ອິສຣາແອນໄດ້ແຈ້ງໃຫ້ທ່ານນາງໂອເດຣ ອາຊູເລ ຜູ່ອຳນວຍການໃຫຍ່ອົງການການສຶກສາ, ວິທະຍາສາດແລະວັດທະນະທຳຂອງສະຫະປະຊາຊາດຫຼື UNESCO ຊາບຢ່າງເປັນທາງການໃນວັນທີ 29 ທັນວານີ້ວ່າ, ຈະຖອນອອກຈາກອົງການດັ່ງກ່າວໃນວັນທີ 31 ທັນວາ ປີ 2018.
ທັງນີ້, ທ່ານນາງ ອາຊູເລໄດ້ອອກຖະແຫຼງການໃນວັນດັ່ງກ່າວວ່າ, ລັດຖະບານອິສຣາແອນໄດ້ແຈ້ງໃຫ້ຕົນຊາບໃນມື້ດຽວກັນຢ່າງເປັນທາງການວ່າ, ການຕົກລົງຂອງອິສຣາແອນໃນວັນທີ 12 ຕຸລາປີນີ້ທີ່ວ່າຈະຖອນອອກຈາກອົງການຢູ່ເນັສກູນັ້ນຈະເລີ່ມມີຜົນສັກສິດແຕ່ວັນທີ 31 ທັນວາ ປີ 2018 ເປັນຕົ້ນໄປ, ແລະຕົນສະແດງຄວາມເສຍໃຈຕໍ່ການຕົກລົງຂອງອິສຣາແອນ.
ອິສຣາແອນຖອນອອກຈາກ UNESCO ກໍເພື່ອເຮັດຕາມການກະທຳຂອງອາເມລິກາ. ວັນທີ 12 ຕຸລາປີນີ້, ອາເມລິກາປະກາດວ່າຈະຖອນອອກຈາກ UNESCO ໂດຍຫຼາຍສາເຫດລວມທັງ UNESCO ມີຄວາມລຳອຽງຕໍ່ອິສຣາແອນຢູ່ສະເໝີແລະມື້ດຽວກັນ, ອິສຣາແອນກໍຖະແຫຼງວ່າຈະຖອນອອກຈາກອົງການດັ່ງກ່າວເຊັ່ນດຽວກັນ.