ວັນທີ 16 ມັງກອນນີ້, ທ່ານສີຈິ້ນຜິງ ປະທານປະເທດຈີນໄດ້ລົມໂທລະສັບກັບທ່ານໂດນັນ ທຣຳ ປະທານາທິບໍດີອາເມລິກາຕາມການນັດກັນ.
ທ່ານສີຈິ້ນຜິງ ຊີ້ໃຫ້ເຫັນວ່າ, ໃນປີຜ່ານມາ, ສາຍພົວພັນລະຫວ່າງຈີນ-ອາເມລິກາໄດ້ຮັກສາຄວາມໝັ້ນທ່ຽງແລະມີຄວາມຄືບໜ້າສຳຄັນ. ການທີ່ຮັກສາສາຍພົວພົນລະຫວ່າງຈີນ-ອາເມລິກາຂະຫຍາຍຕົວຢ່າງແຂງແຮງນັ້ນແມ່ນສອດຄ່ອງກັບຜົນປະໂຫຍດຂອງລັດແລະປະຊາຊົນສອງປະເທດ, ກໍຄືຄວາມປາຖະໜາຮ່ວມຂອງປະຊາຄົມໂລກ. ສອງຝ່າຍຄວນຮັກສາການໄປມາຫາສູ່ກັນລະດັບສູງແລະທຸກຂັ້ນ, ແລະແກ້ໄຂບັນຫາອ່ອນໄຫວດ້ວຍວິທີທີ່ມີລັກສະນະສ້າງສັນ, ເຄົາລົບນັບຖືຜົນປະໂຫຍດໃຈກາງແລະໃຫ້ຄວາມສຳຄັນຕໍ່ຄວາມເປັນຫ່ວງເປັນໃຍເຊິ່ງກັນແລະກັນ, ຮັກສາທາອ່ຽງພັດທະນາຢ່າງແຂງແຮງຂອງສາຍພົວພັນລະຫວ່າງສອງປະເທດ.
ທ່ານທຣຳ ກ່າວວ່າ, ອາເມລິກາເອົາໃຈໃສ່ຢ່າງສູງຕໍ່ສາຍພົວພັນກັບຈີນແລະການຮ່ວມມືລະຫວ່າງສອງປະເທດ, ພ້ອມທັງຍິນດີຮ່ວມກັບປະເທດຈີນເພີ່ມທະວີການໄປມາຫາສູ່ກັນລະດັບສູງແລະທຸກຂັ້ນ, ເປີດກວ້າງການຮ່ວມມືຢ່າງແທ້ຈິງ, ແກ້ໄຂບັນຫາເສດຖະກິດການຄ້າລະຫວ່າງສອງປະເທດແລະຊຸກຍູ້ໃຫ້ສາຍພົວພັນລະຫວ່າງສອງປະເທດໄດ້ຮັບຄວາມຄືບໜ້າໃໝ່.
ທ່ານສີຈິ້ນຜິງຊີ້ໃຫ້ເຫັນວ່າ, ສະຖານະການແຫຼມເກົາຫຼີໄດ້ມີການປ່ຽນແປງຢ່າງຕັ້ງໜ້າຈຳນວນໜຶ່ງ, ຝ່າຍຕ່າງໆຄວນທຳຄວາມພະຍາຍາມເພື່ອຮັກສາທາອ່ຽງທີ່ດີ, ເພື່ອສ້າງເງື່ອນໄຂໃຫ້ແກ່ການເປີດການເຈລະຈາຄືນໃໝ່.
ທ່ານທຣຳ ກ່າວວ່າ, ອາເມລິກາເອົາໃຈໃສ່ຢ່າງສູງຕໍ່ບົດບາດສຳຄັນຂອງຈີນທີ່ເສີມຂະຫຍາຍໃນບັນຫາແຫຼມເກົາຫຼີ, ແລະຍິນດີສືບຕໍ່ເພີ່ມທະວີການປະສານສົມທົບກັບຈີນຕື່ມອີກ.
 |
