ວັນທີ 6 ມັງກອນນີ້, ຂ່າວສານຊີຣີແຈ້ງຂ່າວວ່າ, ລັດຖະບານຊີຣີໄດ້ປະກາດວ່າຈະໃຊ້ງົບປະມານ ປະມານ116ລ້ານໂດລາສະຫະລັດເພື່ອສະໜັບສະໜູນການສ້າງສາເມືອງອາເລັບໂປທາງພາກເໜືອຂອງຊີຣີຄືນໃໝ່.
ຂ່າວສານຊີຣີໄດ້ນຳເອົາຄວາມເວົ້າຂອງທ່ານອີມັດ ຮາມິສ ນາຍົກລັດຖະມົນຕີຊີຣີ ມາລາຍງານວ່າ, ງົບປະມານດັ່ງກ່າວຈະນອນຢູ່ໃນງົບປະມານປະຈຳປີຂອງລັດຖະບານ, ເພື່ອໃຊ້ໃນການສ້າງສາໂຮງຮຽນ ໂຮງໝໍ ແລະ ພື້ນຖານໂຄງລ່າງຕ່າງໆທີ່ຖືກທຳລາຍ. ນອກນີ້, ງົບປະມານຈຳນວນໜຶ່ງຈະໃຊ້ເຂົ້າໃນໂຄງການປັບປຸງຊີວິດການເປັນຢູ່ຂອງປະຊາຊົນ ແລະໂຄງການພັດທະນາອື່ນໆ.
ມື້ດຽວກັນ, ທ່ານຮາມິສໄດ້ນຳພາຄະນະຜູ້ແທນລັດຖະບານໄປກວດກາວຽກງານສ້າງສາຄືນໃໝ່ຢູ່ເມືອງອາເລັບໂປ, ແລະກ່າວວ່າ, ວຽກງານສ້າງສາຄືນໃໝ່ໄດ້ກ້າວເຂົ້າສູ່ໄລຍະໃໝ່, ລັດຖະບານຊີຣີກຽມຈະເລັ່ງລັດເສີມສ້າງຄວາມສາມາດການຜະລິດຂອງເມືອງອາເລັບໂປ, ເພື່ອຕອບສະໜອງຕາມຄວາມຕ້ອງການໃນການພັດທະນາອຸດສາຫະກຳ ການຄ້າຂອງອາເລັບໂປ.
ເມືອງອາເລັບໂປເຄີຍເປັນເມືອງໃຫຍ່ອັນດັບໜຶ່ງ ແລະໃຈກາງເສດຖະກິດຂອງຊີຣີ. ໃນໄລຍະເກີດເສິກກາງເມືອງ, ກອງທັບລັດຖະບານ ແລະກອງປະກອບອາວຸດຕ້ານລັດຖະບານຊີຣີຕ່າງໄດ້ຍຶດຄອງເຂດຕ່າງໆຂອງອາເລັບໂປ, ສົງຄາມໄດ້ທຳລາຍເມືອງດັ່ງກ່າວຢ່າງຮ້າຍແຮງ. ພາຍຫຼັງສົງຄາມທີ່ຍືດຍາວເປັນເວລາດົນນານ, ໃນທີ່ສຸດ, ກອງທັບລັດຖະບານຊີຣີປະກາດວ່າໄດ້ຍຶດຄອງເມືອງອາເລັບໂປຢ່າງເຕັມທີໃນວັນທີ 22 ທັນວາ ປີ2016.
 |
