ປີ 2017 ແມ່ນປີທີ່ອາຊຽນສ້າງຕັ້ງຂຶ້ນຄົບຮອບ 50 ປີ ແລະໃນປີນີ້, ກອງປະຊຸມຜູ້ແທນທົ່ວປະເທດຂອງພັກກອມມູນິດຈີນຄັ້ງທີ 19 ໄດ້ຈັດຂຶ້ນຢ່າງມີໄຊຢູ່ນະຄອນຫຼວງປັກກິ່ງ ແລະຫຼັງສຳເລັດກອງປະຊຸມດັ່ງກ່າວ, ທ່ານສີຈິ້ນຜິງ ປະທານປະເທດຈີນໄດ້ເລືອກຫວຽດນາມ ແລະ ລາວ ເຊິ່ງເປັນສອງປະເທດໃກ້ຄຽງຂອງຈີນເປັນເປົ້າໝາຍໃນການເດີນທາງຢ້ຽມຢາມຕ່າງປະເທດຄັ້ງທຳອິດຂອງຕົນ ເປັນການສົ່ງສັນຍານອັນຈະແຈ້ງທີ່ຈະສ້າງປະຊາຄົມຮ່ວມຊາຕາກຳກັບປະເທດອ້ອມຂ້າງ. ຈາກນັ້ນ, ທ່ານຫຼີເຄີ້ສຽງ ນາຍົກລັດຖະມົນຕີຈີນ ໄດ້ເດີນທາງເຂົ້າຮ່ວມກອງປະຊຸມຕ່າງໆຂອງຜູ້ນຳການຮ່ວມມືອາຊີຕາເວັນອອກ ທີ່ຈັດຂຶ້ນຢູ່ນະຄອນຫຼວງມະນີລາ ປະເທດຟິລິບປິນ ແລະຊຸກຍູ້ສາຍພົວພັນລະຫວ່າງຈີນ-ອາຊຽນໃຫ້ພັດທະນາຈາກໄລຍະເຕີບໂຕກ້າວສູ່ໄລຍະສົມບູນ. ບັນດາຜູ້ຊ່ຽວຊານທີ່ຄົ້ນຄວ້າບັນຫາກ່ຽວກັບຈີນແລະອາຊຽນໄດ້ໃຫ້ສຳພາດຕໍ່ນັກຂ່າວວິທະຍຸສາກົນແຫ່ງປະເທດຈີນ ຫຼື CRI ໂດຍໄດ້ຕີລາຄາຢ່າງຕັ້ງໜ້າຕໍ່ການພັດທະນາສາຍພົວພັນລະຫວ່າງຈີນ-ອາຊຽນ.
ທ່ານຈ່າງເສກ່າງ ຮອງຫົວໜ້າສະຖາບັນອາຊີໃຕ້-ອາຊີຕາເວັນອອກສຽງໃຕ້ ຂອງສະຖາບັນຄົ້ນຄວ້າການພົວພັນສາກົນຍຸກປັດຈຸບັນຈີນ ເຫັນວ່າ: ໃນປີ 2017, ຈີນແລະອາຊຽນຕ່າງກໍສະໜັບສະໜູນຕໍ່ກິດຈະກຳຕ່າງປະເທດທີ່ສຳຄັນທີ່ຈັດຂຶ້ນຢູ່ແຕ່ລະຝ່າຍ ເຊິ່ງໄດ້ສະແດງໃຫ້ເຫັນເຖິງການເອົາໃຈໃສ່ແລະໃຫ້ຄວາມສຳຄັນຢ່າງສູງຕໍ່ສາຍພົວພັນລະຫວ່າງສອງຝ່າຍ ແລະ ການສະໜັບສະໜູນຢ່າງເດັດດ່ຽວຈາກຈີນທີ່ມີຕໍ່ອາຊຽນໃນການຮ່ວມມືໃນພາກພື້ນ. ທ່ານຈ່າງເສກ່າງ ກ່າວວ່າ: "ໃນດ້ານການເມືອງແລະການຕ່າງປະເທດ, ສອງຝ່າຍຕ່າງກໍສະໜັບສະໜູນຕໍ່ກິດຈະກຳຕ່າງປະເທດທີ່ຈັດຂຶ້ນຢູ່ແຕ່ລະຝ່າຍ ແລະ ຜູ້ນຳຈີນແລະອາຊຽນຢ້ຽມຢາມກັນໄດ້ມີຂຶ້ນເປັນປົກກະຕິເໝືອນດັ່ງໄປຢ້ຽມຢາມຍາດພີ່ນ້ອງ ຄື ເມື່ອເດືອນພຶດສະພາ, ປະມຸກລັດ ຫຼື ຫົວໜ້າລັດຖະບານຂອງ 7 ປະເທດໃນອາຊຽນໄດ້ເດີນທາງ ເຂົ້າຮ່ວມກອງປະຊຸມເວທີປຶກສາຫາລືສຸດຍອດ "ໜຶ່ງແລວທາງໜຶ່ງເສັ້ນທາງ" ທີ່ຈັດຂຶ້ນຢູ່ນະຄອນຫຼວງປັກກິ່ງ ເຊິ່ງອາຊີຕາເວັນອອກສຽງໃຕ້ໄດ້ເປັນໜຶ່ງໃນພາກພື້ນຕ່າງໆທີ່ມີຜູ້ນຳເຂົ້າຮ່ວມກອງປະຊຸມດັ່ງກ່າວຫຼາຍກວ່າໝູ່; ຮອດທ້າຍປີ 2017 ກໍມີກິດຈະກຳຕ່າງປະເທດທີ່ສຳຄັນຕ່າງໆ ທີ່ອາຊຽນເປັນເຈົ້າພາບ, ທ່ານສີຈິ້ນຜິງ ປະທານປະເທດຈີນ ກໍໄດ້ເດີນທາງເຂົ້າຮ່ວມກອງປະຊຸມສຸດຍອດອາເປັກ ແລະທ່ານຫຼີເຄີ້ສຽງ ນາຍົກລັດຖະມົນຕີຈີນ ກໍໄດ້ເດີນທາງເຂົ້າຮ່ວມບັນດາກອງປະຊຸມສຸດຍອດອາຊີຕາເວັນອອກ ແລະໄດ້ຮັບການຍ້ອງຍໍຊົມເຊີຍຢ່າງສູງຈາກອາຊຽນ."
