ຕາມຂ່າວ CRI: ກອງປະຊຸມສຸດຍອດສື່ມວນຊົນການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ 2017 ໄດ້ຈັດຂຶ້ນຢູ່ນະຄອນຫຼວງປັກກິ່ງ ສປ ຈີນ, ໂດຍໜັງສືພິມປະຊາຊົນລາຍວັນຫຼືເຢີນມິນຢື້ປ້າວຂອງຈີນເປັນເຈົ້າພາບ, ສື່ມວນຊົນສຳຄັນ 34 ແຫ່ງຈາກ 6 ປະເທດລຽບຕາມແມ່ນ້ຳລ້ານຊ້າງ-ແມ່ນ້ຳຂອງຄືຈີນ, ມຽນມາ, ລາວ, ໄທ, ກຳປູເຈຍແລະຫວຽດນາມໄດ້ປະກອບຄຳເຫັນກ່ຽວກັບຫົວຂໍ້ "ປະຊາຄົມຮ່ວມຊາຕາກຳແມ່ນ້ຳລ້ານຊ້າງ-ແມ່ນ້ຳຂອງ, ການຮ່ວມມືຂອງສື່ມວນຊົນໃນຍຸກໃໝ່", ໄດ້ລົງເລິກປຶກສາຫາລືເພື່ອເພີ່ມທະວີການແລກປ່ຽນລະຫວ່າງສື່ມວນຊົນເຊິ່ງເປັນການປະກອບສ່ວນເຂົ້າໃນການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ.
ໂອກາດນີ້ທ່ານຢາງເຈິ້ນອູ ຜູ້ອຳນວຍການໃຫຍ່ໜັງສືພິມປະຊາຊົນລາຍວັນກ່າວວ່າ, ການທີ່ສ້າງກົນໄກຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ, ໄດ້ສະໜອງເວທີກວ້າງຂວາງໃໝ່ໃຫ້ແກ່ສື່ມວນຊົນຂອງປະເທດຕ່າງໆ. ສື່ມວນຊົນບໍ່ພຽງແຕ່ຕ້ອງກາຍເປັນຜູ້ບັນທຶກແລະຜູ້ເຜີຍແຜ່ຂໍ້ມູນເທົ່ານັ້ນ, ຍັງຕ້ອງກາຍເປັນຜູ້ມີສ່ວນຮ່ວມແລະຜູ້ກໍ່ສ້າງຂອງການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງອີກດ້ວຍ.
ທ່ານຂົງຊວນຢິວ ຜູ້ຊ່ວຍລັດຖະມົນຕີກະຊວງການຕ່າງປະເທດຈີນກ່າວວ່າ, ກົນໄກ "ຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ" ໄດ້ຮັບຜົນງານອັນອຸດົມສົມບູນເມື່ອເລີ່ມປະຕິບັດການໃນປີ 2016 ເປັນຕົ້ນມາ, ໄດ້ສະແດງໃຫ້ເຫັນເຖິງ "ຄວາມໄວແມ່ນ້ຳລ້ານຊ້າງ-ແມ່ນ້ຳຂອງ", ແລະປະສິດທິພາບແມ່ນ້ຳລ້ານຊ້າງ-ແມ່ນ້ຳຂອງແລະໄດ້ສ້າງວັດທະນະທຳແມ່ນ້ຳລ້ານຊ້າງ-ແມ່ນ້ຳຂອງທີ່ມີຄວາມສະເໝີພາບກັນ, ຊ່ວຍເຫຼືອເຊິ່ງກັນແລະສະໜິດແໜ້ນຄືຄອບຄົວດຽວກັນ. ສື່ມວນຊົນແມ່ນຂົວຕໍ່ທີ່ເພີ່ມຄວາມເຂົ້າໃຈ, ລົງເລິກມິດຕະພາບແລະເພີ່ມທະວີການຮ່ວມມື. 6 ປະເທດລຽບຕາມແມ່ນ້ຳລ້ານຊ້າງ-ແມ່ນນ້ຳຂອງຍັງໄດ້ເສີມຂະຫຍາຍບົດບາດສຳຄັນເຂົ້າໃນການເພີ່ມທະວີການຮ່ວມມືຕົວຈິງ, ເພີ່ມການແລກປ່ຽນລະຫວ່າງປະຊາຊົນ, ຍົກສູງສະຕິແມ່ນ້ຳລ້ານຊ້າງ-ແມ່ນ້ຳຂອງ.
