ຕາມຂ່າວ CRI: ໂດຍຕອບສະໜອງຕາມຄຳເຊີນຂອງທ່ານຮຸນແຊນ ນາຍົກລັດຖະມົນຕີກຳປູເຈຍ, ທ່ານຫຼີເຄີ້ສຽງ ນາຍົກລັດຖະມົນຕີຈີນໄດ້ເດີນທາງເຖິງນະຄອນຫຼວງພະນົມເປັນປະເທດກຳປູເຈຍໃນຕອນບ່າຍວັນທີ 10 ມັງກອນນີ້ເພື່ອເຂົ້າຮ່ວມກອງປະຊຸມຜູ້ນຳການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງຄັ້ງທີ 2 ແລະຢ້ຽມຢາມກຳປູເຈຍຢ່າງເປັນທາງການ.
ທ່ານຫຼີເຄີ້ສຽງ ກ່າວວ່າ, ແມ່ນ້ຳລ້ານຊ້າງ-ແມ່ນ້ຳຂອງເຊື່ອມຈອດ 6 ປະເທດທີ່ລຽບຕາມແມ່ນ້ຳດັ່ງກ່າວ, ທັງໄດ້ເຊື່ອມຈອດໂຊກຊາຕາກຳຂອງ 6 ປະເທດ. ຈີນຍິນດີຮ່ວມກັບຝ່າຍຕ່າງໆທົບທວນຄືນຄວາມຄືບໜ້າດ້ານການຮ່ວມມື, ວາງແຜນພັດທະນາໃນອະນາຄົດ, ຊຸກຍູ້ໃຫ້ກົນໄກຮ່ວມມືດັ່ງກ່າວຈາກໄລຍະອົບຮົມກໍ່ສ້າງເຂົ້າສູ່ໄລຍະເຕີບໂຕຢ່າງສະດວກ, ເພີ່ມກຳລັງແຮງເຂົ້າໃນການພັດທະນາພາກພື້ນໃຫ້ຈະເລີນຮຸ່ງເຮືອງ. ທ່ານກ່າວຕື່ມວ່າຈີນ-ກຳປູເຈຍແມ່ນເພື່ອນມິດທີ່ດີແລະຄູ່ຮ່ວມມືທີ່ດີເຊິ່ງໝົດຈິດໝົດໃຈຕໍ່ກັນ, ຫວັງວ່າຜ່ານການຢ້ຽມຢາມຄັ້ງນີ້ສາມາດຮັດແໜ້ນມິດຕະພາບແລະການຮ່ວມມືລະຫວ່າງສອງປະເທດ, ຮ່ວມກັນເປີດສາກໃໝ່ຂອງສາຍພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດ.
ໂດກາດດຽວກັນນີ້, ທ່ານຫຼີເຄີ້ສຽງຈະເຂົ້າຢ້ຽມຄຳນັບແລະພົບປະກັບສົມເດັດໂນໂຣດົມ ສີຫາໂມນີເຈົ້າຊີວິດກຳປູເຈຍແລະເຈລະຈາກັບທ່ານຮຸນແຊນ. ສອງຝ່າຍຈະເຊັນເອກະສານຮ່ວມມືຫຼາຍສະບັບໃນຂົງເຂດການເມືອງ, ເສດຖະກິດການຄ້າ, ກະສິກຳແລະອື່ນໆ.
 |
