ຫວ່າງກ່ອນນີ້ບໍ່ດົນ, ອົງການໄອຍະການສູງສຸດຂອງໄທໄດ້ອອກຄຳສັ່ງໃຫ້ແກນນຳ 13 ຄົນຂອງກຸ່ມພັນທະມິດປະຊາທິປະໄຕປະຊາຊົນຫຼືກຸ່ມເສື້ອເຫຼືອງຈ່າຍຄ່າທົດແທນ 520 ລ້ານບາດໃຫ້ບໍລິສັດສະໜາມບິນມະຫາຊົນຈຳກັດແຫ່ງປະເທດໄທຫຼື AOTໂດຍອີງຕາມຄຳຕັດສິນທາງແພງຂອງສານດີກາກ່ຽວກັບຄະດີປິດລ້ອມສະໜາມບິນ.
ສື່ມວນຊົນໄທໄດ້ອ້າງຕາມຄຳເວົ້າຂອງໂຄສົກອົງການໄອຍະການສູງສຸດໄທ ລາຍງານວ່າ: ສານດີກາໄດ້ຕັດສິນກ່ຽວກັບໜ້າທີ່ຮັບຜິດຊອບຈ່າຍຄ່າທົດແທນທາງແພງຂອງຜູ້ກ່ຽວແລ້ວ ແລະອົງການໄອຍະການມີສິດບັງຄັບໃຫ້ຜູ້ກ່ຽວປະຕິບັດຄຳຕັດສິນດັ່ງກ່າວ.
ແກນນຳກຸ່ມເສື້ອເຫຼືອງ 13 ຄົນດັ່ງກ່າວລວມທັງທ່ານຈຳລອງ ສີເມືອງ ອະດີດເຈົ້າຄອງນະຄອນຫຼວງບາງກອກ, ທ່ານສົນທິ ລິ້ມທອງກູນ ປະທານກຸ່ມບໍລິສັດສື່ມວນຊົນແລະອື່ນໆ. ຕາມຂ່າວແຈ້ງວ່າ: ຫາກວ່າ ຄົນເຫຼົ່ານີ້ບໍ່ຈ່າຍຄ່າທົດແທນດັ່ງກ່າວ, ນອກຈາກຈະຖືກຢຶດຊັບສິນແລ້ວ, ຜູ້ກ່ຽວຍັງຈະຖືກປະກາດເປັນຜູ້ລົ້ມລະລາຍ ໂດຍບໍ່ສາມາດເຂົ້າຮ່ວມການເຄື່ອນໄຫວທາງການເມືອງໃດໆພາຍໃນໄລຍະສັ້ນໄດ້ອີກດ້ວຍ.