ທ່ານເຢິນຊຽນ ຮອງຫົວໜ້າບັນນາທິການວິທະຍຸສາກົນແຫ່ງປະເທດຈີນຫຼືCRIຢືນຢັນວ່າ: ຊຸມປີມໍ່ໆມານີ້, ວິທະຍຸ CRI ບໍ່ພຽງແຕ່ໄດ້ຮ່ວມມືກັບສື່ມວນຊົນປະເທດລຸ່ມແມ່ນ້ຳລ້ານຊ້າງ-ແມ່ນ້ຳຂອງໃນການແລກປ່ຽນລາຍການ,ແລກປ່ຽນພະນັກງານແລ້ວ, ຍັງໄດ້ຈັດກິດຈະກຳແລກປ່ຽນດ້ານວັດທະນະທຳຕ່າງໆໂດຍອີງໃສ່ທ່າແຮງດ້ານພາສາແລະການຮ່ວມມືດ້ານສື່ມວນຊົນເພື່ອສົ່ງເສີມການເຊື່ອມສານຈິດໃຈລະຫວ່າງປະຊາຊົນ. ທ່ານໄດ້ສະໜີ 3 ຂໍ້ໃນການສົ່ງເສີມການຮ່ວມມືລະຫວ່າງສື່ມວນຊົນຂອງ 6 ປະເທດຄື ໜຶ່ງ: ຕັ້ງເປົ້າໝາຍຮ່ວມ, ຮ່ວມມືໃຫ້ເປັນກຳລັງຮ່ວມແລະສົ່ງສຽງຮ່ວມກັນເພື່ອເຮັດໃຫ້ນິຍາມຂອງກົນໄກຮ່ວມມືແມ່ນ້ຳລ້ານລ້າງ-ແມ່ນ້ຳຂອງ, ປະຊາຄົມຮ່ວມຊາຕາກຳແມ່ນ້ຳລ້ານຊ້າງ-ແມ່ນ້ຳຂອງເຂົ້າເຖິງຈິດໃຈຂອງປະຊາຊົນເຂດລຸ່ມແມ່ນ້ຳລ້ານຊ້າງ-ແມ່ນ້ຳຂອງ; ສອງ: ສ້າງໂອກາດຫຼາຍກວ່າເກົ່າເພື່ອຈັດກິດຈະກຳສື່ມວນຊົນສອງຝ່າຍແລະຫຼາຍຝ່າຍ. ນຳໃຊ້ການເກັບກຳຂ່າວຮ່ວມ, ຖ່າຍທຳວິດີໂອຮ່ວມ,ແລກປ່ຽນບຸກຄະລາກອນ, ຈັດກອງປະຊຸມເວທີປຶກສາຫາລືຫົວຂໍ້ຫຼັກ, ຈັດຊຸດຝຶກອົບຮົມແລະແລກປ່ຽນກັນແລະອື່ນໆເພື່ອເພີ່ມທະວີການຮ່ວມມືປະສານງານລະຫວ່າງສື່ມວນຊົນໃນພາກພື້ນແມ່ນ້ຳລ້ານຊ້າງ-ແມ່ນ້ຳຂອງ; ສາມ: ໝູນໃຊ້ຊື່ສຽງອິດທິພົນຂອງສື່ມວນຊົນເພື່ອສົ່ງເສີມການຮ່ວມມືລະຫວ່າງອົງການຈັດຕັ້ງຂອງລັດຖະບານປະເທດຕ່າງໆກັບອົງການNGO, ຈັດຕັ້ງປະຕິບັດໂຄງການຮ່ວມມືໃນຫົວຂໍ້ພິເສດໂດຍສະເພາະແມ່ນໂຄງການສາທາລະນະປະໂຫຍດເພື່ອເຮັດໃຫ້ມວນຊົນເອົາໃຈໃສ່ບັນຫາຊີວິດການເປັນຢູ່ຂອງປະຊາຊົນໃນເຂດລຸ່ມແມ່ນ້ຳລ້ານຊ້າງ-ແມ່ນ້ຳຂອງໃຫ້ຫຼາຍຂຶ້ນກວ່າເກົ່າ ທັງຄົ້ນຄວ້າແຜນການແກ້ໄຂທີ່ສົມເຫດສົມຜົນໃຫ້ສຳເລັດຜົນ.
