ກອງປະຊຸມພົບປະແລກປ່ຽນລະຫວ່າງລັດຖະມົນຕີກະຊວງການຕ່າງປະເທດຈີນ, ອັຟການິສະຖານ ແລະ ປາກິສະຖານຄັ້ງທຳອິດ ໄດ້ຈັດຂຶ້ນຢູ່ນະຄອນຫຼວງປັກກິ່ງໃນວັນທີ 26 ທັນວານີ້ ແຕ່ມີສື່ມວນຊົນຈຳນວນໜຶ່ງໄດ້ລາຍງານຂ່າວ ໂດຍພາດຫົວວ່າ "ແລວທາງເສດຖະກິດຈີນ-ປາກິສະຖານແກ່ຍາວໄປຮອດອັຟການິສະຖານ ແມ່ນເພື່ອປິດລ້ອມອິນເດຍບໍ່?" ທັງກ່າວວ່າ: ແຜນການແລວທາງເສດຖະກິດຈີນ-ປາກິສະຖານແກ່ຍາວໄປຮອດອັຟການິສະຖານເຮັດໃຫ້ອິນເດຍຮູ້ສຶກເປັນຫ່ວງ ເພາະວ່າແຜນການດັ່ງກ່າວອາດຈະເຮັດໃຫ້ອິດທິພົນຂອງຈີນແຜ່ຂະຫຍາຍເຂົ້າສູ່ອາຊີກາງຕື່ມອີກ ທັງເຊື່ອມຕໍ່ກັບອາຊີໃຕ້".
ຕໍ່ເລື່ອງນີ້, ທ່ານນາງຮວ້າຊຸ່ນຢິງ ໂຄສົກກະຊວງການຕ່າງປະເທດຈີນ ໄດ້ກ່າວໃນພິທີຖະແຫຼງຂ່າວ ຢູ່ນະຄອນຫຼວງປັກກິ່ງໃນວັນທີ 27 ທັນວານີ້ວ່າ: ອັຟການິສະຖານແລະປາກິສະຖານແມ່ນປະເທດໃກ້ຄຽງທີ່ສຳຄັນຂອງຈີນ, ຂະນະທີ່ສອງປະເທດນີ້ມີຄວາມປາຖະໜາອັນແຮງກ້າໃນການພັດທະນາເສດຖະກິດ ແລະ ປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ ແລະກໍຍິນດີເຊື່ອມຕໍ່ເຂົ້າກັບຂະບວນການເຊື່ອມຈອດພາກພື້ນ ໂດຍຫວັງຈະສາມາດເສີມຂະຫຍາຍທ່າແຮງທາງພູມມີປະເທດຂອງຕົນໃນການເຊື່ອມຕໍ່ແລວທາງເສດຖະກິດຈີນ-ປາກິສະຖານ ແລະ ແລວທາງເສດຖະກິດຈີນ-ອາຊີກາງ-ອາຊີຕາເວັນຕົກ. ດັ່ງນັ້ນ, 3 ຝ່າຍຈຶ່ງເຫັນດີຮ່ວມກັນຊຸກຍູ້ການເຊື່ອມຈອດທີ່ກວ້າງຂວາງກວ່າເກົ່າໃນຂອບ "ໜຶ່ງແລວທາງໜຶ່ງເສັ້ນທາງ ໂດຍຍຶດໝັ້ນຫຼັກການທີ່ແກ້ໄຂບັນຫາງ່າຍໄປກ່ອນ, ໂດຍສະເພາະຕ້ອງແກ້ໄຂບັນຫານ້ອຍກ່ອນແລ້ວຈຶ່ງແກ້ໄຂບັນຫາໃຫຍ່ ແລະ ຄ່ອຍເປັນຄ່ອຍໄປ ແລະກຳນົດໂຄງການຮ່ວມມືທີ່ເປັນຮູບປະທຳໂດຍຜ່ານການປຶກສາຫາລືຢ່າງສະເໝີພາບລະຫວ່າງ 3 ຝ່າຍ, ບັນລຸການພັດທະນາແລະຄວາມໝັ້ນຄົງຮ່ວມກັນ, ສຸມໃສ່ຮັກສາສັນຕິຖາບແລະສະຖຽນລະພາບຂອງພາກພື້ນ ທັງນີ້ກໍສອດຄ່ອງກັບຄວາມຕ້ອງການຂອງຈີນ, ປາກິສະຖານ ແລະ ອັຟການິສະຖານ, ທັງສອດຄ່ອງກັບຜົນປະໂຫຍດຮ່ວມຂອງ 3 ປະເທດເຊັ່ນດຽວກັນ. ການແລກປ່ຽນແລະຮ່ວມມືລະຫວ່າງ 3 ປະເທດບໍ່ໄດ້ຖືປະເທດອື່ນໃດເປັນເປົ້າໝາຍ ຈຶ່ງບໍ່ຄວນຖືກລົບກວນຈາກບັນດາປະເທດ ແລະ ອິດທິກຳລັງອື່ນໆ.