ວັນທີ 16 ມັງກອນນີ້, ທ່ານອັນໂຕນີໂອ ກູເຕີເຣັສ ເລຂາທິການໃຫຍ່ອົງການສະຫະປະຊາຊາດ ໄດ້ຍ້ອງຍໍຊົມເຊີຍຢ່າງສູງຕໍ່ຈີນທີ່ເສີມຂະຫຍາຍບົດບາດສຳຄັນເປັນຢ່າງຍິ່ງໃນການຮັບມືກັບການປ່ຽນແປງດິນຟ້າອາກາດຂອງໂລກ ແລະ ປຸກລະດົມຈີນສືບຕໍ່ເສີມຂະຫຍາຍບົດບາດສຳຄັນໃນຕໍ່ໜ້າ.
ທ່ານກູເຕີເຣັສ ໄດ້ກ່າວໃນພິທີຖະແຫຼງຂ່າວຄັ້ງທຳອິດຂອງຕົນ ໃນປີ 2018 ທີ່ຈັດຂຶ້ນໃນວັນດັ່ງກ່າວວ່າ: ພວກເຮົາຊົມເຊີຍຈີນທີ່ໃຫ້ຄຳໝັ້ນສັນຍາໃນການຮັບມືກັບການປ່ຽນແປງຂອງດິນຟ້າອາກາດ ເພາະວ່າຈີນເປັນກຸ່ມເສດຖະກິດທີ່ໃຫຍ່ຫຼວງ ແລະ ຈະສາມາດເສີມຂະຫຍາຍບົດບາດສຳຄັນເປັນຢ່າງຍິ່ງ.
ທ່ານກູເຕີເຣັສ ກ່າວຕື່ມວ່າ: ຄຳໝັ້ນສັນຍາຕ່າງໆທີ່ລະບຸໄວ້ໃນ "ສັນຍາປາຣີ" ນັ້ນອາດຈະບໍ່ສາມາດບັນລຸຜົນເປັນຈິງໄດ້ທັງໝົດ ແລະ ກໍບໍ່ອາດຈະສາມາດຄວບຄຸມອຸນຫະພູມສະເລ່ຍທົ່ວໂລກໃຫ້ສູງຂຶ້ນບໍ່ເກີນ 2 ອົງສາເມື່ອທຽບໃສ່ອຸນຫະພູມໃນສະໄໝກ່ອນຫັນເປັນອຸດສາຫະກຳ. ໃນການແຂ່ງຂັນຄັ້ງນີ້, ພວກເຮົາຍັງບໍ່ສາມາດຍາດໄດ້ໄຊຊະນະເທື່ອ, ຜູ້ຊະນະນັ້ນຍັງຄົງແມ່ນການປ່ຽນແປງຂອງດິນຟ້າອາກາດ.
ທ່ານກູເຕີເຣັສ ກ່າວຕໍ່ໄປວ່າ: ຈີນສາມາດເສີມຂະຫຍາຍບົດບາດອັນສຳຄັນໃນການເຄື່ອນໄຫວທີ່ມີຄວາມຫ້າວຫັນທີ່ຍິ່ງໃຫຍ່ດັ່ງກ່າວ ແລະ ຂ້າພະເຈົ້າເອງກໍຝາກຄວາມຫວັງອັນແຮງກ້າຕໍ່ການສ້າງກົນໄກການສົນທະນາແລະຮ່ວມມືກັບລັດຖະບານຈີນໃນດ້ານນີ້.