ທ່ານສະຫວັນຄອນ ຣາດຊະມຸນຕີ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ສປປ ລາວ ກ່າວວ່າ: ກອງປະຊຸມເທື່ອນີ້ ບໍ່ພຽງແຕ່ມີຄວາມໝາຍສຳຄັນເປັນພິເສດຕໍ່ບັນດາປະເທດແມ່ນ້ຳລ້ານຊ້າງ-ແມ່ນ້ຳຂອງເທົ່ານັ້ນ, ແລະມີຄວາມໝາຍສຳຄັນຕໍ່ບັນດາປະເທດທີ່ໄດ້ຮັບຜົນປະໂຫຍດໂດຍກົງ ຫຼື ທາງອ້ອມຈາກແມ່ນ້ຳລ້ານຊ້າງ-ແມ່ນ້ຳຂອງເຊັ່ນດຽວກັນ. ຂະນະທີ່ກອງປະຊຸມສຸດຍອດເທື່ອນີ້ ຈະກາຍເປັນຈຸດເລີ່ມຕົ້ນໃໝ່ແຫ່ງການຮ່ວມມືລະຫວ່າງສື່ມວນຊົນ 6 ປະເທດ ແລະເຮັດໃຫ້ການຮ່ວມມືດັ່ງກ່າວເຂົ້າສູ່ລວງເລິກຕື່ມອີກ. ແນວໃດກໍຕາມ, ລາວຈະຕັ້ງໜ້າກະກຽມກອງປະຊຸມສຸດຍອດຄັ້ງໜ້າ, ເຮັດໃຫ້ກອງປະຊຸມນີ້ກາຍເປັນເວທີທີ່ດີທີ່ສຸດສຳລັບການແລກປ່ຽນລະຫວ່າງສື່ມວນຊົນບັນດາປະເທດແມ່ນ້ຳລ້ານຊ້າງ-ແມ່ນ້ຳຂອງ ແລະຊຸກຍູ້ການປະຕິບັດກົນໄກການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ ເຊິ່ງບໍ່ພຽງແຕ່ຈະເຮັດໃຫ້ປະຊາຊົນໄດ້ຮັບຜົນປະໂຫຍດເທົ່ານັ້ນ, ຫາກຍັງຈະຊຸກຍູ້ສັນຕິພາບ ແລະຄວາມຈະເລີນຮຸ່ງເຮືອງຂອງພາກພື້ນອາຊີ ແລະຊຸກຍູ້ການພັດທະນາເສດຖະກິດໂລກາພິວັດ ກໍຄືການຮ່ວມມືພາກພື້ນອາຊີປາຊີຟິກອີກດ້ວຍ.
ບັນດາຝ່າຍທີ່ເຂົ້າຮ່ວມກອງປະຊຸມ ໄດ້ຮ່ວມກັນລົງນາມໃນ "ຖະແຫຼງການຮ່ວມສື່ມວນຊົນວ່າດ້ວຍການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ" ໂດຍເນັ້ນວ່າ: ການຮ່ວມມືລະຫວ່າງສື່ມວນຊົນແມ່ນພາກສ່ວນປະກອບສຳຄັນຂອງການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ, ການທີ່ຮ່ວມກັນຊຸກຍູ້ການພັດທະນາພາກພື້ນແມ່ນ້ຳລ້ານຊ້າງ-ແມ່ນ້ຳຂອງ ແລະ ສ້າງຄວາມຜາສຸກໃຫ້ແກ່ປະຊາຊົນພາກພື້ນແຫ່ງນີ້ ແມ່ນຄວາມປາຖະໜາຮ່ວມ ແລະ ຄວາມຮັບຜິດຊອບທີ່ຕ້ອງປະຕິບັດໃຫ້ສຳເລັດຂອງສື່ມວນຊົນສຳຄັນຂອງບັນດາປະເທດແມ່ນ້ຳລ້ານຊ້າງ-ແມ່ນ້ຳຂອງ.
ກອງປະຊຸມສຸດຍອດສື່ມວນຊົນຂອງການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ ແມ່ນຈັດຂຶ້ນເປັນຄັງທຳອິດໃນປີນີ້ ໂດຍມີເປົ້າໝາຍເພື່ອສ້າງໃຫ້ເປັນເວທີການຮ່ວມມືທີ່ 6 ປະເທດເຂົ້າຮ່ວມ ແລະຮ່ວມກັນກໍ່ສ້າງ. ສ່ວນກອງປະຊຸມຄັ້ງໜ້າ ຈະຈັດຂຶ້ນຢູ່ລາວ ທີ່ເປັນປະເທດປະທານໝູນວຽນຮ່ວມຂອງການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງໃນປີ 2018.
