ຄະນະຜູ້ແທນພັກກອມມູນິດຈີນ ນຳໂດຍທ່ານວາງກວ່າງເຫວີຍ ຫົວໜ້າສະຖາບັນວິທະຍາສາດສັງຄົມຈີນໄດ້ຈັດກອງປະຊຸມເພື່ອເຜີຍແຜ່ເນື້ອໃນຈິດໃຈກອງປະຊຸມໃຫຍ່ຄັ້ງທີ 19 ຂອງພັກກອມມູນິດຈີນຢູ່ນະຄອນຢາງກຸ້ງ ໃນວັນທີ 22 ທັນວານີ້ໂດຍບຸກຄົນຈາກວົງການຕ່າງໆຂອງມຽນມາເປັນຕົ້ນ ພັກການເມືອງ,ລັດຖະບານ,ວົງການທຸລະກິດແລະອື່ນໆຫຼາຍຮ້ອຍທ່ານທີ່ຮ່ວມປະຊຸມໄດ້ຢືນຢັນວ່າ ບົດຮຽນຂອງຈີນໃນການບໍລິຫານປະເທດເປັນບົດຮຽນທີ່ດີແລະຄວນຖອດຖອນເປັນຢ່າງຍິ່ງເພື່ອນຳມາໝູນໃຊ້ໃນການບໍລິຫານປະເທດຕົນ.
ທ່ານໄອກິວ ກຳມະການ ພັກສັນນິບາດປະຊາທິປະໄຕແຫ່ງຊາດມຽນມາຫຼືNLD, ຫົວໜ້າບັນນາທິການໜັງສືພິມD-Wave ສຽງຂອງພັກ NLDກ່າວວ່າ: ກອງປະຊຸມຄັ້ງນີ້ເປັນການຈັດວາງທີ່ດີທີ່ສຸດ ເຊິ່ງສາມາດເຮັດໃຫ້ພັກການເມືອງແລະປະຊາຊົນມຽນມາເຂົ້າໃຈກອງປະຊຸມໃຫຍ່ຄັ້ງທີ 19 ຂອງພັກກອມມູນິດຈີນຫຼາຍກວ່າເກົ່າ.
ທ່ານໄອກິວທີ່ເຄີຍ ໄປປັກກິ່ງເພື່ອເກັບກຳຂ່າວກອງປະຊຸມໃຫຍ່ຄັ້ງທີ 19 ຂອງພັກກອມມູນິດຈີນນັ້ນກ່າວວ່າ: ບົດລາຍງານຂອງກອງປະຊຸມໃຫຍ່ຄັ້ງທີ 19 ຂອງພັກກອມມູນິດຈີນມີຫຼາຍບ່ອນທີ່ໜ້າຄົ້ນຄວ້າແລະຮ່ຳຮຽນທີ່ສຸດ. ໃນນີ້, ການທີ່ຈີນຕັ້ງເປົ້າໝາຍສ້າງໃຫ້ເປັນປະເທດສັງຄົມນິຍົມທີ່ເຂັ້ມແຂງແລະທັນສະໄໝນັ້ນເຮັດໃຫ້ທ່ານຮູ້ສຶກປະທັບໃຈຫຼາຍ ແລະທ່ານຍັງເອົາໃຈໃສ່ເນື້ອໃນບົດລາຍງານກ່ຽວກັບການຕ້ານການສໍ້ລາດບັງຫຼວງ, ທ່ານກ່າວຕື່ມວ່າ: ຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ"ຂອງຈີນຈະນຳເອົາຜົນປະໂຫຍດມາໃຫ້ມຽນມາແລະສ້າງໂອກາດໃໝ່ໃຫ້ແກ່ມຽນມາໃນການພັດທະນາປະເທດ.
 |
