ຕອນບ່າຍວັນທີ 10 ມັງກອນນີ້, ທ່ານຫຼີເຄີ້ສຽງ ນາຍົກລັດຖະມົນຕີຈີນ ແລະ ທ່ານຮຸນເຊັນ ນາຍົກລັດຖະມົນຕີກຳປູເຈຍເປັນປະທານຮ່ວມກອງປະຊຸມສຸດຍອດການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງຄັ້ງທີ 2 ທີ່ຈັດຂຶ້ນຢູ່ນະຄອນຫຼວງພະນົມເປັນປະເທດກຳປູເຈຍ.
ທ່ານຫຼີເຄີ້ສຽງຊີ້ອອກວ່າ, ການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງໄດ້ກາຍເປັນໜຶ່ງໃນກົນໄກການຮ່ວມມືທີ່ມີພະລັງຊີວິດທີ່ສຸດ ແລະ ໄດ້ຮັບຜົນສຳເລັດຫຼາຍທີ່ສຸດໃນພາກພື້ນນີ້. ຈີນຍິນດີຮ່ວມກັບບັນດາປະເທດລຳແມ່ນ້ຳດັ່ງກ່າວ, ສ້າງແລວທາງພັດທະນາເສດຖະກິດລຳແມ່ນ້ຳລ້ານຊ້າງ-ແມ່ນ້ຳຂອງ ແລະ ສ້າງ ປະຊາຄົມຮ່ວມຊາຕາກຳປະເທດແມ່ນ້ຳລ້ານຊ້າງ-ແມ່ນ້ຳຂອງ. ທ່ານຫຼີເຄີ້ສຽງໄດ້ວາງຂໍ້ສະເໜີຫຼາຍຂໍ້ ເພື່ອຊຸກຍູ້ການຮ່ວມມືກັນຈາກໄລຍະບຳລຸງກໍ່ສ້າງຂະຫຍາຍໄປສູ່ໄລຍະພັດທະນາຢ່າງສະດວກ ແລະ ສ້າງແບບຢ່າງແຫ່ງການຮ່ວມມືໃນອະນຸພາກພື້ນ ແລະ ການຮ່ວມມືໃຕ້-ໃຕ້ ດັ່ງຕໍ່ໄປນີ້: ໜຶ່ງ, ດຳເນີນການຮ່ວມມືດ້ານຊັບພະຍາກອນນ້ຳເປັນຢ່າງດີ. ສອງ, ເພີ່ມທະວີການຮ່ວມມືໃນດ້ານການກໍ່ສ້າງຊົນລະປະທານ. ສາມ, ເປີດກວ້າງການຮ່ວມມືທາງກະສິກຳ. ສີ່, ຍົກສູງການຮ່ວມມືດ້ານຊັບພະຍາກອນມະນຸດ. ຫ້າ, ຊຸກຍູ້ການຮ່ວມມືດ້ານສາທາລະນະສຸກ.
ທ່ານຫຼີເຄີ້ສຽງກ່າວເນັ້ນວ່າ, ພວກເຮົາຕ້ອງເປີດກວ້າງການຮ່ວມມືໃນຂົງເຂດເສດຖະກິດດີຈີຕອນ, ການອະນຸລັກສິ່ງແວດລ້ອມ, ສາທາລະນະສຸກ, ດ່ານພາສີ ແລະ ຊາວໜຸ່ມ ບົນພື້ນຖານ "ຂອບການຮ່ວມມື 3+5" ແລະ ໃຫ້ກໍ່ຕົວຂຶ້ນເປັນ "ຂອບການຮ່ວມມື 3+5+X" ເປັນກ້າວໆ.
 |
