ວັນທີ 29 ທັນວານີ້, ທ່ານແຈມສ໌ ມາຕິສ ລັດຖະມົນຕີກະຊວງປ້ອງກັນປະເທດອາເມລິກາໄດ້ກ່າວໃນພິທີຖະແຫຼງຂ່າວວ່າ: ປະເທດຕົນຍັງຖືເອົາການທູດເປັນຊ່ອງທາງຕົ້ນຕໍໃນການແກ້ໄຂບັນຫານິວເຄຼຍຢູ່ແຫຼມເກົາຫຼີ.
ທ່ານມາຕິສກ່າວວ່າ: ປະເທດຕົນກຳລັງນຳໃຊ້ມາດຕະການທາງການທູດ ແລະເສດຖະກິດໃນສາກົນ ແລະທ່ານຣິກສ ຕິເລິເສິນ ລັດຖະມົນຕີກະຊວງການຕ່າງປະເທດອາເມລິກາຈະປຶກສາຫາລືກັບຫຼາຍປະເທດກ່ຽວກັບຍຸດໂທບາຍແກ້ໄຂບັນຫານິວເຄຼຍເກົາຫຼີໃນຕໍ່ໜ້າຢູ່ກາມາດາໃນກາງເດືອນມັງກອນປີ 2018 ນີ້ໄດ້ສະແດງໃຫ້ເຫັນວ່າ ອາເມລິກາຍັງຖືເອົາການທູດເປັນຊ່ອງທາງຕົ້ນຕໍໃນການແກ້ໄຂບັນຫາດັ່ງກ່າວ.
ໃນປີ 2017, ສປປ ເກົາຫຼີໄດ້ທົດລອງນິວເຄຼຍ ແລະຍິງຂີປະນາວຸດຫຼາຍເທື່ອ, ຂະນະທີ່ອາເມລິກາ ແລະສ. ເກົາຫຼີກໍຂະຫຍາຍຂະໜາດການຊ້ອມຮົບ, ເຮັດໃຫ້ສະຖານະການຢູ່ແຫຼມເກົາຫຼີມີທ່າອ່ຽງເຄັ່ງຕຶງຂຶ້ນເລື້ອຍໆ. ຊຸມປີຜ່ານມາ, ອາເມລິກາໄດ້ຂວ້ຳບາດເອກະຊົນ ແລະວິສາຫະກິດສປປ ເກົາຫຼີ ແລະຕ່າງປະເທດໂດຍອ້າງວ່າ ເຂົ້າຮ່ວມ ຫຼື ສະໜັບສະໜູນໂຄງການພັດທະນານິວເຄຼຍ ແລະຂີປະນາວຸດຂອງສປປ ເກົາຫຼີ. ລັດຖະບານທຣຳຍຶດໝັ້ນປະຕິບັດນະໂຍບາຍໃຊ້ "ຄວາມກົດດັນແຮງທີ່ສຸດ" ເພື່ອບັງຄັບໃຫ້ສປປ ເກົາຫຼີປະລະໂຄງການນິວເຄຼຍ.