ພາຍຫຼັງສຳເລັດການເຂົ້າຮ່ວມກອງປະຊຸມຜູ້ນຳການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງຄັ້ງທີ 2 ທີ່ຈັດຂຶ້ນຢູ່ນະຄອນຫຼວງພະນົມເປັນ ປະເທດກຳປູເຈຍ ແລະຢ້ຽມຢາມກຳປູເຈຍຢ່າງເປັນທາງການແລ້ວ, ທ່ານຫຼີເຄີ້ສຽງ ນາຍົກລັດຖະມົນຕີຈີນໄດ້ເດີນທາງກັບຄືນນະຄອນຫຼວງປັກກິ່ງດ້ວຍເຮືອບິນພິເສດໃນຄືນວັນທີ 11 ມັງກອນນີ້.
ເຖິງວ່າທ່ານຫຼີເຄີ້ສຽງເຄື່ອນໄຫວຢ້ຽມຢາມຢູ່ພະນົມເປັນໃນເວລາບໍ່ເຖິງ 24 ຊົ່ວໂມງກໍຕາມ, ແຕ່ກໍໄດ້ເຂົ້າຮ່ວມກິດຈະກຳສອງຝ່າຍແລະຫຼາຍຝ່າຍ 20 ກວ່າຄັ້ງ. ໃນໄລຍະຢ້ຽມຢາມກຳປູເຈຍ, ທ່ານຫຼີເຄີ້ສຽງໄດ້ເນັ້ນວ່າ ຈີນເຄົາລົບອະທິປະໄຕແລະຄວາມເປັນເອກະລາດຂອງກຳປູເຈຍຢ່າງສະເໝີຕົ້ນສະເໝີປາຍ ແລະສະໜັບສະໜູນກຳປູເຈຍເດີນຕາມເສັ້ນທາງພັດທະນາທີ່ສອດຄ່ອງກັບສະພາບຕົວຈິງຂອງປະເທດຕົນ, ຈີນຍິນດີ ໃຫ້ການສະໜັບສະໜູນຕາມຄວາມສາມາດຂອງຕົນໃນການພັດທະນາເສດຖະກິດແລະປັບປຸງຊີວິດການເປັນຢູ່ຂອງປະຊາຊົນກຳປູເຈຍໃຫ້ດີຂຶ້ນ ແລະຖືການຮ່ວມສ້າງ "ໜຶ່ງແລວທາງໜຶ່ງເສັ້ນທາງ"ເປັນໂອກາດທີ່ດີໃນການລົງເລິກການຮ່ວມມືໃນຂົງເຂດຕ່າງໆເພື່ອບັນລຸໃຫ້ຕ່າງຝ່າຍຕ່າງໄດ້ຮັບຜົນປະໂຫຍດຫຼາຍຂຶ້ນ. ສອງຝ່າຍຍັງໄດ້ເຊັນສັນຍາຮ່ວມມື 19 ສະບັບ ແລະອອກຖະແຫຼງການຮ່ວມ ໂດຍປະກາດສ້າງຄູ່ຮ່ວມຊາຕາກຳຈີນ-ກຳປູເຈຍທີ່ມີຄວາມໝາຍດ້ານຍຸດທະສາດ.
