ວັນທີ 7 ມັງກອນນີ້, ທະຫານເຮືອລີບີໄດ້ຊ່ວຍເຫຼືອຊາວຍ້າຍຖິ່ນຖານຜິດກົດໝາຍ 297 ຄົນຢູ່ເຂດທະເລພາກຕາເວັນຕົກປະເທດຕົນ ແລະ ພົບສົບຜູ້ເສຍຊີວິດ 2 ຄົນ.
ທ່ານອາຢົບ ກາເຊມ ໂຄສົກກອງທັບເຮືອລີບີບອກນັກຂ່າວໃນມື້ດຽວກັນວ່າ, ກອງລາດຕະເວນທະຫານເຮືອໄດ້ພົບຊາວຍ້າຍຖິ່ນຖານຜິດກົດໝາຍດັ່ງກ່າວຢູ່ເຂດທະເລໄກຈາກເມືອງກາຣາບູລີໄປທາງທິດເໜືອປະມານ 10 ກວ່າກິໂລແມັດ ແລະ ເຂົາເຈົ້າພວມຂີ່ເຮືອຢາງ 2 ລຳ ແລະ ກອງລາດຕະເວນໄດ້ພົບສົບຜູ້ຍິງ 2 ຄົນຢູ່ໃນເຮືອລຳໜຶ່ງ.