ໜັງສືພິມເຢິນມິນຢື້ປ້າວຫຼືປະຊາຊົນລາຍວັນຂອງຈີນລາຍງານວ່າ: ຄຽງຄູ່ກັບທ້າຍປີ 2017 ວຽນມາເຖິງ, ທ່ານວາງຢີ້ ລັດຖະມົນຕີກະຊວງການຕ່າງປະເທດຈີນໄດ້ໃຫ້ສຳພາດຕໍ່ນັກຂ່າວໂດຍລົງເລິກ ໝາກຜົນລັກສະນະປະດິດສ້າງຂອງວຽກງານການຕ່າງປະເທດຂອງຈີນໃນໄລຍະໜຶ່ງປີຜ່ານມາ. ທ່ານກ່າວວ່າ: ປີ 2017 ເປັນປີທີ່ມີຄວາມໝາຍແລະເປັນນິມິດໝາຍບໍ່ວ່າຈະເວົ້າສຳລັບທົ່ວໂລກກໍຄືຈີນ, ໂດຍສະເພາະກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 19 ຂອງພັກກອມມູນິດຈີນໄຂຂຶ້ນຢ່າງມີໄຊນັ້ນໄດ້ກຳນົດແນວຄິດສີຈິ້ນຜິງກ່ຽວກັບສັງຄົມນິຍົມທີ່ມີສີສັນພິເສດຂອງຈີນໃນຍຸກໃໝ່ ເຊິ່ງເປັນການເລີ່ມອອກເດີນທາງຄັ້ງໃໝ່ແຫ່ງການສ້າງປະເທດສັງຄົມນິຍົມທັນສະໄໝຮອບດ້ານ.
ທ່ານສີຈິ້ນຜິງ ປະທານປະເທດຈີນໄດ້ກ່າວປາຖະກະຖາສຳຄັນໃນກອງປະຊຸມເວທີປຶກສາຫາລືເສດຖະກິດໂລກດາວົສ 2017 ແລະຢູ່ສຳນັກງານໃຫຍ່ອົງການສະຫະປະຊາຊາດທີ່ເຊີແນວໂດຍໄດ້ສະເໜີຂໍ້ລິເລີ່ມຊຸກຍູ້ຂະບວນການໂລກາພິວັດເສດຖະກິດໃຫ້ກ້ຳເກິ່ງກັນຄືນໃໝ່ແລະຮ່ວມກັນສ້າງປະຊາຄົມຮ່ວມຊາຕາກຳມວນມະນຸດ. ຢູ່ໃນກອງປະຊຸມສຸດຍອດກຸ່ມG20ທີ່ແຮມເບີກ ປະເທດເຢຍລະມັນແລະກອງປະຊຸມຜູ້ນຳອົງການອາເປັກທີ່ດານັງ ປະເທດຫວຽດນາມ,ທ່ານສີຈິ້ນຜິງໄດ້ບັນຍາຍທັດສະນະຄະຕິຈີນກ່ຽວກັບການສ້າງເສດຖະກິດໂລກແບບເປີດປະຕູ,ສົ່ງເສີມຂະບວນການເຊື່ອມໂຍງເຂົ້າກັນດ້ານເສດຖະກິດອາຊີປາຊີຟິກ. ນອກນີ້, ຈີນຍັງໄດ້ປະສົບຜົນສຳເລັດໃນການເປັນເຈົ້າພາບຈັດກອງປະຊຸມສຸດຍອດເວທີປຶກສາຫາລືການຮ່ວມມືສາກົນ "ໜຶ່ງແລວທາງໜຶ່ງເສັ້ນທາງ", ກອງປະຊຸມສຸດຍອດປະເທດບຣິກສທີ່ເຊ້ຍເມີນແລະກອງປະຊຸມສົນທະນາລະຫວ່າງປະເທດທີ່ເປັນຕະຫຼາດພັດທະນາໃໝ່ກັບປະເທດທີ່ກຳລັງພັດທະນາ.
ທ່ານວາງຢີ້ກ່າວວ່າ: ປີ 2017, ຈີນໄດ້ຕັ້ງໜ້າສ້າງສາຍພົວພັນຄູ່ຮ່ວມມືທີ່ເຈລະຈາກັນແຕ່ບໍ່ເປັນປໍລະປັກກັນ, ຜູກເປັນຄູ່ຮ່ວມມືແຕ່ບໍ່ຮ່ວມກຸ່ມ ທັງຮ່ວມກັບບັນດາປະເທດສຸມໃສ່ການຮັກສາສັນຕິພາບຖາວອນແລະຄວາມຈະເລີນຮຸ່ງເຮືອງໂດຍທົ່ວໄປເຊິ່ງເຫັນໄດ້ຈາກ 4 ດ້ານຄື:
ໜຶ່ງ, ໄດ້ຮັບຄວາມຄືບໜ້າໃໝ່ໃນການປະສານງານແລະຮ່ວມມືກັນກັບປະເທດໃຫຍ່ທີ່ສຳຄັນໃນໂລກ. ປະມຸກລັດຈີນ-ອາເມລິກາໄດ້ພົບປະກັນ 3 ເທື່ອພາຍໃນໄລຍະໜຶ່ງປີ ທັງສົນທະນາທາງໂທລະສັບແລະທາງຈົດໝາຍຫຼາຍເທື່ອ; ປະມຸກລັດຈີນ-ຣັດເຊຍໄດ້ພົບປະກັນ 5 ເທື່ອ, ການຮ່ວມມືຕົວຈິງລະຫວ່າງສອງຝ່າຍ ມີທ່ວງທ່າຂະຫຍາຍຕົວຢ່າງເຂັ້ມແຂງ, ສາຍພົວພັນຈີນ-ເອີຣົບມີຄວາມຄືບໜ້າຢ່າງໜັກແໜ້ນ, ການແລກປ່ຽນແລະການຮ່ວມມືແບບຕ່າງຝ່າຍຕ່າງມີຜົນປະໂຫຍດໃນຂົງເຂດຕ່າງໆໄດ້ເປີດກວ້າງຕື່ມອີກ.
