ພິທີສະເຫຼີມສະຫຼອງຜົນສໍາເລັດໂຄງການກໍ່ສ້າງເຂື່ອນໄຟຟ້ານໍ້າໄຜ່ ໄດ້ຈັດຂຶ້ນໃນວັນທີ 22 ມັງກອນນີ້ ທີ່ແຂວງໄຊສົມບູນ ໂດຍການເປັນກຽດເຂົ້າຮ່ວມຂອງທ່ານ ຄໍາມະນີ ອິນທິລາດ, ກໍາມະການສູນກາງພັກ, ເລຂາຄະນະພັກ ລັດຖະມົນຕີກະຊວງພະລັງງານ ແລະ ບໍ່ແຮ່, ທ່ານຫວາງຢີ່ທົງ, ປະທານ ບໍລິສັດ ນໍຣິນໂກ, ທ່ານບຸນອູ້ມ ສີວັນເພັງ, ຜູ້ອຳນວຍການໃຫຍ່ ລັດວິສາຫະກິດໄຟຟ້າລາວ, ທ່ານ ທອງລອຍ ສີສຸວົງ, ເຈົ້າແຂວງແຂວງໄຊສົມບູນ ພ້ອມດ້ວຍຜູ້ຕາງໜ້າທັງຝ່າຍລາວ ແລະ ຈີນເຂົ້າຮ່ວມ.
ທ່ານຄໍາມະນີ ກ່າວວ່າ, ໂຄງການເຂື່ອນໄຟຟ້ານ້ຳໄຜ່ ກໍແມ່ນໂຄງການໜຶ່ງ ທີ່ມີຄວາມສຳຄັນ ຊຶ່ງໄດ້ກຳນົດໃນກອບແຜນແມ່ບົດຂອງ ການ ພັດທະນາລະບົບໄຟຟ້າ ຢູ່ປະເທດເຮົາໄລຍະນີ້ຮອດປີ 2020 ແລະ ໂຄງການນີ້ ຈະສະໜອງພະລັງງານຮັບໃຊ້ໃຫ້ ແຂວງ ໄຊສົມບູນ ແລະ ຊຽງຂວາງ ໂດຍສະເພາະ ຢູບໍລິເວນເມືອງ ລ່ອງແຈ້ງ ໃຫ້ມີຄວາມຮັບປະກັນ ແລະ ມີປະສິດທິຜົນດີຂື້ນຕື່ມ ພ້ອມນີ້ກໍເປັນການສ້າງແຫຼ່ງລາຍຮັບ, ສ້າງວຽກເຮັດງານທໍາ ແລະ ຍົກລະດັບຊິວິດ ການເປັນຢູ່ຂອງປະຊາຊົນທີ່ອາໄສຢູ່ໃຫ້ ບໍລິເວນໂຄງການ ແລະທອງຖິ່ນ ຂື້ນຕື່ມ.
ທ່ານຫວາງຢີ່ທົງກ່າວວ່າ, ມື້ນີ້ໂຄງການເຂື່ອນໄຟຟ້ານໍ້າໄຜ່ ໄດ້ສໍາເລັດລົງຢ່າງສົມບູນ, ມັນເປັນເຄື່ອງຫມາຍສະແດງເຖິງບໍລິສັດນໍຣິນໂກ ໄດ້ກ້າວຂື້ນດຳເນີນທຸລະກິດໃນລາວອີກລະດັບໃຫມ່ໃນການຮ່ວມມືກັບລັດຖະ
ບານລາວ ແລະພາກສ່ວນຕ່າງໆທີ່ກ່ຽວຂ້ອງ ຈົນໄດ້ຮັບຫມາກຜົນແຫ່ງໄຊຊະນະ; ການກໍ່ສ້າງ ແລະ ດຳເນີນທຸລະກິດຂອງໂຄງການເຂື່ອນໄຟຟ້ານໍ້າໄຜ່, ບໍ່ພຽງແຕ່ພາໃຫ້ເສດຖະກິດພາຍໃນທ້ອງຖິ່ນດີຂຶ້ນເທົ່ານັ້ນ, ຍັງສາມາດຕອບສະຫນອງພະລັງງານທີ່ສະອາດ ແລະ ສ້າງຜົນປະໂຫຍດໃນການເຕີບໂຕທາງດ້ານເສດຖະກິດຂອງລາວ.
ໂອກາດນີ້, ທ່ານທອງລອຍ ສີສຸວົງໄດ້ກ່າວວ່າ, ຜົນສຳເລັດຂອງໂຄງການເຂື່ອນໄຟຟ້າ ນໍ້າໄຜ່ ໃນຄັ້ງນີ້ ມັນເປັນການປະກອບສ່ວນ ອັນສຳຄັນເຂົ້າໃນການພັດທະນາເສດຖະກິດ-ສັງຄົມຂອງບັນດາແຂວງພາກເໜືອ ໂດຍສະເພາະແຂວງໄຊສົມບູນ ໃຫ້ມັ້ງຄັ້ງເຂັ້ມແຂງ, ເປັນທ່າແຮງໃນການຜະລິດ ແລະ ສະໜອງກະແສໄຟຟ້າໃຫ້ພຽງພໍ ກັບຄວາມຮຽກຮ້ອງຕ້ອງການຂອງປະຊາຊົນບັນດາເຜົ່າ ເຊີ່ງໄດ້ປະກອບສ່ວນອັນສໍາຄັນເຂົ້າໃນການຫັນປ່ຽນແບບວິທີການຜະລິດໂດຍສະເພາະຈາກເສດຖະກິດທຳມະຊາດ - ເຄິ່ງທຳຊາດ ໄປສູ່ເສດຖະກິດຜະລິດເປັນສິນຄ້າ, ຫັນປ່ຽນອາຊີບການທຳມາຫາກິນ ແລະ ເຮັດໃຫ້ການດຳລົງຊີວິດຂອງປະຊາຊົນບັນດາເຜົ່າດີຂື້ນເປັນກ້າວໆ, ສ້າງລາຍຮັບໃຫ້ປະຊາຊົນຫຼາຍຂື້ນ. ພ້ອມນີ້ໂຄງການດັ່ງກ່າວຖືເປັນບາດກ້າວຫັນປ່ຽນໃໝ່ທີ່ຕັ້ງໜ້າເພື່ອຍົກລະດັບໃນການພັດທະນາພື້ນຖານໂຄງລ່າງຂອງແຂວງ ໃຫ້ມີຄວາມເຂັ້ມແຂງຕິດພັນກັບການແກ້ໄຂຄວາມທຸກຍາກຂອງປະຊາຊົນບັນດາເຜົ່າຕາມທິດສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ.
ເຂື່ອນໄຟຟ້ານໍ້າໄຜ່ ຕັ້ງຢູ່ເຂດເມືອງໂພນ (Phoun) ແຂວງໄຊສົມບູນ,. ສະຖານນີເກັບໄຟຟ້າມີຄວາມຈຸ 86 MW ແລະ ສາມາດຜະລິດພະລັງງານໄຟຟ້າໃນແຕ່ລະປີໄດ້ ປະມານ 417 ລ້ານກິໂລວັດໂມງ, ໂດຍນຳໃຊ້ງົບປະມານໃນການລົງທຶນທັງຫມົດ 218 ລ້ານໂດລາສະຫະລັດ, ແລະພະລັງງານໄຟຟ້າທັງຫມົດຈາກໂຄງການນີ້ຈະຂາຍໃຫ້ແກ່ ລັດວິສາຫະກິດໄຟຟ້າລາວ.
