ວັນທີ 19 ມັງກອນນີ້, ພິທີໄຂກິດຈະກຳ "ປີທ່ອງທ່ຽວຈີນ-ສະຫະພາບເອີລົບ" ໄດ້ຈັດຂຶ້ນຢູ່ເວນີສຂອງອີຕາລີ. ທ່ານຫຼີເຄີ້ສຽງ ນາຍົກລັດຖະມົນຕີຈີນກັບທ່ານຢັງ ຄຼາວດ໌ ຢູງເຄີ ປະທານຄະນະກຳມາທິການສະຫະພາບເອີລົບໄດ້ສົ່ງຄຳອວຍພອນໃຫ້ພິທີໄຂດັ່ງກ່າວ.
ໃນຄຳອວຍພອນ, ທ່ານຫຼີເຄີ້ສຽງກ່າວວ່າ, ຈີນກັບເອີລົບຢູ່ສອງສົ້ນຂອງເສັ້ນທາງສາຍໄໝເກົ່າ, ການສົນທະນາລະຫວ່າງອາລະຍະທຳມີປະຫວັດສາດຍາວນານ. ປັດຈຸບັນ, ຈີນກັບສະຫະພາບເອີລົບພວມພະຍາຍາມສ້າງ 4 ການພົວພັນຄູ່ຮ່ວມຄື ສັນຕິພາບ ການເຕີບໂຕ ການປະຕິຮູບແລະອາລະຍະທຳ, ຈັດຕັ້ງປະຕິບັດ ແຜນການຍຸດທະສາດ 2020 ການຮ່ວມມືຈີນເອີລົບ ຢ່າງຮອບດ້ານ, ຮ່ວມມືຊຸກຍູ້ຂໍ້ລິເລີ່ມ ໜຶ່ງແລວທາງໜຶ່ງເສັ້ນທາງ ຂອງຈີນໃຫ້ເຊື່ອມຕໍ່ກັບຍຸດທະສາດພັດທະນາຂອງເອີລົບຢ່າງບັງເກີດຜົນ, ການພົວພັນລະຫວ່າງສອງຝ່າຍຜະເຊີນໜ້າກັບໂອກາດພັດທະນາອັນໃໝ່.
ທ່ານຫຼີເຄີ້ສຽງຊີ້ອອກວ່າ, ການທ່ອງທ່ຽວບໍ່ພຽງແຕ່ແມ່ນຂົວສຳຄັນທີ່ດຳເນີນການແລກປ່ຽນອາລະຍະທຳແລະຊຸກຍູ້ໄມດຕີຈິດລະຫວ່າງປະຊາຊົນເທົ່ານັ້ນ, ຍັງແມ່ນຜະລິດຕະກຳຈະເລີນໃໝ່ທີ່ຊຸກຍູ້ເສດຖະກິດເຕີບໂຕ. ຈີນກັບເອີລົບມີຊັບພະຍາກອນທາງການທ່ອງທ່ຽວອັນອຸດົມສົມບູນ, ມີອະນາຄົດຮ່ວມມືອັນສົດໃສ. ຫວັງວ່າສອງຝ່າຍຈະຖືການຈັດກິດຈະກຳ "ປີທ່ອງທ່ຽວຈີນ-ສະຫະພາບເອີລົບ" ເປັນໂອກາດ, ຕັ້ງໜ້າເປີດກວ້າງການຮ່ວມມືທາງການທ່ອງທ່ຽວແລະໄປມະຫາສູ່ກັນລະຫວ່າງປະຊາຊົນຂອງຈີນກັບເອີລົບ, ຊຸກຍູ້ການສົນທະນາດ້ານອາລະຍະທຳແລະການປະສານຈິດໃຈປະຊາຊົນ, ຊຸກຍູ້ການພັດທະນາຮ່ວມກັນແລະຕ່າງຝ່າຍຕ່າງໄດ້ຮັບຜົນປະໂຫຍດ, ແລະເພີ່ມພະລັງແຮງໃໝ່ໃຫ້ການພັດທະນາການພົວພັນຄູ່ຮ່ວມຍຸດທະສາດຮອບດ້ານລະຫວ່າງຈີນກັບເອີລົບໃນໄລຍະໃໝ່.