ທ່ານ ສີລີ້ຜິງ ຫົວໜ້າສູນຄົ້ນຄວ້າອາຊີຕາເວັນອອກ ສະຖາບັນວິທະຍາສາດ-ສັງຄົມແຫ່ງຊາດຈີນ ເຫັນວ່າ: ສາຍພົວພັນລະຫວ່າງຈີນ-ອາຊຽນໃນປີ 2017 ມີຈຸດຮຸ່ງໃສສອງຈຸດ. ທ່ານເວົ້າວ່າ: "ຈຸດທີ 1 ຄື ບັນຫາທະເລຈີນໃຕ້ໄດ້ມີການບຸກທະລຸ ໂດຍຝ່າຍຕ່າງໆສາມາດບັນລຸຄວາມເປັນເອກະພາບກັນກ່ຽວກັບຂອບ "ກົດແຫ່ງການປະພຶດໃນທະເລຈີນໃຕ້(COC)" ແລະ ຈຸດທີ 2 ຄື ຖືເອົາກົນໄກການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງເປັນຫຼັກ, ລົງເລິກແລະຊຸກຍູ້ການຮ່ວມມືລະຫວ່າງຈີນ ແລະ ອາຊຽນ."
ນັບແຕ່ເດືອນມັງກອນຫາເດືອນຕຸລາປີ 2017, ມູນຄ່າການຄ້າລະຫວ່າງຈີນແລະອາຊຽນ ໄດ້ເພີ່ມຂຶ້ນ 18,5% ເມື່ອທຽບໃສ່ໄລຍະດຽວກັນຂອງປີ 2016. ທ່ານຈາຍຄຸ່ນ ສາສະດາຈານສະຖາບັນການພົວພັນສາກົນ ມະຫາວິທະຍາໄລປັກກິ່ງ ເຫັນວ່າ: ໃນປີ 2017, ການຮ່ວມມືລະຫວ່າງຈີນ-ອາຊຽນ ໄດ້ດຳເນີນໃນຂອບ "ໜຶ່ງແລວທາງໜຶ່ງເສັ້ນທາງ" ຖ້າເວົ້າລະອຽດແລ້ວກໍຄື ການສ້າງ "ເສັ້ນທາງສາຍໄໝທາງທະເລສະຕະວັດທີ 21". ທ່ານຈາຍຄຸ່ນ ເຫັນວ່າ: ຈີນແລະອາຊຽນໄດ້ຮັບຄວາມຄືບໜ້າຢ່າງໃຫຍ່ຫຼວງໃນດ້ານຕ່າງໆ ເປັນຕົ້ນ ການແລກປ່ຽນນະໂຍບາຍ, ການເຊື່ອມຕໍ່ພື້ນຖານໂຄງລ່າງ, ການສ້າງຄວາມສະດວກໃຫ້ແກ່ການຄ້າສອງຝ່າຍ, ທຸລະກຳທາງການເງິນ ແລະ ການເຊື່ອມສຳພັນທາງຈິດໃຈຂອງປະຊາຊົນ.
ປີ 2018 ເປັນປີແຫ່ງການສ້າງການພົວພັນຄູ່ຮ່ວມຍຸດທະສາດຈີນ-ອາຊຽນຄົບຮອບ 15 ປີ ແລະສອງຝ່າຍຈະວາງ "ວິໄສທັດຮອດປີ 2030 ຂອງສາຍພົວພັນຄູ່ຮ່ວມຍຸດທະສາດຈີນ-ອາຊຽນ". ໃນໄລຍະກອງປະຊຸມສຸດຍອດອາເປັກທີ່ຈັດຂຶ້ນຢູ່ນະຄອນດານັງ ປະເທດຫວຽດນາມໃນເດືອນພະຈິກປີນີ້, ທ່ານສີຈິ້ນຜິງ ປະທານປະເທດຈີນ ໄດ້ກ່າວຂະນະເວົ້າເຖິງສາຍພົວພັນຈີນ-ອາຊຽນນັ້ນວ່າ: ຈະຕ້ອງສ້າງສາຍພົວພັນຄູ່ຮ່ວມຍຸດທະສາດຈີນ-ອາຊຽນໃຫ້ພັດທະນາຂຶ້ນສູ່ລະດັບສູງກວ່າເກົ່າ ແລະກ້າວສູ່ປະຊາຄົມຮ່ວມຊາຕາກຳຈີນ-ອາຊຽນທີ່ແໜ້ນແຟ້ນຍິ່ງຂຶ້ນ.
