທ່ານ ຮາຣີ ໂຣເກີຢືນຢັນວ່າ: ການຢຸດຍິງແຕ່ຝ່າຍດຽວຈະສາມາດບັນເທົາຄວາມວິຕົກກັງວົນຂອງປວງຊົນໃນໄລຍະບຸນຄຣິສມັດປີນີ້ແລະຄາດວ່າ ກຸ່ມປະກອບອາວຸດຕ່າງໆເປັນຕົ້ນ ພັກກອມມູນິດຟີລິບປິນແລະທະຫານປະຊາຊົນໃໝ່ກໍຈະມີປະຕິກິລິຍາລັກສະນະຄ້າຍຄືກັນນີ້ເຊັ່ນກັນ.
ທ່ານຢືນຢັນວ່າ: ບຸນຄຣິສມັດມີຄວາມສຳຄັນພິເສດໃນໃຈຂອງພີ່ນ້ອງຮ່ວມຊາດພວກເຮົາ, ໃນເວລານີ້, ຫວັງວ່າຊາວຟີລິບປິນທຸກຄົນຈະສາມັກຄີເປັນເອກະພາບກັນເພື່ອສະແຫວງຫາສັນຕິພາບໃຫ້ແກ່ປະເທດຕົນ.