ທ່ານຣຳຊີ ເອັສເຊວດິນ ຣຳຊີ ຮອງທູດພິເສດຂອງເລຂາທິການໃຫຍ່ອົງການສະຫະປະຊາຊາດກ່ຽວກັບບັນຫາຊີຣີ ໄດ້ຢືນຢັນຢູ່ນະຄອນຫຼວງດາມັສ ປະເທດຊີຣີ ໃນວັນທີ 18 ມັງກອນນີ້ວ່າ: ລັດຖະບານຊີຣີ ຈະເຂົ້າຮ່ວມການເຈລະຈາກ່ຽວກັບບັນຫາຊີຣີທີ່ຈະຈັດຂຶ້ນຢູ່ນະຄອນຫຼວງວຽນ ປະເທດໂອຕຣິສໃນເດືອນມັງກອນນີ້.
ທ່ານຣຳຊີ ໄດ້ພົບປະກັບທ່ານໄຟຊັນ ມາກດັດ ຮອງລັດຖະມົນຕີກະຊວງການຕ່າງປະເທດຊີຣີໃນວັນດັ່ງກ່າວ ແລະຫຼັງສິ້ນສຸດການພົບປະ ກໍໄດ້ຢືນຢັນໃນພິທີຖະແຫຼງຂ່າວວ່າ: ທ່ານມາກດັດ ໄດ້ຢືນຢັນກັບຕົນແລ້ວວ່າ ລັດຖະບານຊີຣີເຫັນດີສົ່ງຄະນະຜູ້ແທນເຂົ້າຮ່ວມການເຈລະຈາດັ່ງກ່າວ.
ທ່ານຣຳຊີ ກ່າວຕື່ມວ່າ: ລັດຖະບານຊີຣີ ແລະ ພັກຝ່າຍຄ້ານ ເຫັນດີຈະເຂົ້າຮ່ວມການເຈລະຈາດັ່ງກ່າວດ້ວຍທ່າທີອັນຕັ້ງໜ້າແລະສ້າງສັນ ແລະຖ້າວ່າການເຈລະຈາດັ່ງກ່າວສາມາດປະສົບຜົນສຳເລັດ ກໍຈະມີຜົນດີຕໍ່ການຊຸກຍູ້ການເຈລະຈາທົ່ວປະເທດຊີຣີໃນທ້າຍເດືອນມັງກອນນີ້ໃຫ້ປະສົບຜົນສຳເລັດ.
