ປີ 2017, ລວມຍອດຜະລິດຕະພັນພາຍໃນຂອງຈີນບັນລຸເຖິງ 82.700 ຕື້ຢວນ ເພີ່ມຂຶ້ນ 6,9% ເມື່ອທຽບໃສ່ປີ 2016 ແລະ ເຕີບໂຕໄວຂຶ້ນເປັນຄັ້ງທຳອິດໃນຮອບ 7 ປີຜ່ານມາ.
ທ່ານນິ້ງຈີເຈີ ຫົວໜ້າອົງການສະຖິຕິແຫ່ງຊາດຈີນ ກ່າວຢູ່ປັກກິ່ງໃນວັນທີ 18 ມັງກອນນີ້ວ່າ: ເສດຖະກິດຈີນໃນປີ 2017 ໄດ້ພັດທະນາດີຂຶ້ນດ້ວຍຄວາມໝັ້ນທ່ຽງ ແລະ ດີກວ່າຄາດໝາຍ.
ນອກນີ້, ປີຜ່ານມາ, ລາຍຮັບສະເລ່ຍຕໍ່ຫົວຄົນທີ່ສາມາດຈັບຈ່າຍໄດ້ຂອງຈີນໄດ້ບັນລຸເຖິງ 25.974 ຢວນ ເມື່ອຫັກປັດໄຈລາຄາອອກແລ້ວໄດ້ເພີ່ມຂຶ້ນ 7,3% ເຊິ່ງໄວກວ່າປີຜ່ານມາ 1%; ລວມຍອດມູນຄ່າຂາຍຍ່ອຍເຄື່ອງອຸປະໂພກບໍລິໂພກສາມາດບັນລຸ 36.600 ຕື້ຢວນ ເພີ່ມຂຶ້ນ 10,2% ເມື່ອທຽບໃສ່ປີ 2016 ແລະ ເພີ່ມຂຶ້ນຊ້າລົງເລັກໜ້ອຍ.
ຂ່າວລາຍງານຕື່ມວ່າ: ໜຶ່ງປີຜ່ານມາ, ຈີນສາມາດສຳເລັດໜ້າທີ່ໃນການຫຼຸດຄວາມສາມາດການຜະລິດທີ່ເກີນຄວາມຈຳເປັນຂອງຂະແໜງເຫຼັກກ້າ ແລະ ຖ່ານຫີນ ໂດຍລະດັບສະສົມເຮືອນສິນຄ້າໄວ້ໃນສາງໄດ້ຫຼຸດລົງຢ່າງຕໍ່ເນື່ອງ.
