ກອງປະຊຸມຄົບຄະນະຄັ້ງທີ 2 ຂອງຄະນະກຳມະການສູນກາງພັກກອມມູນິດຈີນຊຸດທີ 19 ໄດ້ສຳເລັດລົງເມື່ອບໍ່ດົນມານີ້ ໂດຍໄດ້ຢືນຢັນບົດບາດທີ່ສຳຄັນຂອງລັດຖະທຳມະນູນສະບັບປັດຈຸບັນຂອງຈີນໃນການປະຕິຮູບ-ເປີດປະຕູຕໍ່ພາຍນອກ ແລະ ການປະຕິບັດຕົວຈິງໃນການສ້າງສາທັນສະໄໝສັງຄົມນິຍົມ, ໄດ້ກຳນົດຄວາມຮຽກຮ້ອງຕ້ອງການແລະຫຼັກການຂອງການປັບປຸງລັດຖະທຳມະນູນເທື່ອນີ້ ທັງພິຈາລະນາແລະຮັບຮອງເອົາ "ຂໍ້ສະເໜີຂອງສູນກາງພັກກອມມູນິດຈີນກ່ຽວກັບການດັດແກ້ບາງເນື້ອໃນຂອງລັດຖະທຳມະນູນ".
ລັດຖະທຳມະນູນສະບັບປັດຈຸບັນຂອງຈີນໄດ້ຮັບຮອງເມື່ອປີ 1982 ແລະ ໄດ້ປະຕິບັດຕົວຈິງຕະຫຼອດ 30 ກວ່າປີຜ່ານມາ ສະແດງໃຫ້ເຫັນວ່າ: ລັດຖະທຳມະນູນໄດ້ເດັດດ່ຽວຍຶດໝັ້ນການນຳພາຂອງພັກກອມມູນິດຈີນ, ໄດ້ຮັບປະກັນການເປັນເຈົ້າບ້ານເຈົ້າເມືອງຂອງປະຊາຊົນ, ໄດ້ຊຸກຍູ້ການປະຕິຮູບ-ເປີດປະຕູຕໍ່ພາຍນອກ ແລະ ການສ້າງສາທັນສະໄໝສັງຄົມນິຄົມຢ່າງແຂງແຮງ, ໄດ້ຊຸກຍູ້ຂະບວນການສ້າງສາປະເທດສັງຄົມນິຄົມທີ່ປົກຄອງດ້ວຍກົດໝາຍຢ່າງແຂງແຮງ ແລະ ປົກປັກຮັກສາການເປັນເອກະພາບຂອງປະເທດ, ຄວາມສາມັກຄີຂອງຊາດ ແລະ ຄວາມສະຫງົບຂອງສັງຄົມຢ່າງແຂງແຮງ.
ການປະຕິບັດຕົວຈິງສາມາດພິສູດຢ່າງເຕັມສ່ວນວ່າ ລັດຖະທຳມະນູນສະບັບປັດຈຸບັນຂອງຈີນແມ່ນລັດຖະທຳມະນູນທີ່ດີ ເຊິ່ງດີຢູ່ໃນດ້ານຕ່າງໆຄື ສອດຄ່ອງກັບສະພາບຄວາມເປັນຈິງຂອງຈີນ, ສອດຄ່ອງກັບຄວາມຮຽກຮ້ອງຕ້ອງການຂອງການພັດທະນາຍຸກປັດຈຸບັນ, ໄດ້ສະແດງໃຫ້ເຫັນເຖິງມານະຈິດຮ່ວມຂອງປະຊາຊົນຢ່າງເຕັມສ່ວນ, ສາມາດຮັບປະກັນສິດປະຊາທິປະໄຕຂອງປະຊາຊົນຢ່າງເຕັມສ່ວນ, ສາມາດປົກປັກຮັກສາຜົນປະໂຫຍດພື້ນຖານຂອງປະຊາຊົນຢ່າງເຕັມສ່ວນ, ຊຸກຍູ້ການພັດທະນາກ້າວໜ້າຂອງປະເທດ ແລະ ຮັບປະກັນການສ້າງຊີວິດທີ່ມີຄວາມຜາສຸກຂອງປະຊາຊົນ. ການປະຕິບັດຕົວຈິງຍັງພິສູດຢ່າງເຕັມສ່ວນວ່າ ລັດຖະທຳມະນູນສະບັບປັດຈຸບັນຂອງຈີນມີທ່າແຮງຢ່າງພົ້ນເດັ່ນ, ມີພື້ນຖານອັນໜັກແໜ້ນ, ມີພະລັງຊີວິດຢ່າງເຂັ້ມແຂງ ສະນັ້ນ ຈຶ່ງຕ້ອງປົກປັກຮັກສາຢ່າງເດັດດ່ຽວ, ຍຶດໝັ້ນເປັນໄລຍະຍາວນານ ແລະຜັນຂະຫຍາຍຢ່າງຮອບດ້ານ.
ການດັດແກ້ບາງເນື້ອໃນຂອງລັດຖະທຳມະນູນສະບັບນີ້ ກໍເພື່ອເຮັດໃຫ້ລັດຖະທຳມະນູນສາມາດເສີມຂະຫຍາຍບົດບາດທີ່ເປັນບັນທັດຖານ, ນຳພາ, ຊຸກຍູ້ສົ່ງເສີມ ແລະມີຄວາມຮັບປະກັນ, ແມ່ນຄວາມຕ້ອງການທີ່ຕ້ອງເປັນໄປຕາມການພັດທະນາຕົວຈິງ. ນັບແຕ່ການດັດແກ້ລັດຖະທຳມະນູນເມື່ອປີ 2004 ເປັນຕົ້ນມາ, ພາລະກິດຂອງພັກແລະລັດ ໄດ້ມີການພັດທະນາປ່ຽນແປງທີ່ສຳຄັນຢ່າງຫຼວງຫຼາຍ, ຂະນະທີ່ກອງປະຊຸມຜູ້ແທນທົ່ວປະເທດຂອງພັກກອມມູນິດຈີນຄັ້ງທີ 19 ກໍໄດ້ວາງແຜນຍຸດທະສາດທີ່ສຳຄັນຕໍ່ການຍຶດໝັ້ນ ແລະ ພັດທະນາສັງຄົມນິຍົມທີ່ມີສີສັນພິເສດຂອງຈີນໃນຍຸກໃໝ່ ແລະ ໄດ້ກຳນົດເປົ້າໝາຍສູ້ຊົນໃໝ່. ການປະຕິບັດຕົວຈິງໄດ້ສະແດງໃຫ້ເຫັນວ່າ ລັດຖະທຳມະນູນຈີນແມ່ນຕິດແໜ້ນກັບພັກນຳພາປະຊາຊົນດຳເນີນການຊອກຄົ້ນຕົວຈິງ ແລະ ໄດ້ຮັບການບູລະນະປັບປຸງໃຫ້ສົມບູນຢ່າງບໍ່ຢຸດຢັ້ງໄປຄຽງຄູ່ກັບຄວາມກ້າວໜ້າຂອງຍຸກສະໄໝ ແລະ ການພັດທະນາພາລະກິດຂອງພັກແລະປະຊາຊົນ.