ສອງ: ມິດຕະພາບຖານບ້ານໃກ້ເຮືອນຄຽງລະຫວ່າງຈີນກັບບັນດາປະເທດອ້ອມຂ້າງໄດ້ຂະຫຍາຍຕົວ ຂຶ້ນສູ່ລະດັບໃໝ່. ຫຼັງກອງປະຊຸມໃຫຍ່ຄັ້ງທີ 19 ຂອງພັກກອມມູນິດຈີນ, ທ່ານປະທານສີຈິ້ນຜິງໄດ້ເລືອກເອົາຫວຽດນາມແລະລາວເປັນສອງປະເທດທຳອິດໃນການຢ້ຽມຢາມຕ່າງປະເທດຂອງຕົນ ເຊິ່ງເປັນການສົ່ງສັນຍານອັນຈະແຈ້ງແຫ່ງການສ້າງຄູ່ຮ່ວມຊາຕາກຳກັບບັນດາປະເທດອ້ອມຂ້າງ. ທ່ານນາຍົກລັດຖະມົນຕີຫຼີເຄີ້ສຽງເຂົ້າຮ່ວມກອງປະຊຸມຕ່າງໆຂອບການຮ່ວມມືອາຊີຕາເວັນອອກ ເຊິ່ງໄດ້ຊຸກຍູ້ສາຍພົວພັນຈີນ-ອາຊຽນຂະຫຍາຍຕົວຈາກໄລຍະເຕີບໃຫຍ່ກ້າວໄປສູ່ໄລຍະສົມບູນ. ຈີນ-ສ ເກົາຫຼີບັນລຸຄວາມເປັນເອກະພາບກັນໃນເບື້ອງຕົ້ນກ່ຽວກັບການແກ້ໄຂບັນຫາອາເມລິກາຕິດຕັ້ງລະບົບຕ້ານຂີປະນາວຸດຫຼືທັດຢູ່ສ ເກົາຫຼີ, ສາຍພົວພັນຈີນ-ຍີ່ປຸ່ນ ມີທ່ວງທ່າຂະຫບາຍຕົວແລະປັບປຸງໃຫ້ດີຂຶ້ນ. ຈີນຍຶດໝັ້ນເປົ້າໝາຍເຮັດໃຫ້ແຫຼມເກົາຫຼີປອດອາວຸດນີວເຄລຍ, ຂະນະດຽວກັນກໍໄດ້ຮ່ວມກັບ ອາຊຽນບັນລຸຂອບກົດແຫ່ງການປະພຶດຢູ່ທະເລຈີນໃຕ້ ທັງປະກາດເລີ່ມຕົ້ນການປຶກສາຫາລືເອກະສານກົດແຫ່ງການປະພຶດຢູ່ທະເລຈີນໃຕ້ໃນຕົວຈິງ ເຊິ່ງໄດ້ເສີມຂະຫຍາຍບົດບາດທີ່ມີລັກສະນະສ້າງສັນໃນການຮັກສາສັນຕິພາບແລະສະຖຽນລະພາບຂອງພາກພື້ນ.
ສາມ: ໄດ້ຮັບຜົນສຳເລັດໃໝ່ໃນການຮ່ວມມືກັບບັນດາປະເທດພວມພັດທະນາ.
ສີ່: ອະທິປະໄຕແລະຜົນປະໂຫຍດທີ່ຊອບດ້ວຍກົດໝາຍຂອງຈີນໄດ້ຮັບການປົກປັກຮັກສາຢ່າງແຂງແຮງ. ຈີນໄດ້ນຳໃຊ້ວິທີທາງການທູດ ແລະສາມາດແກ້ໄຂເຫດການດົມລາງທີ່ທະຫານກອງປ້ອງກັນຊາຍແດນອິນເດຍຂ້າມຊາຍແດນເຂົ້າດິນແດນປະເທດຈີນນັ້ນໂດຍສັນຕິ ເຊິ່ງບໍ່ພຽງແຕ່ໄດ້ຮັກສາຜືນແຜ່ນດິນແລະອະທິປະໄຕຂອງປະເທດຕົນເທົ່ານັ້ນ, ຍັງສາມາດຮັກສາທິດທາງທີ່ຖືກຕ້ອງຂອງສາຍພົວພັນຈີນ-ອິນເດຍອີກດ້ວຍ.
