ທ່ານສີຈິ້ນຜິງ ເລຂາທິການໃຫຍ່ສູນກາງພັກກອມມູນິດຈີນ, ປະທານປະເທດ, ປະທານຄະນະກຳມະການການທະຫານສູນກາງຈີນ ໄດ້ປະກອບຄຳເຫັນທີ່ສຳຄັນໃນກອງປະຊຸມຄົບຄະນະຄັ້ງທີ 2 ຂອງຄະນະກຳມະການກວດກາສູນກາງພັກຊຸດທີ 19 ໃນວັນທີ 11 ມັງກອນນີ້ ໂດຍເນັ້ນການຄຸ້ມຄອງບໍລິຫານພັກຢ່າງເຂັ້ມງວດແລະຮອບດ້ານ ແລະ ປະຕິບັດໃຫ້ກ້າວສູ່ລວງເລິກດ້ວຍທັດສະນະຄະຕິທີ່ໜັກແໜ້ນ, ສ້າງສະຖານະການໃໝ່ແຫ່ງການຄຸ້ມຄອງບໍລິຫານພັກຢ່າງເຂັ້ມງວດແລະຮອບດ້ານ. ຜູ້ຊ່ຽວຊານ ແລະ ນັກວິຊາການຕ່າງປະເທດຕ່າງກໍສົນໃຈນຳຄຳເຫັນທີ່ສຳຄັນຂອງທ່ານສີຈິ້ນຜິງ ຢ່າງຕໍ່ເນື່ອງ.
ທ່ານສູນທອນ ຄັນທະວົງ ອຳນວຍການໃຫຍ່ສຳນັກງານຂ່າວສານປະເທດລາວ ກ່າວວ່າ: ພັກກອມມູນິດຈີນຄຸ້ມຄອງບໍລິຫານພັກຢ່າງເຂັ້ມງວດແລະຮອບດ້ານ, ອົບຮົມສ້າງຖັນແຖວສະມາຊິກພັກໃຫ້ມີຄຸນທາດທາງດ້ານການເມືອງທີ່ໜັກແໜ້ນ ບົດຮຽນດັ່ງກ່າວໄດ້ກາຍເປັນແບບຢ່າງທີ່ດີຕໍ່ພັກການເມືອງຕ່າງໆຂອງບັນດາປະເທດ.
ທ່ານຫວູດາຍລຸກ ຫົວໜ້າສູນເສດຖະກິດອາຊີປາຊີຟິກຫວຽດນາມ ກ່າວວ່າ: ໃນຊຸມປີຜ່ານມາ, ຂ່າວກ່ຽວກັບການຄຸ້ມຄອງບໍລິຫານພັກຢ່າງຮອບດ້ານ ແລະ ການຕ້ານການສໍ້ລາດບັງຫຼວງຢ່າງເຂັ້ມງວດຂອງພັກກອມມູນິດຈີນ ໄດ້ເປັນຂ່າວສຳຄັນທີ່ລຽງຢູ່ແຖວໜ້າຂອງສື່ມວນຊົນຫວຽດນາມໃນໄລຍະໜຶ່ງ ແລະພາໃຫ້ມີຄວາມສົນໃຈໂດຍທົ່ວໄປ. ການຕ້ານການສໍ້ລາດບັງຫຼວງຂອງຈີນມີບົດບາດໃນການເປັນແວ່ນແຍງ ເຊິ່ງສາມາດເຮັດໃຫ້ບັນດາສະມາຊິກພັກກອມມູນິດຖືເປັນແວ່ນແຍງ, "ປັບໂສ້ງເສື້ອໃຫ້ເປັນລະບຽບຮຽບຮ້ອຍດີ", ສຳນຶກຄືນການກະທຳຄວາມຜິດຂອງຕົນ ທັງມີບົດບາດເປັນກຳລັງຂົ່ມຂູ່ຕໍ່ຜູ້ຄິດຢາກສໍ້ລາດບັງຫຼວງນັ້ນອີກ.
ຜູ້ຊ່ຽວຊານຄົ້ນຄວ້າບັນຫາສາກົນ ສະຖາບັນການປົກຄອງແລະການພັດທະນາແຫ່ງຊາດໄທ ເຫັນວ່າ: ພັກກອມມູນິດຈີນໃຊ້ມາດຕະການຕ່າງໆ ເຊັ່ນ ລົງໂທດຜູ້ສໍ້ລາດບັງຫຼວງ ເພື່ອເພີ່ມທະວີການຄຸ້ມຄອງບໍລິຫານພັກຢ່າງເຂັ້ມງວດແລະຮອບດ້ານ ໄດ້ສະແດງໃຫ້ເຫັນເຖິງຈຸດປະສົງຂອງພັກທີ່ຮັບໃຊ້ປະຊາຊົນຢ່າງແທ້ຈິງ ທັງສະແດງໃຫ້ເຫັນເຖິງກຳລັງສາມັກຄີ ແລະ ຄວາມບັນດົນຫົວໃຈຂອງພັກກອມມູນິດຈີນ. ບໍ່ຕ້ອງສົງໄສເລີຍວ່າ ປະຊາຊົນຈີນຍິ່ງເຫັນດີເຫັນພ້ອມຕໍ່ການນຳພາຂອງພັກກອມມູນິດຈີນ.
