ທ່ານລຽວຈົງໄລ ລັດຖະມົນຕີກະຊວງຄົມມະນາຄົມມາເລເຊຍທັງເປັນປະທານສະຫະພັນຊາວມາເລເຊຍເຊື້ອສາຍຈີນMCA ໄດ້ຊີ້ໃຫ້ເຫັນໃນໂອກາດກ່າວຄຳອວຍພອນປີໃໝ່ 2018 ຢູ່ນະຄອນຫຼວງກົວລາລຳເປີວ່າ: ສະຫະພັນຄົນຊາວມາເລເຊຍເຊື້ອສາຍຈີນໄດ້ຕັ້ງໜ້ານຳພາປະຊາຊົນມາເລເຊຍເຂົ້າຮ່ວມຂໍ້ລິເລີ່ມ "ໜຶ່ງແລວທາງໜຶ່ງເສັ້ນທາງ" ຂອງຈີນ ເຊິ່ງຂໍລິເລີ່ມດັ່ງກ່າວໄດ້ສ້າງໂອກາດການຄ້າໃຫ້ມາເລເຊຍຢ່າງຫຼວງຫຼາຍ.
ທ່ານລຽວຈົງໄລເຫັນວ່າ: ປີ 2017 ຜ່ານມາ, ເສດຖະກິດມາເລເຊຍພັດທະນາຢ່າງແຂງແຮງ. ຈັງຫວະການເຕີບໂຕຂອງເສດຖະກິດແຕ່ໄຕມາດທີ 1 ຫາໄຕມາດທີ 3 ຂອງປີ 2017 ໄດ້ສ້າງສະຖິຕິໃໝ່ຫຼາຍເທື່ອ ເຊິ່ງເຮັດໃຫ້ມາເລເຊຍກາຍເປັນໜຶ່ງໃນປະເທດທີ່ເສດຖະກິດຂະຫຍາຍຕົວໄວທີ່ສຸດໃນອາຊີຕາເວັນອອກສຽງໃຕ້.
ທ່ານລຽວຈົງໄລກ່າວໂດຍເຊື່ອໝັ້ນວ່າ ປີ 2018 ນີ້ຈະມີໂອກາດການຄ້າແລະທ່າແຮງບົ່ມຊ້ອນຢ່າງມະຫາສານ ໂດຍສະເພາະແມ່ນລັດຖະບານຊຸກຍູ້ການປະຕິບັດແຜນການຫັນປ່ຽນຮູບແບບການພັດທະນາຂອງປະເທດແລະການຈັດຕັ້ງປະຕິບັດນະໂຍບາຍທີ່ເປັນຜົນດີຕໍ່ປະຊາຊົນນັ້ນຈະເຮັດໃຫ້ເສດຖະກິດແຫ່ງຊາດຈະເລີນເຕີບໂຕຂຶ້ນຕື່ມອີກ.
ທ່ານລຽວຈົງໄລກ່າວເນັ້ນເປັນພິເສດວ່າ: ຂະນະດຽວກັນ, ສະຫະພັນຊາວມາເລເຊຍເຊື້ອສາຍຈີນ ຈະຕັ້ງໜ້ານຳພາປະຊາຊົນມາເລເຊຍເຂົ້າຮ່ວມໃນຂໍລິເລີ່ມ "ໜຶ່ງແລວທາງໜຶ່ງເສັ້ນທາງ" ຂອງຈີນ ແລະລົງເລິກການຮ່ວມມືດ້ານເສດຖະກິດການຄ້າລະຫວ່າງມາເລເຊຍກັບຈີນ. ທ່ານເຫັນວ່າ: ຜົນສຳເລັດຂອງ "ໜຶ່ງແລວທາງໜຶ່ງເສັ້ນທາງ" ໄດ້ສ້າງໂອກາດການຄ້າໃຫ້ວົງການອຸດສາຫະກຳການຄ້າມາເລເຊຍ ແລະສະຫະພັນຊາວມາເລເຊຍເຊື້ອສາຍຈີນຈະເສີມຂະຫຍາຍບົດບາດທີ່ເປັນຜູ້ປູທາງແລະສ້າງເວທີການຮ່ວມມືລະຫວ່າງສອງປະເທດດັ່ງທີ່ໄດ້ປະຕິບັດຜ່ານມາ.