ທ່ານນາງຮວ້າຊຸ່ນຢິງ ໂຄສົກກະຊວງການຕ່າງປະເທດຈີນຢືນຢັນໃນພິທີຖະແຫຼງຂ່າວໃນວັນທີ 22 ທັນວານີ້ວ່າ: ໂຄງການຮ່ວມມືທາງລົດໄຟຈີນ-ໄທເປັນໂຄງການສຳຄັນລະຫວ່າງສອງຝ່າຍໃນການຮ່ວມກັນສ້າງ "ໜຶ່ງແລວທາງໜຶ່ງເສັ້ນທາງ"ແລະດຳເນີນການຮ່ວມມືດ້ານຂີດຄວາມສາມາດການຜະລິດ. ຈາກນີ້, ຈີນຫວັງໃຫ້ສອງຝ່າຍຈະສືບຕໍ່ຮັກສາການຮ່ວມມືກັນຢ່າງໃກ້ຊິດເພື່ອພະຍາຍາມສູ້ຊົນເຮັດໃຫ້ການເຊື່ອມຈອດທາງລົດໄຟຈີນ-ໄທແລະທາງລົດໄຟຈີນ-ລາວບັນລຸຜົນເປັນຈິງໂດຍໄວ.
ກໍລະນີຕອບຄຳຖາມກ່ຽວກັບພິທີເລີ່ມກໍ່ສ້າງທາງລົດໄຟຈີນ-ໄທໄລຍະທີ 1 ໄດ້ຈັດຂຶ້ນຢູ່ໄທໃນວັນທີ 21 ທັນວານີ້,ທ່ານນາງຮວ້າຊຸ່ນຢິງກ່າວວ່າ: ໂຄງການຮ່ວມມືທາງລົດໄຟຈີນ-ໄທເປັນໂຄງການສຳຄັນລະຫວ່າງສອງຝ່າຍໃນການຮ່ວມກັນສ້າງ "ໜຶ່ງແລວທາງໜຶ່ງເສັ້ນທາງ"ແລະດຳເນີນການຮ່ວມມືທາງດ້ານຂີດຄວາມສາມາດການຜະລິດ ເຊິ່ງສ່ອງແສງໃຫ້ເຫັນເຖິງຈິດໃຈປຶກສາຫາລືຮ່ວມກັນ, ສ້າງສາຮ່ວມກັນແລະມີຜົນປະໂຫຍດຮ່ວມກັນ ທັງຈະຍົກສູງລະດັບການກໍ່ສ້າງພື້ນຖານໂຄງລ່າງແລະການເຊື່ອມຈອດກັນຂອງໄທແລະພາກພື້ນຢ່າງມີປະສິດທິຜົນ. ຈີນຫວັງວ່າສອງຝ່າຍຈະສືບຕໍ່ຮັກສາການຮ່ວມມືກັນຢ່າງໃກ້ຊິດເພື່ອພະຍາຍາມສູ້ຊົນເຮັດໃຫ້ການເຊື່ອມຈອດທາງລົດໄຟຈີນ-ໄທແລະທາງລົດໄຟຈີນ-ລາວບັນລຸຜົນເປັນຈິງໂດຍໄວ, ສົ່ງເສີມການແລກປ່ຽນດ້ານເສດຖະກິດການຄ້າແລະການໄປມາຫາສູ່ກັນລະຫວ່າງບຸກຄະລາກອນຂອງບັນດາປະເທດລຽບຕາມທາງລົດໄຟດັ່ງກ່າວເພື່ອບັນລຸໃຫ້ຕ່າງຝ່າຍຕ່າງໄດ້ຮັບຜົນປະໂຫຍດນຳກັນ.
ທ່ານນາງຮວ້າຊຸ່ນຢິງຍັງກ່າວຕື່ມວ່າ: ຈີນຍິນດີຮ່ວມກັບໄທສືບຕໍ່ເພີ່ມທະວີການເຊື່ອມຕໍ່ຍຸດທະສາດການພັດທະນາໂດຍຖືໂຄງການຮ່ວມມືທາງລົດໄຟຈີນ-ໄທເປັນເວທີໃໝ່ເພື່ອສົ່ງເສີມການຮ່ວມມືຕົວຈິງແບບຕ່າງຝ່າຍຕ່າງມີຜົນປະໂຫຍດລະຫວ່າງສອງປະເທດຢ່າງຕໍ່ເນື່ອງແລະຊຸກຍູ້ສາຍພົວພັນຄູ່ຮ່ວມມືຍຸດທະສາດຮອບດ້ານຈີນ-ໄທໃຫ້ຂະຫຍາຍຕົວຫຼາຍກວ່າເກົ່າ.
 |
