ພາຍຫຼັງທ່ານຫຼີເຄີ້ສຽງ ນາຍົກລັດຖະມົນຕີຈີນໄດ້ເຂົ້າຮ່ວມກອງປະຊຸມສຸດຍອດການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງຄັ້ງທີ 2 ທີ່ຈັດຂຶ້ນຢູ່ນະຄອນຫຼວງພະນົມເປັນປະເທດກຳປູເຈຍໃນຕອນບ່າຍວັນທີ 10 ມັງກອນນີ້ແລ້ວ, ໄດ້ຮ່ວມກັບທ່ານຮຸນເຊັນ ນາຍົກລັດຖະມົນຕີກຳປູເຈຍ ປະເທດເຈົ້າພາບຮ່ວມກອງປະຊຸມ, ທ່ານທອງລຸນ ສີສຸລິດ ນາຍົກລັດຖະມົນຕີລາວ, ທ່ານປຣະຍຸດ ຈັນໂອຊາ ນາຍົກລັດຖະມົນຕີໄທ, ທ່ານຫວງຽນຊວນຟຸກ ນາຍົກລັດຖະມົນຕີຫວຽດນາມ ແລະ ທ່ານມິນສເວ ຮອງປະທານາທິບໍດີມຽນມາໄດ້ຮ່ວມກັນຖະແຫຼງຂ່າວ ແລະ ເຜີຍແຜ່ຜົນສຳເລັດກອງປະຊຸມ.
ທ່ານຫຼີເຄີ້ສຽງກ່າວວ່າ, ພາຍໃຕ້ສະຖານະການສາກົນ ແລະ ພາກພື້ນທີ່ສັບສົນໃນປັດຈຸບັນ, ປະເທດລຳແມ່ນ້ຳລ້ານຊ້າງ-ແມ່ນ້ຳຂອງເສີມຂະຫຍາຍທ່າແຮງຂອງຕົນ ແລະ ຕ່າງຊ່ວຍຊູຍູ້ໜູນກັນ ເຊິ່ງນີ້ບໍ່ພຽງແຕ່ມີຜົນດີຕໍ່ການຮ່ວມມືລະຫວ່າງປະເທດລຳແມ່ນ້ຳເທົ່ານັ້ນ, ກໍມີຜົນດີຕໍ່ສັນຕິພາບ, ສະຖຽນລະພາບ ແລະ ຄວາມຈະເລີນຮຸ່ງເຮືອງຮ່ວມກັນຢ່າງຖາວອນຂອງພາກພື້ນອີກດ້ວຍ.
ທ່ານຫຼີເຄີ້ສຽງຊີ້ອອກວ່າ, ນັບແຕ່ດຳເນີນການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງຕະຫຼອດເວລາ 2 ປີມານີ້, ການຮ່ວມມືລະຫວ່າງ 6 ປະເທດມີການພັດທະນາຢ່າງວ່ອງໄວ. ໃນກອງປະຊຸມຄັ້ງນີ້, ບັນດາຝ່າຍໄດ້ເປັນເອກະພາບກັນໃນລະດັບສູງຕໍ່ການຮ່ວມມືໃນອະນາຄົດ ແລະ ເຊື່ອວ່າ, ການຮ່ວມມືລະຫວ່າງ 6 ປະເທດຈະນັບມື້ດີຂຶ້ນ ແລະ ຈະນຳເອົາຄວາມຜາສຸກຫຼາຍກວ່າເກົ່າມາໃຫ້ປະຊາຊົນພາກພື້ນ.
ທ່ານຫຼີເຄີ້ສຽງກ່າວເນັ້ນວ່າ, ຈີນຍິນດີສືບຕໍ່ພະຍາຍາມຮ່ວມກັບບັນດາຝ່າຍ ເພື່ອເຮັດໃຫ້ແມ່ນ້ຳລ້ານຊ້າງ-ແມ່ນ້ຳຂອງກາຍເປັນແມ່ນ້ຳແຫ່ງມິດຕະພາບ, ແມ່ນ້ຳແຫ່ງການຮ່ວມມື ແລະ ແມ່ນ້ຳແຫ່ງຄວາມຈະເລີນຮຸ່ງເຮືອງ.