ວັນທີ 16 ມັງກອນນີ້ ຢູ່ນະຄອນຫຼວງຊາວໂຕເມ, ທ່ານຫວາງຢີ້ ລັດຖະມົນຕີກະຊວງການຕ່າງປະເທດຈີນ ແລະ ທ່ານເອີບີໂນ ໂບເຕວໂຮ ລັດຖະມົນຕີກະຊວງການຕ່າງປະເທດຊາວໂຕເມແລະພລິນຊີຊິບ ໄດ້ຮ່ວມກັນຖະແຫຼງຂ່າວ ແລະ ມີນັກຂ່າວໄດ້ຖາມເຖິງບັນຫາຈະປະຕິບັດຕໍ່ບໍ່ພຽງເທົ່າໃດປະເທດອາຝຣິກາທີ່ຍັງຮັກສາການພົວພັນທີ່ເອີ້ນວ່າ "ທາງການທູດ" ກັບໄຕ້ຫວັນ?
ທ່ານຫວາງຢີ້ ກ່າວວ່າ: ສິ່ງທີ່ຈະຕ້ອງເນັ້ນກ່ອນໝູ່ນັ້ນ ຄື ໃນໂລກນີ້ມີພຽງແຕ່ປະເທດຈີນດຽວ, ໄຕ້ຫວັນແມ່ນດິນແດນສ່ວນໜຶ່ງຂອງຈີນໂດຍຈະຕັດແຍກອອກບໍ່ໄດ້ ລັດຖະບານສາທາລະນະລັດປະຊາຊົນຈີນໃນຖານະເປັນລັດຖະບານຊອບກົດໝາຍທີ່ຕາງໜ້າທົ່ວປະເທດຈີນພຽງໜຶ່ງດຽວ ບໍ່ພຽງແຕ່ເປັນຄວາມຮັບຮູ້ທາງການເມືອງທີ່ເປັນເອກະພາບກັນຂອງປະເທດຈຳນວນສ່ວນຫຼວງຫຼາຍທີ່ສຸດໃນໂລກເທົ່ານັ້ນ, ແຕ່ຍັງໄດ້ຮັບການຮັບຮອງຈາກອົງການສະຫະປະຊາຊາດຢ່າງເປັນທາງການແລະຍັງກຳນົດເປັນຫຼັກການສາກົນອີກດ້ວຍ.
ທ່ານຫວາງຢີ້ ກ່າວຕື່ມວ່າ: ປັດຈຸບັນ, ຈີນພວມເລັ່ງລັດຊຸກຍູ້ການຮ່ວມມືກັບອາຝຣິກາຢ່າງຮອບດ້ານ ໃນຂອບເວທີປຶກສາຫາລືການຮ່ວມມືຈີນ-ອາຝຣິກາ ແລະ ການຮ່ວມສ້າງ "ໜຶ່ງແລວທາງໜຶ່ງເສັ້ນທາງ" ເພື່ອຊ່ວຍບັນດາປະເທດອາຝຣິກາໃນການບັນລຸການເປັນເອກະລາດທາງດ້ານເສດຖະກິດ ແລະ ການພັດທະນາໂດຍອາໄສຄວາມສາມາດຂອງຕົນ. ແຕ່ໃນໄລຍະນີ້, ຍັງມີບໍ່ພຽງເທົ່າໃດປະເທດອາຝຣິກາຍັງບໍ່ສາມາດສ້າງຕັ້ງການພົວພັນກັບຈີນໃຫ້ເປັນປົກກະຕິໄດ້ ແລະກໍບໍ່ສາມາດເຂົ້າຮ່ວມການຮ່ວມມືຈີນ-ອາຝຣິກາ ເພາະປະເທດເຫຼົ່ານີ້ຍັງຮັກສາການພົວພັນທີ່ເອີ້ນວ່າ "ທາງການທູດ" ກັບໄຕ້ຫວັນ ເປັນອັນຈະແຈ້ງວ່າ ມັນບໍ່ສອດຄ່ອງກັບຜົນປະໂຫຍດພື້ນຖານຂອງປະຊາຊົນແລະປະເທດເຫຼົ່ານີ້. ໂອກາດນີ້, ຂ້າພະເຈົ້າຫວັງຢ່າງຈິງໃຈວ່າ ປະເທດອາຝຣິກາທຸກປະເທດລ້ວນແຕ່ສາມາດເຂົ້າຮ່ວມການຮ່ວມມືລະຫວ່າງຈີນອາຝຣິກາ, ບໍ່ມີໃຜຈະພາດໂອກາດປະຫວັດສາດອີກໃນການຮ່ວມມືກັບຈີນເພື່ອຈະໄດ້ພັດທະນາຮ່ວມກັນຢ່າງວ່ອງໄວ ແລະ ບໍ່ມີໃຜສືບຕໍ່ຢູ່ນອກປະຕູການຮ່ວມມືດ້ວຍໄມຕີຈິດມິດຕະພາບລະຫວ່າງຈີນ-ອາຝຣິກາອີກ. ຂ້າພະເຈົ້າເຊື່ອໝັ້ນວ່າ, ໃນຂະບວນການປະຫວັດສາດແຫ່ງການທ້ອນໂຮມປະເທດເຂົ້າເປັນເອກະພາບກັນຂອງຈີນ, ອາຝຣິກາອ້າຍນ້ອງທຸກຖ້ວນໜ້າລ້ວນແຕ່ຈະຢູ່ຄຽງຂ້າງປະຊາຊົນຈີນຢ່າງແນ່ນອນ.
